Лыдпусъёс сьӧрын — адямиос

Удмурт Дунне
By Удмурт Дунне 29 ноября, 2021 10:35

Депутатъёс вуоно арлы бюджетэз чаклало, ӟечезлы оскыса

23-тӥ ноябре Кун Кенешысь депутатъёс люкаськылӥзы 36-тӥ сессиязы. Эскеремын 23 ужпум, со пӧлысь 10-эз герӟаськемын элькун законъёсын. Бюджет пумысен мылкыдзэ вераз Удмуртилэн Тӧроез Александр Бречалов.

Тазалыкез утён но нылпиос

Сессиын эскерем ужпумъёс пӧлын валтӥсез луиз 2022-тӥ арлы но 2023-тӥ-2024-тӥ аръёслы элькунмылэсь бюджетсэ эскерон.

Депутатъёс азьын Александр Бречалов шуиз:

— Эмъясьёс 2-тӥ арзэ ни секыт вакытъёсты чидано луо. Тазалыкез утён удыслы вуоно арын элькун бюджетысь 13,357 миллиард манет висъяны чак­ласьком, туэ сярысь, со 6,5 процентлы тросгес. Нимысьтыз саклык — ковидэн нюръяськонлы. Тазалыкез утёнъя министерство чаклаз: талы 6,4 миллиард манет кулэ луоз. Но ум вунэтэ эмъян юртъёс пуктон, больницаосы выль эмъян тӥрлык, транспорт басьтон сярысь но, озьы ик пыриськомы нацпроектъёсы, федерал но улос программаосы.

Удмуртилэн Тӧроез нимысьтыз вераз сирота нылпиослы улон инты висъян пумысен но. Туэ федерал казна чотын шаерысьтымы анай-атайтэк кылем 205 муртлэн аслаз липетэз кылдоз. Со сяна, Сюмсиын сиротаослы 18 квартираен юрт ӝутӥське.

Кун Кенешысь депутатъёс сэрттӥзы-пертчизы вуоно арлы бюджетлэсь проектсэ.
Туспуктэм udmgossovet.ru сайтысь.

— Элькун бюджетысь туэ ватсаса 130 миллион манет висъямын сиротаослы улон инты басьтыны юрттон вылысь, со 102 мурт кус­пын люкемын луоз, — ватсаз А. Бречалов. — Нош вуоно арын талы 642,5 миллион манет чакласьком ни. Уката бадӟым саклык висъяськыны кутскоз школаосын но нылпи садъёсын кышкытлыклэсь утиськонлы — отын табере ужалозы нимысьтыз дышетскем охранникъёс. Вуоно арлы бюджетын талы 1,3 миллиард манет чаклаське.

Коньдон люкылон

Элькун бюджетлэсь про­ектсэ депутатъёс азьлапал пыр-поч чаклазы, лыдъязы-чотазы ялан ужась
комиссиосын, фракциосын, проект онлайн амалэн возьматэмын вал калыклы, солэсь мылкыдзэ тодон вылысь.

Проектэн тодматыса, коньдон ужпумъёсъя министрлэсь ужзэ быдэсъясь Вера Сухих пусйиз:

— 2020-тӥ арын кризис бере элькунмылэн экономикаез пумен юнманы кутскиз, пандемия кышкытлык кылдытэ на ке но. Соин ик 2022-тӥ арлы бюджетмы ковидлэсь азьло бюджетъёслы матын луыны кулэ ни. Проектын солэн доход люкетэз 84,563 миллиард манет учкемын — 2021-тӥ арын бюджетлэн проектэзлэн доход люкетэзлэсь со 29 процентлы тросгес. Озьы ик пусъемын, федерал казнаысь 18,1 миллиард манет вуыны кулэ шуыса. Но та лыдпус умой-умой тодмо луоз Кун Думаысь депутатъёслэн федерал бюджетэз 2-тӥ лыдӟемен юнматэмзы бере гинэ. Соин ик со воштӥськыны быгатоз.

Вера Сухих тупен-тупен вераз, кыӵе удысъёслы кӧня уксё висъяны чакламын.

