Тигръёс небытэсь, пуштресэсь, но вешаны соосты уг яра

Удмурт Дунне
By Удмурт Дунне 10 января, 2022 11:35

Шундыӝужан гороскопъя 2022-тӥ ар Тигр­лэн арез шуыса лыдъяське. Кыӵе со луоз? Тодыны выриськомы та сьӧсь пӧйшурлэн сямъёсызъя, выросъёсызъя. Тигръёс асьме палъёсын ӧвӧл, но соосты адӟыны быгатӥськомы Ижысь зоопаркысь.

Бурд улаз басьтӥз

Зоопарк ӧсъёссэ вӧлъяз 2008-тӥ арын 10-тӥ сентябре. Отчы нырысь ик вуттӥзы Урсула нимо мумы тигрез. Со амурской (уссурийской) выжыысь — пыртэмын дуннеысь Горд книгае. Инкуазьын, зоопаркъёсын-заповедникъёсын ­кылемын на 500 котыр. Россиын пыӵатэмын амурской тигръ­ёсты утёнъя но соослэсь лыдзэс йылтонъя нимысьтыз программа.

Урсулаез вайизы Пермь­ысь зоопаркысь. Бадӟым луы­тозяз со анаез бордын вал. Нош выль интые вуиз но, огназ кылиз. Адямиослэсь кышкатскылӥз, кузь вазерпиньёссэ поттыса, шоразы ыргетылӥз. Сиськыны, чылкыт омырысь вольераз потаны пумитъяськылӥз. Ньыль сэрего висъетаз уен-нуналэн пукылӥз. Зоопарк­ысь ветеринаръёс валатскизы: тазьы ик улӥз на ке, Урсула кема уз чида, анаезлэсь мӧзмыса, быроз.

Зоопаркын улэ Марс тигр. Туспуктӥз Максим Егоров.

Ӝоген вуттӥзы Москваысь зоопаркысь амурской выжыысь ик Марс нимо айы тигрез. Таиз будэтэмын адямиосын — анаез бордысь пичи дыръяз ик люкемын. Марс чылкак мукет: адямиослы матэ кариськись, нуныяськыны яратӥсь. Небыт куараен ваземез кылэ ке, кутске ук лӧптылыны, вольераз погылляськыны!

Марс но Урсула огкыл ӝог шедьтӥзы. Айы тигр Урсулаез бурд улаз басьтӥз. Ӝоген мумы тигр потаны ӧдъяз вольере. Отын Марсэн бызьылӥзы, шудӥзы. 2011-тӥ арын соослэн кыкто пиоссы вордскизы. Кӧня ке ар ортчыса — эшшо одӥгез. Ваньзы тазаесь, чебересь. Айыосыз келямын вал Красноярскысь, Белоруссиысь зоопаркъёсы, одӥг мумыез — Великобританиысь заповеднике. Зоопаркысь специалистъёс огымысь верало: Урсулаен Марс — кема аръёс ӵоже валче-уртче улӥсь семья кадь. Озьы ке, Тигрлэн араз семья кусыпъёс уката юнманы кулэ.

Зоопаркысь куинетӥез тигр — бенгальской выжыысь Аякс нимо. Таиз тӧдьы гоно, пеймыт-курень гожмо, чагыр синмо. Шораз учкид ке, синъёстэ воштыны уд быгаты — сыӵе чебер. Таӵеос амурскоезлэсь но ичигес кылемын: 100 котыр. Ижысь зоопаркын со али огназ, мумы тигртэк кылемын. Ас вакытаз Мегги нимо мумы тигрен пиоссы но вал: соосты асьсэлэн концертъёсазы кутылӥзы тодмо артистъёс-дрессировщикъёс Запашный вынъёс. Аякслэн но Меггилэн вордскизы 5 пиоссы. Та вакытэ Мегги но пиоссы келямын мукет улосысь зоопарке.

Мумы но айы

Кырын поръямтэ дыръязы та 3 тигръёсты возё нимаз висъетъёсын. Отын мунчоын кадь паськыт лапчаос лэсьтэмын — пӧйшуръёс лумбытэн кыллё, кӧло. Та интыын кема уд чида: нырез чатыртэ кызь зын. Тигръёс угось висъетъёсазы ик педло потало. Аръёсын-аръёсын одӥг интые! Эшшо ке гужемзэ-сӥзьылзэ сомында гонзы куашка — выж вылазы ковёр кадь люкаське. Таӵе омырен шокаса, тазалык лябӟе. Соин ик тигръёсын ужась специалистъёслы уждунзы борды ватсаса коньдон тыриське.

