Тодӥськод ке — гажаськод

Удмурт Дунне
By Удмурт Дунне 12 января, 2022 10:08

Вавож ёросысь библиотекаын ужась «Пукон коркалы» 10 ар тырмемен валче татын ортчиз удмурт кыллы, культуралы сӥзем «Кыл. Лулчеберет. Лыдӟиськон» форум.

Вавожысь Татьяна Буркова Вася пиеныз мадизы, кызьы пичиысен анай кылэз яратоно. Туспуктӥз Максим Егоров

Форумлэн ужаз пыриськизы ёросысь дышетӥсьёс, активистъёс, нылпиос но Ижысь куноос: «Удмурт дунне» газетлэн редакторез, Удмурт нылкышно кенешлэн кивалтӥсез Елена Миннигараева, Россиысь Писательёслэн союззылэн ёзчиез, Ашальчи Оки нимо литературной премилэн лауреатэз Лидия Нянькина.

10 ар ӵоже ини Вавож ёрос библиотекаын «Удмурт корка» ужа. Солэсь пумиськонъёссэ радъя «Удмурт нылкышно кенешлэн» ёросысь ёзэзлэн кивалтӥсез Антонида Коротаева, со ик одӥгез ужрадэз нуись вал.

Форумын анай кылын но культураен герӟаськем пӧртэм темаосъя туж пайдаё вераськон ӝутскиз. Вавож школаысь покчи классъёсты дышетӥсь Татьяна Буркова аслаз семьяез вылын возьматӥз, кызьы пиналлы пичиысен анай кылэз яратон пыӵатоно. Татьяна Николаевналэн верамезъя, арняяз одӥг нуналэз соос нимысьтыз висъяло удмурт газет-журналъёсты лыдӟонлы. Семьяысьтызы бадӟымъёс «Удмурт дуннеез», «Кенешез» лыдӟо, покчиосыз — нылпи изданиосты. Форуме лыктэмъёсты Татьяна Николаевналэн Вася пиез, арганэн удмурт крезьгуръёсты­ быдэстыса, шумпоттӥз.
Ка­мен­ный Ключ школаысь удмурт кылъя дышетӥсь Елена Рублёва озьы ик пыр-поч мадиз пиналъёсты удмуртлык, удмурт кыл котыре кыскон амалъёсыз сярысь. Нош Вавожысь культурая юртлэн чеберлыкъя кивалтӥсез На­талья Красильникова удмурт кырӟанъёслэн аспӧртэмлыксы, чеберлыксы сярысь вераз.

Люкаськемъёслы туж тунсыко потӥз удмурт калыклэн сям-йылолъёсыныз но тодматскыны. Вавож ёросын гинэ но со сямъёс гуртэн-гуртэн висъясько. Та сярысь веразы «Гербер» ансамбльлэн кивалтӥсез Ольга Сурчакова но «Бӧляк» ансамбльлэн кивалтӥсез Валентина Снигирева.

Нош Ӟозлудысь кибашлы, удмурт дэремъёс вурись Нина Лебедева трос тунсыкозэ мадиз Вавож палан улӥсь удмуртъёслэн дэремъёссы сярысь. Сьӧраз со быдэс шыкыс пӧртэм аръ­ёсы вурем удмурт дэремъёс ваем. Кызьы вашкалазэ туала кароно? Кыӵе амалъёсты вуриськыкузы кутӥллям азь­выл нылкышноос? Нина Фёдоровнаез калык кема гинэ кылзӥськыны дась на вал.

Форумез йылпумъяса, писатель Лидия Нянь­кина мадиз на туала удмурт литературалэн аспӧртэм­лыкъ­ёсыз пумысен. «Удмурт дунне» газетлэн редакторез Елена Миннигараева — адямилэн улоназ удмурт газетлэн интыез сярысь. Татын ик удмурт газет-журналъёслы гожтӥськыны луиз.

Форум йылпумъяськиз та­бань-перепеч веръя­­­н­эн.­ Уноез пусйизы, та­ӵе ужрадъёс одно кулэ. Соос калыклэсь дунневаланзэ па­сь­кытато, адямиос асьсэ выжызы сярысь тросгес тодыны, таин валче удмурт луэмзэс эшшо золгес гажаны кутско.

Елена Васильева

Удмурт Дунне
By Удмурт Дунне 12 января, 2022 10:08