QR-код, газ но скал кыскись роботъёс

Удмурт Дунне
By Удмурт Дунне 10 января, 2022 11:21
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Выль арез пумитаса, дышем сямъя йылпумъянъёс лэсьтӥськомы ортчемезлы. Кыӵеен бен тодамы кылёз 2021-тӥез ар? Учыръёс, ужрадъёс пӧртэм, но одӥгез гинэ ӧз воштӥськы: валлян арын сямен ик, кылем арез но ортчытӥмы коронавирусэн нюръяськыса.

Дуннеын

Давид Белявский Олимпиадаысь вормонэн берытскиз. Туспуктэм eburg.mk.ru сайтысь

20-тӥ январе Америкалэн 46-тӥ президентэз луиз Джо Байден. Азьвылэзлы президентсылы Дональд Трамплы дурбасьтӥсьёс митингъёсы потӥзы, огыр-бугыр луиз, трос адямиос быризы.

29-тӥ мартэ Китай вормиз коронавирусэз: черламъёс кӧня ке адями гинэ — соос но палэнысь вуэмъёс. Черен йырин улонысь кошкон учыръёс пусъемын ӧвӧл. Коронавирусэз серметаны юрттӥз калыклэн ­карантинын пукемез, QR-кодъёсты пыӵатон но вакцина пуктылон.

8-тӥ августэ Япониысь Токиоын йыл­пумъяськизы 32-тӥ гу­жем Олимпийской ­шудонъёс. Пан­­демиен­ ­йы­рин ӵошат­сконъёс ортчизы учкись­ёстэк. Отчы вуылӥзы Удмуртиысь спортсменъёс но: Давид Белявский, Юлия Каримова, Антон Синцов но Эльвира Хасанова. Давид Белявский гимнаст зарни медаль басьтӥз командаен ӵо­шатскон дыръя.

31-тӥ августэ 20 ар ортчыса, Америка Афганистанысь войскооссэ пот­тӥз. Афганистанэн кивалтыны кутскизы «Талибан» огазеяськонысь (Россиын алэмын) адямиос.

22-тӥ декабре Европаын чагыр эстӥсь­кон­лы дун 1 сюрс кубометрез понна 2 сюрс евроозь ӝутскиз. Таӵеез ӧй вал на. Мугез: кунъёслэн запасъёссы быремын.

Россиын

Туэысен юртъер котыре газэз дунтэк кыско. Туспуктэм udmurt.ru сайтысь

2021-тӥ ар Россиын ялэмын вал Наукалэн но технологиослэн аренызы.

1-тӥ январьысен Калыклы пуктылыны кутскизы коронавируслы пумит «Спутник V» но «ЭпиВакКорона» вакцинаосты. Бӧрысь вуизы­ «КовиВак», «Спутник Лайт» но «ЭпиВакКорона-Н» вакцинаос.

3-тӥ инвожое Кун Дума юнматӥз юртъёс котыре газэз дунтэк кыскон сярысь программаез. Сое юнматыны куриз Президент ­Владимир Путин. Ужъёс быдэсмо «Газпром» огазеяськон но кун бюджет чотын. Программа быдэсъяськоз 2030-тӥ арозь.

10-тӥ сентябре Йылпумъяськиз чагыр эстӥськонэз Европае вуттӥсь «Северный поток-2» гумыез кыскон. Со кыстӥське Балтийской зарезьлэн пыдэстӥз, Украинае, Польшае, Прибалтикаысь кунъёсы вуылытэк. Кузьдалаез 1 сюрс 200 иськем. Газэз гумыетӥ келяны кутскизы октябрьысен.

17-тӥ сентябрьысен 19-тӥ сентябрёзь Ортчизы Кун Думае быръёнъёс. Нырысьсэ парламентэ быръён радъяськиз 3 нунал ӵоже — коронавируслэсь вӧлмемзэ алон вылысь. Парламентэ шедён понна ­нюръяськиз 14 партия, ужазы 96 сюрслэсь ятыр быръёнъёсъя участокъёс. Парламентэ нырысьсэ шедиз выль партия — «Новые люди». Кун Думаын табере 5 фракция луиз. Та нуналъёсы ик 12 улосъ­ёсын бырйизы на губернаторъёссэс.

