Кылэз волято «Кенеш» но «Удмурт дунне»

Удмурт Дунне
By Удмурт Дунне 15 ноября, 2021 10:18

Куарусён толэзе Ижкарысь Космонавтъёслэн парказы усьтӥськиз удмурт сэрег. Та ужрадын синйылтӥ туж ӝикыт, кельышлы удмурт дӥськутэн коллективез. «Инкрезь» вылэм со. Ми, пе, быдэс коллективенымы «Кенеш» журналэз басьтӥськом.

Ижысь «Инкрезь» коллектив Инмарлы сӥзем кырӟанъёсты яратэ.

Нырысь тодматски кивал­тӥсьёсынызы, Александр но Тамара Пудовъёсын. Соос верало:

— Коллективмы кылдӥз 2003-тӥ арын, огез черк бордын «Кылдысин» нимын. Бӧрысь кенешыса огъя малпанэ вуимы, «Инкрезь» ним тупагес шуыса. Репертуармы милям висъяське мукет кыр­ӟасьёслэсь: ми Инмар ся­рысь кырӟанъёсты быдэсъяськом.

Коллективазы 15 мурт, соос пӧртэм ужрадъёсы мыло-кыдо ветло, гуртъёсы концертъёсын-пумиськонъёсын потало. Финляндие, Эстоние вуылэмзы уката мылкыдзэс ӝутэм: татын удмурт кырӟанъёсты пӧсь кичабонъёсын пумиталлям, яркыт удмурт дӥськутлы синмаськиллям.

Александр Елизарович арганэн шудэ. Шуэ:

— Мон Кизнер ёросысь Ижкаре вуи 8 аресам, утыр удмурт кылэз вунэтэм кадь луи. Нош та коллектив пичи дырысь кылем тодэ ваёнъёсме­ бугыртӥз. Кутски «Кенеш» журналэз но «Удмурт дунне» газетэз лыдӟыны, озьы кылы воляз. Ми Михаил Атамановен берыктэм удмурт Библиез лыдӟиськом.

Тамара Михайловна — коллективлэн шорсюлмыз: жингрес куараё, чупрес сямо, капчи мылкыдо. Уж дураз но удмурт шӧм пыӵатэ — Ижкарысь 175-тӥ нылпи садын «Ми Удмуртиын улӥськом» проектсэ азинтэ. Со улсын пиналъёс тодматско шаермылэн историеныз, удмурт кырӟанъёс но кылбуръёс дышето, пӧртэм ужрадъёсы пырисько.

Людмила Чернова

Удмурт Дунне
By Удмурт Дунне 15 ноября, 2021 10:18