Кияса ёросысь Марина Моряковалэн «Быдэсмиз кадь потэ малпанэ» кылбур бичетэз потӥз

Удмурт Дунне
By Удмурт Дунне 11 января, 2022 15:05

Кияса ёросысь Вуж Салья культура юртын «Ми гуртын улӥськом» шуныт пумиськон ортчиз — со сӥземын вал Марина Моряковалэн «Быдэсмиз кадь потэ малпанэ» кылбур бичетэныз тодматсконлы. Та бичетэз поттыны юрттӥз Йӧскалык прессалэн юртэз.

Кияса ёросысь Вуж Сальяысь Марина Морякова книгаосыныз. Туспуктӥз Елена Миннигараева

Ӝытэз усьтӥз гуртысь нылкышноослэн «Даур» ансамбльзы Марина Моряковалэн кырӟанэныз. Пусйыны кулэ, Марина Исаковналэн чуръёсызъя уно кырӟанъёс гожтэмын. Тужгес но тодмоез луэ аслаз крезьгурезъя «Сальяе — вордскем гуртэ» кырӟанэз. Таӵе нимын ик Марина Исаковналэн нырысетӥ кылбур бичетэз потэмын.

Залын пукисьёсты но, ассэ авторез но шумпоттӥзы покчи классын дышетскись нылпиос. Соос кырӟазы, Марина Моряковалэсь чуръёссэ лыдӟизы, эктыса но лэзизы.­ Нылпиосын быгатыса кивалтэ­ дышетӥсь Тамара Мизирева.

Марина Исаковна печатлаське «Удмурт дунне» газет бамъёсын, пӧртэм ужрадъёсы но ӵошатсконъёсы мыло-кыдо пыриськылэ, вормонъёс басьтылэ. Со пумысен вераськиз «Удмурт дунне» газетлэн валтӥсь редакторез,­ «Удмурт нылкышно кенеш» огазеяськонлэн тӧроез Елена Миннигараева. Со пусйиз:

— Туэ «Удмурт нылкышно кенеш» огазеяськонмы гуртын улӥсь нылкышноослэсь «Нылкышно дауре» кылбур бичетсэс поттӥз. Марина­ Исаковналэн отчы но ­кыл­буръёсыз пыризы. «Быдэсмиз кадь потэ малпанэ» книгаез но тани киямы вуиз. Анайлы сӥзем кылбурез сюлэмез вырӟытэ. Марина Исаковна одӥгаз кылбураз шуэ: «Эн сётскелэ секытлы, секыт луэ огдырлы…» Шонер но интыяз верамын.

Марина Исаковна удмуртлык понна висе, вашкалаосмылэсь сям-йылолъёссэс но анай кылмес утён бордын тырше. Уно аръёс ӵоже культура удысын ужаз, семья клублэсь ужъёссэ радъялляз. Далай гинэ ни гуртазы «Нылкышно шуд» клубен но арлыдоослэн огазеяськонэнызы кивалтэ.

Марина Исаковна сярысь шуныт кылъёс вераз «Удмурт Кенеш» огазеяськонлэн Кияса ёросысь ёзэтэзлэн ёзчиез Римма Лопатина:

— Со ик кибашлы но, ужбергатӥсь но, гожъяськись но, спортэн эшъяськись но, Ашальчи Оки нимо премилэн лауреатэз, «Удмурт дунне» газетлэн «Гурт адями» конкурсаз вормем мурт. Солэн пӧртэм ужъёсыз альбомъёсын люкамын, 3 нылпиослэн адӟем карымон анайзы. Туэ сое «Анайлэн данэз» гадьпусэн данъязы.

Ӝытэз нуизы Вуж Салья шор ёзо школаысь удмурт но ӟуч кылъёслы дышетӥсь Семён Вахитов но библиотекарь Наталья Пелагина. Семён Сергеевич пыр-поч тодматӥз гуртлэн историеныз. Туэ Вуж Сальялы тырме 394 ар. Оскон кылдэ, гуртазы шор ёзо школазы, медпунктсы, культура юртсы (со туж чебер выльдэмын) вань бере, гурт улоз, нылпиос анай кылынызы али кадь шалтыр гинэ вераськозы, удмурт сям-йылолъёсты адӟыса будозы.

— Марина Исаковна школаямы ӵем ветлэ, тазьы каром, озьы лэсьтом шуыса, милемыз бугыръя. Быгатэ со адямиез ӝутыны но бурдъяны, малпам ужзэ йылаз-пумаз вуттыны. Малпаз книгазэ поттыны — поттӥз, — шуиз Семён Вахитов.

Любовь Тихонова

Удмурт Дунне
By Удмурт Дунне 11 января, 2022 15:05