15-тӥ октябре Москваысь Н. Гамалеи нимо центр эскерыны кутскиз коронавируслы пумит выль вакцинаез — сое ныре гинэ пызъёно. Тупа со ревакцинацилы, черлэсь уката золгес утиськыны юрттэ. Сое ас вылаз эскериз Президент Владимир Путин.

11-тӥ ноябре Кун Думаын эскеризы QR-кодъёсын герӟаськем ужпумъёсты. Улосъёслы луонлык сётэмын вакцина пуктымтэос понна куронъёсты ­чурытгес карыны. Удмуртиын QR-кодъёстэк пырыны уг луы кинотеатръёсы, бадӟым вуз карон юртъёсы.

17-тӥ декабре Инфляция медаз ӝутскы шуыса, Россиысь банк туэ ар понна 7-тӥзэ ӝутӥз ключевой ставказэ — 8,5 процентозь. Берло 6 ар куспын туэ кадь бадӟым инфляция ӧй вал на — 8,4 процент. Сиён-юонъёслы дунъёс шорлыдын 11 процентлы ӝутскемын, куд-ог вузъёс — 20 процентлы. Дуноязы эстӥськон, эмъюмъёс. Таӵе югдур вань кунъёсын: огъя дуннеысь дунъёсты чаклано ке, берло 10 ар ӵоже соос такем шӧдскымон ӧз ӝутскылэ на вал.

Президент Владимир Путин 2022-тӥ арез ялӥз Калык искусстволэн ареныз.

Удмуртиын

«Вуоноысь гурт» программа улонэз умой пала воштэ.

2021-тӥ ар шаерамы ялэмын вал Гуртлэн ареныз.

1-тӥ январьысен Тӧро Александр Бреча­­­лов кичӧлтэмъя, пыӵаны кутскиз «Вуоноысь гурт» программа. Со сӥземын гуртъ­ёсты котыр ласянь азинтонлы. Пыриськыны быгато 10 сюрсозь улӥсьёсын гуртъёс, ­посёлокъёс. Та программая Вотка ёросысь Пихтовка черкогурт нырысетӥез пилотной проект луиз. Выльдӥськиз магазинзы, ФАП, нылпи сад, кылдӥз стадион, гуртоослы шутэтскон инты.

Программа азинтӥськоз туэ но. Выльдӥськозы Сьӧлта ёросысь Узи но Шаркан ёросысь Быгы гуртъёс. Отӥяз выльдӥськон вуоз эшшо 7 гуртэ. «1 миллион тонна йӧл» улос программа чотын гурт хозяйствоосын туэ пуктэмын 50 пала фермаос. Со пӧлысь 24-ез — ӵыж-выль, 10-эз — вужмем гидъёсты тупатыса. Куд-ог хозяйствоосы нырысьсэ пуктылэмын скал кыс­кись но йӧллэсь сиён лэсьтӥсь роботъёс.

16-тӥ сентябре Ижын сӥё-дано усь­тӥсь­киз выльдэм Национальной библиотека. Сое тупатъянлы 630 миллион манетлэсь трос коньдон кошкиз. 10 ар витёно луиз. Туала библиотекаез вуженыз уд ӵошаты. Выж, вӧлдэт, борддоръёс — музейын кадь. Библиотека 1,5 миллион книгалы корка луиз.

17-тӥ сентябрьысен 19-тӥ сентябрёзь Быдэс Россиын сямен ик, ортчиз куара сётон нунал. Кун Думае депутатъёсты сяна, бырйимы ёросъёсысь муниципал округъёсы депутатъёсты. Интыосысь депутатъёслы висъямын вал 639 мандат, со пӧлысь бадӟым люкетэз — 324-ез — сётэмын «Огъя Россия» партиысь кандидатъёслы.

23-тӥ сентябрьысен 30-тӥ сентябрёзь Радъяськизы ёросъёсысь Депутатъёслэн Кенешъёссылэн нырысетӥ сессиос­сы, ёрос Кенешъёслы йыръёс быръемын. Куд-ог ёрос Кенешъёсы быръемын азь­вылъ­ёсыз ик адямиос, куд-огъёсаз юнматэмын вы­ль­ёсыз.

2022-тӥ ар Удмуртиын ялэмын Тодон-валанлэн ареныз.

Дасяз Елена Никитина

Удмурт Дунне
By Удмурт Дунне 10 января, 2022 11:21