Пудо сюдон но фортепианоен шудон ог-огзылы уг люкето

Удмурт Дунне
By Удмурт Дунне 10 января, 2022 14:57

Кизнер ёросысь пичи гинэ Бертло гуртын фермер луыса ужа Павел Михайлович Петров. Петровъёслэсь семьязэс быдэс ёросын фермеръёсты сямен тодо. Та ужез ас вакытаз мытӥз атайзы Михаил Семёнович.

Кизнер ёросысь Бертлоысь фермер Павел Петров.

Павел Петров, механической институтын дышетскыкуз, армие ветлӥз, дышетсконзэ заочно амалэн йылпумъяз. Нырысь Ижкарын ужаз, бӧрысь Москваын но кужымзэ эскериз. Тыршись муртлы уж котькытын сюре. Семья кылдытӥз, Семён пиез вордскиз. Павел ӵемгес малпаськылыны кутскиз дор палъёсыз сярысь. Нылпи таза мед будоз шуыса, чылкыт омыр, бакчаысьтыд емыш кулэ, соин ик Петровъёс вордӥськем палъёсазы бертӥзы. Бертло гуртсы пичи ӧвӧл кадь, нош улӥсьёсыз вань на 39 юртын гинэ. Магазинзы ужа, нош ФАП-е но школае ветлоно вӧзысь Безменшуре.

Фермер луэмез сярысь Павел Петров тазьы вера:

— 2009-тӥ арын, Москваысь бертыса, весь вань нормальной адямиос сямен, пилорама басьтӥ. Соку тэль зол куасьмиз бере, пуэн вырыса, барыш поттыны луиз. Собере пумен арендаторъёс вуизы, трос ужаммы ӧз луы ни. Мукет мар ке борды басьтӥськоно шуыса малпай. Атаелэн вал 35 гектар музъемез. Но со музъем аналтэмын вал ни, бусыосын писпу будэ, техникамы сылэ. Гырыны-кизьыны кутски. 5 арлы огпол ке но гыриськод ке бусыез, писпу-куак шуак уг аля. 2016-тӥ арын атаймы улонысь кошкиз, мытэм ужзэ мон азинтӥсько.

Бертлоысь колхоз вазенгес бырем ни, ферма шалтрак буш кылем, мар кортэз вань — ваньмыз сэрттэмын, вузамын. Павел та фермаез кредитэн басьтӥз, пушсэ выльдӥз. Пилорамаын ужаса поттэм коньдонэныз Кибья гуртысь фермерлэсь кунянъёссэ басьтӥз. Соосты будэтыса вузаны малпа вылэм, но сокем пудоосызлы дышемын вылэм ни, вузаны жалям. Али фермаяз кысконо скалъёс но, кунянъёс но вань.

Турын кидыс басьтоно луэ, нош ӟег, чабей, сезьы но йыды кидысэз аслаз бусыосаз будэтэмез тырме.

— Кидыс ӟеч-а, ярантэм-а шуыса сактыны луэ. Азьло агроном вал татын, со валэктӥз мыным, кызьы эскерыны: будоз-а кидыс, уз-а. Сушилкамы ӧвӧл, сортировкамы гинэ вань. Кидыс кот ке луэ, весь бугыръяса возёно. Куазез чак­ласа, кӧс дыръя кутскиськом араны, — ужамзы сярысь вера П. Петров.

Али фермерлэн 550 гектар музъемез. Ӝыныяз турын киземын, мукет ӝыныяз — яровой но озимой культураос. Арлы быдэ ог 300 гектар ю кизе, бусыоссэ черодэн севооборотлы, парлы кельтэ. Павеллы атаезлэн тракторъёсыз кылизы ке но, троссэ техникаез басьтоно луиз ни. Тысьлэсь пудо сиён лэсьтон понна басьтӥз комбикормовой установка. 2 комбайнэз — силос лэсьтон но ю аран, бусыысь пӧртэм ужъёсты быдэсъян тракторъёсыз вань. Асьсэ тысьсы тырме пудооссэс сюдыны, турынзы толйыны но, вузаны но кыле на.

Павел Петров Иван Чайников ужасеныз.

Ужасьёсыз — Бертлоын улӥсьёс — тракторист Иван Чайников но скал кыскись Николай Шахтин. Ужасьёссэ ушъя, тыршисесь шуэ. Гужем ужасьёсыз йыло: пастухъёс кулэ луо. Павел ачиз нокыӵе ужлэсь уг кышка, скал но кыске, скалъёслы кунянаны но юрттэ. Нимысьтыз талы дышетскемез ӧвӧл ке но, уж вылын дышемын: юалляськыса, лыдӟиськыса.

— Фермере кутсконэ капчи ӧй вал, умой ужаны шӧтам гинэ но, семьяямы шудтэм учыр луиз. Урамысьтымы юрт ӝуаку, адямиез тылпуысь поттыкуз, кузпалы бырыны шедиз. 3 пиосмы вал ини соку, пичиез 2 арес кылиз, — вера Павел.

Павеллы анаез юрттӥсь­киз корказэс но возьыны, пиосты но будэтыны. Дыр отчемъя воргорон выльысь кышнояськиз.

Пиналъёсты школае нуллэ автобус, Бертлоысь ог 10 кузя ветло. Арняяз 4 пол Павел машинаен пиоссэ Кизнере крезьгуръя школае нуллэ. Ваньзы дышетско фортепианоен шудыны, со сяна, 12 аресъем Семён шудэ аккордеонэн но синтезаторен, арлы пичи выныз Георгий — баянэн. 8 аресъем Макар но 7 аресъем Миша аккордеонэн шудыны йӧндыро. Паймымон, пыдлось пичи гуртысь коркан сыло фортепиано, синтезатор, аккордеон!

Скалъёсты толалтэ но кыре поттало.

— Нош ӝыт ваньзы ӵош шудыны кутско ке, коть коркась потыса кошкы, но кылзӥськом ни. Мед дышетскозы, — серем пыр вера атайзы.

Пиос ужаны дышыса будо, юрттӥсько атайзылы. Гужем вал вылын пудо возьмало. Бадӟымезлы пиезлы вордскем нуналаз П. Петров кузьмаз пичи тракторзэ. Ачиз но пичи дыръяз со тракторен ужаны дышетскиз вал.

Секыт ужъёслэсь Петровъёслэн семьязы уг кышка, но сюлэмшугъяськонъёссы вань.

— Уж ӧвӧл, соин егитъёс гуртысь кошко, — маде Павел. — Сюресъёс туж аламаесь. Али ваньмызлэн сямен машинаоссы вань. 2 час куспын Ижысь Кизнерозь вуиськом, нош Кизнерысен Бертлоозь 30 иськем гинэ ке но, час пала мыноно. Машинаосмы «Ниваос» но «Уазикъёс». Мукет машина татысь уз поты. Сюрес лэсьтон пумысен трос пол вазиськылӥ ни кивалтӥсьёслы, пайдаез ӧвӧл.

Павелэз гурт калык гажа, угось фермер сюрес возьыны юанъёсын кивалтӥсьёслы вазиськыны кепыр уг вайы. Кылем арын Безменшурысь Быдӟым Вормонлы сӥзем памятникез тупатыны юрттӥз, кайта сюрессэс лэсьтыны малпало.

Городын улонлэсь Павел уг мӧзмы. Яратэ, пельпум сьӧраз пыӵалзэ кутыса, тэлетӥ калтыртыны, вал вылэ пуксьыса, бусыосты котыръяны.

Людмила Чернова

Туспуктэмъёсыз авторлэн

Удмурт Дунне
By Удмурт Дунне 10 января, 2022 14:57