Варматаеныз бызьылэ

Удмурт Дунне
By Удмурт Дунне 11 января, 2022 10:56

Ижысь тылпулэсь утиськонъя 3 номеро частьын спасатель луыса ужа Владимир Никитин. Спортэн эшъяськемез но калыклы юрттыны мылкыд каремез вуттӥзы сое спасательёс дӥне.

Владимир Никитин пичиысен чырткем будӥз. Шаплы бызьылыны быгатэмзэ дыраз синйылтӥз Пичи Пурга ёросысь Вуж Мӧнья школаысь физкультураен дышетӥсь Георгий Никифоров (жаляса верано, али ӧвӧл ни). Володяез 5-тӥ классысен куасэн бызьылонъя секцие гожтӥз. Нош 7-тӥ классысен В. Никитин Удмуртилэн сборнояз шедиз ни. Со дырысен ялан спортэн­ эшъяське. Али быгатонлыкъёссэ кыдатыны юрттэ нырысетӥ тренерезлэн Александр пиез.

Ижысь спасатель Владимир Никитин Россиысь тылпу кысӥсьёслэн ӵошатсконазы 3-тӥ инты басьтӥз. Туспуктӥз Валентина Кутузова.

Спортэн эшъяськемез ик В. Никитинлы улонын сюрес бырйыны юрттӥз. Нырысь ик тодон-валан люказ Можгаысь ветеринарной колледжын, со­бере­ Саратовысь Н. Вавилов нимо аграрной университетын. Дышетскон вакытаз куасэн бызьылонъя спортъя мастерлэсь куронзэ быдэстӥз.

Егит специалист, уж утчаса, кема ӧз ветлы. Туннэ кадь ик малпаназ возе нырысетӥ ужан нуналзэ. Владимир Никитинлы соку спасательёс ки­ноысь супергеройёс кадь потӥллям. Табере ачиз но соослэсь номырин уг висъяськы. Спасательлэсь ужзэ быдэсъям­ сяна, тылпу кысӥсьёслэн пӧртэм ӵошатсконъёсазы пыриське: куасэн но пыдын бызьылэ. Туэ сӥзьыл со Удмуртиысь тылпу кысӥсьёс пӧлын устоез луиз но шаермылэсь данзэ утиз Россиысь пожарнойёслэн вожвылъяськоназы. Отысь 3-тӥ интыен бертӥз.

— Тылпу кысон удысын 6-тӥ арзэ гинэ ай ужасько бере, ӵошатсконын призёръёс пӧлы шедемелы шумпотӥ, — шуэ Владимир Никитин. — Вожвылъяськонэ пыриськизы улосъёсын вормисе потэм 12 пожарнойёс. 1-тӥ нуналаз спортэн эшъяськеммес­ возьматӥмы, 2-тӥ нуналаз — тылпу кысыны быгатэммес. Таиз ик секытгес сётскиз. Боевой дӥськутэз ӝог дӥсяно-кылёно, шуг-секытъёсын полосаез ортчоно, теориез тодоно, нырысетӥ юрттэт сётоно…

Ӵошатсконысь бертыса, Владимир Никитин валаз: тодон-валанъёссэ будэтоно на. Табере боевой дӥськутсэ ӝог дӥсяны, соин бызьылыны дышетске. Нуналлы быдэ мугорзэ кыдатэ, куд-ог дыръя бордаз итӥськыло Ольга кузпалыз, Яна но Максим нылпиосыз. Бызьылэмзэ сак эскерыса возе варматаез — Пичи Пурга ёросысь Улын Юри гуртын улӥсь Олег Матвеев. Вань улонзэ колхозын ужамын, ас вакытаз ёросысь устоез комбайнёр но кужмоез спортсмен вал. Ачиз но эмес­пиез куспын ӵошатсконъёс радъялля. Таӵе «тренер» вань дыръя егит спасатель доры вормон одно ик вуоз.

Валентина Емельянова

Удмурт Дунне
By Удмурт Дунне 11 января, 2022 10:56