Висъетъёслэн огпал борддорзы вӧлдэтысен выжозь кечат-вамат кортэн кыскемын. Со пыр ик зоотехникъёс чакласа возё та сьӧсьёсты. Чылкыт омырын поръян ­вакытсы вуэ ке, висъетлэн мукет борддорысьтыз педло потон пасез усьто. Чылкак дорысь писэйёслы кадь.

Тигръёсты чаклало 8 зоотехникъёс. Соос ваньзы сямен ик йылпумъямын Ижысь гурт удысъя академиез, дышетскемын гурт пудоез утялтыны. Нош тигр — кыр пӧйшур. Зоотехникъёс тодон-валанзэс будэто библиотекаязы, тигръёс сярысь пӧртэм литератураез лыдӟо. Куд-огез академиын дышетсконзэ азь­ланьтэ — кӧня ке ар талэсь азьло татын кылдӥз аспӧртэм пӧйшуръёсты вордонъя-утялтонъя специализация. Зоотехникъёс вошъяськыса утялто тигръёслэсь висъетъёссэс, сиён но сётъяло, тазалыксэс но чаклало. Шоретӥ висъетын возё Урсулаез, урдэсъёсаз — Аяксэз но Марсэз.

Зоотехникъёс А. Татаркина, А. Поздеева но Ю. Рогожникова тигръёсты утялто. Туспуктӥз Максим Егоров.

— Айыос угось бус­кель висъетъёсын гань-гань улыны уг быгато: ог-огзылэсь зынзэс кылыса, борддор шоры урмемъёс кадь тэтчало, гижыоссэс поттыло, маке кадь ыргето. Висказы мумы тигр ке, соос лачмытэсь, — шуэ тигръёсты эскерись зоотехник Альбина Поздеева.

Аякслэн но Марслэн поръян интызы но кечат-вамат кортэн висъямын. Ӵош луизы ке, ог-огзэс пурозы, сӧсыртозы. Одӥг нуналэ одӥг висъетын ӵошенназы поръяло Урсулаен Марс, мукет нуналаз — огназ Аякс.

— Тигръёсмес ми нылпиосмес кадь яратӥськомы. Урсулаез мусояса Уля яке Улька нимаськомы. Но огпол но вешаммы ӧвӧл, угось соос сьӧсь пӧйшуръёс. Висъетысьтызы кечат-вамат корт вискытӥ но матысен ум учкиське. Шорад шуак тэтчозы, кортлэн пасьёстӥз гижыоссэс лэзёзы но ымнырдэ ӵабъялозы. Тигръёсты кытчы ке мукет интые выжтоно ке, кӧлтӥськом уколэн. Мукет луонлык ӧвӧл. Но таӵе учыръёс огпол, кык пол сяна ӧй вал. Наркоз бере тигръёс 3 нунал пыд вылазы султыны выризы, — шуэ мукетыз зоотехник Александра Татаркина.

Тигръёс инкуазьын уло шорлыдын 15-16 ар. Урсула но Марс мӧйыесь ни: огезлы — 15 арес, мукетызлы —14 арес. Но зоопаркын та пӧйшуръёс кемагес но улыны быгато. Нуналлы быдэ кӧтсэс тыро, нош инкуазьын арнялы огпол сиськизы ке, ярам! Соослы витаминъёс но, паразитъёссэс быдтӥсь эмъюмъёс но сётъяло.

— Сюдӥськомы соосты ӝыт 8 час котырын, — шуэ А. Поздеева. — Быдэн 8 килограмм кунян сӥль сётъяськомы. Номырзэ но уг кельто, лыоссэ но йырйыса быдто. Сӥль пушкы ик витаминъёс ватсаськомы. Айы­осызлы таблеткаосты ватонэз ӧвӧл — сӥль пушкысь уг ик адӟо. Уля валатскисьгес, лэся, — сӥлез пиньыныз куртче, ӝутэ, сэзъялтэ, мукет интые нуыса, сие. Соин ик таизлы витаминъёс сётъяськомы, сӥль пушкы уколэн бышкыса. Малпасько, Улямы кема улонъя рекорд пуктоз.

Елена Слащёва

Удмурт Дунне
By Удмурт Дунне 10 января, 2022 11:35