Социальной удыслы — бюджетлэн бадӟымез люкетэз. Кылсярысь, 29,7 миллиард манет кулэ луоз бюджет удысын ужасьёслы уждун тырыны. Коньдон чакламын ни дышетӥсьёслэсь, врачъёслэсь, соцработникъёслэсь но куд-ог мукет категориосы пырись ужасьёслэсь 2022-тӥ арын 1-тӥ октябрьысен уждунзэс будэтыны. Со сяна, 2022-тӥ арын 1-тӥ январьысен 4 процентлы йылоз МРОТ но. Ужасьтэм муртъёс понна
медицина страхованиея фондэ чакламын 7,6 миллиард манет келяны.

Дышетон удыслы ог 24,209 миллиард манет кошкоз — дышетӥсьёслы, воспитательёслы уждун сяна, татчы пыртэмын классэн кивалтэм понна выплатаос.

Тазалыкез утёнлы 14,539 миллиард манет пала учкемын — элькун бюджетын чаклам уксё борды 2,2 миллиардлэсь ятыр вуыны кулэ на федерал казнаысь. Кылем арын бюджетлэн проектаз сярысь, со 25 процентлы тросгес. Вуоно арын тросгес уксё луоз реабилитацилы, санаторийёсы путёвкаослы, профилактикалы.

Демографилы ог 8,202 миллиард манет чакламын — 77 процентлы тросгес. Уката бадӟым саклык висъяськоз анайлэсь но нылпилэсь тазалыксэс утёнлы.

Культура удыслы 1,481 миллиард манет пала кошкоз, со пӧлысь тужгес тросэз — калык творчестволы, искусстволы, гуртъёсы культурая юртъёс пуктонлы.

Спортлы, мугорез кыдатонлы вуоно арын шӧдскымон тросгес уксё висъяськоз — туэ 533,6 миллион манет чакламын ке вал, вуоно арын 718,1 миллион манет луоз.

Гурт удыслы кошкоз 2, 750 миллиард манет пала, со пӧлысь 1,231 миллиард палаез — федерал бюджетысь.

Инкуазез утёнлы кылем арынлэсь 62 процентлы тросгес уксё висъяськоз.
237,9 миллион манет тырмоз Вотка водохранилищеез сузяны, Кам но Камбарка шуръёслэсь гожъёссэс чакланы но мукет.

Муниципал округъёслы 27,708 миллион манет тыр юрттэт луоз.

Федерал казнаысь чаклам коньдонэз но лыдэ басьтыса, 2022-тӥ арлы элькун бюджетлэн расход люкетэз 85,377 миллиард манет луыны кулэ, дефицитэз — 814 миллион манет — таӵе лыдпусъёсын со юнматэмын 1-тӥ лыдӟем бере.

Но Кун Кенешлэн Тӧроез Владимир Невоструев верамъя, уж таин ӧз йылпумъяськы. 2-тӥ лыдӟемен юнматон азьын фракциос, ялан ужась комиссиос ӵектонъёсынызы потыны быгатозы на.

«Огъя Россия» фракциен кивалтӥсь Елена Дербилова, кылсярысь, вераз: бырйисьёслэсь вань куронъёссэс лыдэ басьтыны тыршоно — данакез соос герӟаськемын гуртъёс­ты азинтонэн, транспортэн, калыклы спортэн эшъяськыны луонлыкъёс кылдытонэн. Соин ик ватсаса уксё сюриз ке, та сярысь вунэтоно ӧвӧл.

«Справедливая Россия» фракцилэн кивалтӥсез Фарид Юнусов чотам: шаерамы кислород поттонэз радъян ог 450 миллион манет тыр луыны быгатоз. Нош палэнысь басьтоно ке, ар ӵоже ог 900 миллион манет кулэ луоз — ӵапак сомында уксё чакламын бюджетлэн проектаз. Озьыен, асьме производствоез радъяса шыръям коньдонэз мукет азе кутыны луоз.

Элина Кумачёва

Удмурт Дунне
By Удмурт Дунне 29 ноября, 2021 10:35