Котькудӥзлэн аслаз куараез

Удмурт Дунне
By Удмурт Дунне 18 ноября, 2021 12:08

«Италмас» ансамбльлы — 85 ар

Удмуртиысь кырӟанъя но эктонъя А. Мамонтов нимо «Италмас» академической ансамбльысь артистъёслэн шумпотыны но данъяськыны мугзы 2 полэс: соос Удмурт Элькунлэн Данъян пул вылаз пыртэмын но ансамбльзылы 85 ар тырмиз.

Калык эшъяськон орденэн данъям коллектив юбилейзэ пусъе Удмуртиысь филармонилэн сценаез вылын — ӵапак туннэ, 18-тӥ шуркынмонэ, «Италмас» бадӟым концерт возьматоз. Ансамбльлэн чеберлыкъя кивалтӥсез Владимир Фирстов верамъя, артистъёс шумпото, та ӝытэ соос сцена вылын кырӟало-экто шуыса, пандемиен сэрен уно концертъёссы, гастрольёссы мукет дырлы выжтэмын вал уго.

«Италмас» ансамбльысь артистъёс Мария Романова, Алевтина Медведева,
Максим Рябухин, Людмила Ахтариева но Полина Невоструева.
Туспуктӥз Максим Егоров.

— «Италмас» — шаерысь­тымы нырысетӥез но одӥг гинэ академической ансамбль, кудӥз, совето аръ­ёсысен быдэс кун тыр жингыртыса, туннэ но учкисьлэсь сюлэмзэ вырӟытэ, калык культураез, искусствоез уте но азинтэ. Ансамбль — со нырысь ик яркытэсь, кужмоесь артистъёс. Та дыр ӵоже «Италмаслэсь» данзэ будэтӥзы Евгений Серебренников, Геннадий Кузнецов, Анна Прокопьева, Владимир Валуйкин, Евгения Медведева, Леонора Мамонтова, Николай Поздеев но трос мукетъёсыз. Улон азьлань мынэмъя ансамбль егитоме. Берло 5 ар куспын гинэ балетэ 8 эктӥсь вуиз, оркестрамы 5 мурт лыктӥз, хоре — 5 артист. Мон пусйысал, «Италмас» али висъяське зол кырӟасьёсын но шаплы эктӥсьёсын. Юбилей концертэ лыктэмъёс но сое шӧдозы-адӟозы. Концертын 85 процентэз номеръёс ӵыжак-выль луозы. «Италмаслэн» визитной карточкаез — «Гырлыосын эктон» — озьы ик возьматӥськоз, сое котькуд концертын куро. Та эктонлы 50 арлэсь кема ини, но калыклы со уг акыльты. Отын котькуд гырлылэн аслаз куа­раез, соин ик та эктон весь паймытэ, — шуэ Владимир Фирстов.

«Италмас» ансамбльлэсь юбилей концертсэ азьланяз адӟозы быдэс шаерамы но солэн палэназ — артистъёс гастрольёсы дасясько.

Удмуртиысь калык артисткаос Людмила Ахтариева но Алевтина Медведева «Италмасын» 30 арлэсь кема ужало ни. Соос юбилей концертъёслы дышемын. Но артисткаос сюлмасько, выль кырӟанъёсты дышетыны дыр ичи вал шуыса.

— Нырысь тодмо ӧй вал, концерт луоз-а, уз-а. Но табере мылкыдмы бурдъяськемын, учкисьёсмылэсь мӧзмим ни, ваньмыз мед пӧрмоз вал, — шуэ Алевтина Медведева.

Людмила Ахтариева но выль кырӟанъёс дышетӥз:

— Мон быдэсто «Огазе луытэк» но «Яратон уг пересьмы» кырӟанъёсты, юбилей концертэ лыктэмъёс соосты дунъялозы-яратозы, малпасько.

Юбилей кузьымъёстэк уг луы. Туннэ «Италмасын» 75 адями ужа. Троссэ артистъёсты сӥлы карозы пӧртэм данъян грамотаосын. Нош эктӥсьёс Ольга Карпова но Игорь Микрюков Удмуртиысь дано артистъёс луизы. Палэнэ уг кылё «Италмасын» азьло ужам адямиос но. Шутэтскыны потэм артистъёссы али 22 кузя, соосты уг вунэто. Туннэ но арлыдо эшъёссы ӧтем куноос радын концерт учко.

Галина Семёнова

Удмурт Дунне
By Удмурт Дунне 18 ноября, 2021 12:08