60 арессэс ортчемъёсты утёно!

Удмурт Дунне
By Удмурт Дунне 20 октября, 2021 13:06

Калыклы улон-вылонын юрттэт сётон удысысь 67 процентэз ужасьёс прививка басьтӥзы ини. Тужгес трос вакцина пуктэмын шаерысьтымы мӧйыослы но инвалидъёслы чаклам интернатын тыршисьёслы — 85 процент.

Али прививка пуктыло стационарын кыллись сӧсыръёслы но арлыдоослы. Пандемия кутскем бӧрсьы калыклы улон-вылонын юрттэт сётӥсьёс отын мукет сямен ужаны кутскизы: сменаоссы кыстӥсько 2 арня, та дыр кусыпын соос доразы чик уг бертыло. Кылсярысь, Сарапулысь лулсэрез йӧнатонъя интернатын али та амалэн дежурствозэ нуэ 87 адями. Мукет ёросъёсысь но городъёсысь 8 интернатъёсын-филиалъёсын ужало пандемиялэсь азьвыл сямен ик.

Туннэ 95 процентэз юрттэт басьтӥсьёс прививка пуктӥзы ини. Калыклы улон-вылонын юрттэт сётон политикая но ужъя министр Татьяна Чуракова пусъе:

— Ми вань кужыммес сётӥськомы, 60 арессэс ортчемъёс коронавирусэн висьыны медаз кутске шуыса. Кышкыт черен нюръяськыны 1 амал гинэ вань — вакцинация. Соин ик та ужез рос-прос радъяломы.

Ольга Корепанова

Удмурт Дунне
By Удмурт Дунне 20 октября, 2021 13:06