Кошкемъёс берытскозы, шутэтскыны, дышетскыны, эмъяськыны луонлыкъёс паськытазы ке

Удмурт Дунне
By Удмурт Дунне 11 января, 2022 10:33

Гуртлэн арез йылпумъяськиз. Кыӵе пытьы кельтӥз со калыклэн улоназ? Мар возьмано 2022-тӥ арын?

Сиён-юон поттон

Туэ гуртоос понна куазь зэмос экзамен ортчытӥз: кӧс куазь ӧз сёты тырмыт ю тысь кутсаны но пудо сиён йӧнала дасяны. Котьма ке но гурт удысын ужасьёс, кылем арын сярысь, эшшо тросгес сиён-юон поттыны пӧрмытӥзы. Кылсярысь, пудо уллё оглом кулэсмиз ке но, нӧкы вӧй лэсьтэменыз Россиысь улосъёс пӧлын Удмуртия али 5-тӥ интыын, йӧл поттэменыз 6-тӥ интыын, сыр пӧзьтэменыз озьы ик 6-тӥ интыын возиське.

Туспуктӥз Максим Егоров

— Гурт предприятиос но фермеръёс арлы быдэ золгес ужаны тыршо, — вера Правительстволэн Тӧроезлэн воштӥсез Ольга Абрамова. — Туэ 10 толэзь ӵоже 68,4 миллиард манет тыр сиён-юон поттӥзы. Ваньмыз со производствозэс йылтэменызы валче но. Кылсярысь, 6,3 сюрс гектарлы уногес кизизы ю тысь, 1,8 сюрс гектарлы паськытатӥзы етӥн бусыосты, 6,5 сюрс гектарлы йылтӥзы рапсэз. Вуоно арын технической пыш (конопля) будэтыны кутскозы азьланяз сое кунгож сьӧрысь рыноке поттон вылысь. Со сяна, 1,2 сюрс гектарлы уногес мерттыны медо картошка но бакча сиён, ог 10 сюрс гектарлы тросгес — ю тысь.

Ольга Викторовна пусъемъя, туэ дуннеысь рыноке 30 предприятиосмы сюрыны пӧрмытӥзы, оглом 5,54 миллион доллар тыр вуз каризы, 2020-тӥ арен ӵошатыса, со 15 процентлы ятыргес. Али эшшо 13-ез предприятиос бордазы итӥськыны медо, Бразилия, Венгрия, Вьетнам, Германия, Иордания, США, Арабской Эмиратъёс но мукет кунъёс пала учкыло. 2030-тӥ арын вузаськыса 100 миллион доллар поттыны ужпум пуктэмын. Кунгож сьӧрын мыло-кыдо басьто йӧлмес, сӥльмес, курегпузмес, вӧймес, етӥнмес.

— Ар котькыӵе секыт медло, но гуртоос ялан пуктӥсько. Туэ 9 толэзь ӵоже хозяйствоос 5,9 миллиард манет тыр 50 фермаос ӝутӥзы. Ар пумозь оглом 102 объект вуиз. 930 туала техника басьтӥзы. 579 ужан интыос кылдытӥзы. Азинскыны малпасьёслы Гурт удысъя но сиён-юонъя министерство котьку юрттыны тырше. Кылсярысь, берло аръёсы фермеръёслы гинэ 1 миллиард 200 миллион манет висъямын. Вуоно арын гурт туризмен вырыны малпасьёслы юрттэт вуоз. Уксё сётӥськоз гостиницаос пуктыны, шутэтскон интыос лэсьтыны, тӥрлык басьтыны но гуртысь улонэз ӟечомытыны, сюрес лэсьтыны, ву, тыл кыскыны. Со понна 10 миллион манетозь грант басьтыны луоз.

2022-тӥ арын юрттэт висъяськоз личной подсобной хозяйство возисьёслы но. Федерал бюджетысь 285 миллиард манет висъян сярысь вераськонъёс мыно. Субсидия нырысь ик сётӥськоз пудо вордӥсьёслы но йӧл поттӥсьёслы. Зэм, сое басьтон понна котькудӥзлы самозанятой сямен регистрация ортчоно луоз.

Пуктӥськон

Гуртъёсын посёлокъёс ӝу­тон борды басьтӥськемын. Отын ик нылпи сад, магазин, шудон площадкаос но мукет соцобъектъёс луозы. Сюрес, ву, тыл, шуныт кыскозы. Туэ Пичи Пурга ёросысь Орлойын, Глазов ёросысь Кечпигуртын но Сарапул ёросысь Кигбаевоын озьы оглом 46 миллион манет тыр лэсьтӥськизы.

— Гуртъёсты котыр ласянь азинтон кун программая азьланяз но ужаломы, — шуэ Удмуртилэн Тӧроез Александр Бречалов. — Нырысь ик умоятомы сюресъёсты но инфраструктураез. Одно чаклаломы, кытын мае умоятыны луоно, кызьы ужало предприятиос, быгатозы-а соос выль ужан интыос кылдытыны, выт тыронзэс йылтыны. Сыӵеослы эшшо золгес юрттомы. Оскиськомы, гуртэз утьыны луоз, сое котыр ласянь ӝутыса, отысь экономиказэ юнматыса гинэ. Туэ «Вуоноысь гурт» («Деревня будущего») проектъя Вотка ёросысь «Пихтовка» черкогуртэз быдэсак выльдӥмы, татысь соц­объектъёсты туала куронъёслы тупатӥмы. Азьланяз котькуд ёросысь юн гуртъёсысь улон-вылонэз озьы ик умоятомы. Гуртын улыны, ужаны мылкыдзэ калыклэсь ӝутоно. Та ужпумез быдэстыны тыршимы ке, оскисько, 3-4 ар ортчыса, гуртэ берытскисьёс тросгес луозы. Соцобъектъёсы цифровой технологиосты пыӵатӥмы ке, сюбег специалистъёс но уногес кулэ луозы.

Али арлы быдэ ог 6 сюрс адями гуртъёсысь кошке. Пегӟисьёсты берыктон вылысь но гуртъёсын улонэз городын кадь карыны выро.

Туэ 19 ёросын оглом 90 кема возьмам проект быдэсмемын. Кылсярысь, нылпиослы шудыны 16 площадка лэсьтэмын, 18 спортплощадка. 86 гуртэ связь но Интернет кыскемын. 18 ёросысь 34 сюресъёс выльдэмын. 400 миллион манет тыр 88 туала фельдшер-акушер пункт ӝутэмын. 39 школаос «Точка роста» программая воштӥськизы, отын наукаен, техникаен вырыны тунсыкогес луиз. Гуртъёсын 11 школа но 3 нылпи сад пуктэмын. Азьланяз но пуктӥськон уз кулэсмы. Кылсярысь, Гракын но Якшур-Бӧдьяын кинозалъёс ужалозы. Якшур-Бӧдья ёросысь Тыло но Сьӧлта ёросысь Узи гуртъёсын выль клубъёс ӝужалозы.

Гуртэ ужаны лыктӥсьёс уногес мед луозы шуыса, гуртъёсты котыр ласянь азинтон кун программая хозяйствоос ужасьёссылы пуктӥськыны но кутскемын. Ольга Абрамова пусъемъя, туэ 15 корка ӝутэмын ни, озьы 57 мурт улон условиоссэ умоятыны быгатӥз. Вуоно арын 46 корка пуктыны чакламын, ужасьёслы сое соцнайм амалэн люкылозы. Азьланяз уногес юртъёс ӝутон пумысен ужпум пуктэмын.

Елена Сараматова

Удмурт Дунне
By Удмурт Дунне 11 января, 2022 10:33