Туэ ю-нянь 30 процентлы ӧжытгес

Удмурт Дунне
By Удмурт Дунне 7 сентября, 2021 13:03
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Бусы ужъёс пумен йылпумъясько. Люкаськем урожайзы шоры учкыса, уноез хозяйствоос ӝожомо.

Ю тысь ваньмыз сямен калтэмын ни. 1-тӥ сентябрьлы утялтэмын ог 276 сюрс гектар бусыос, со 98 процентэз луэ. Ог 40 сюрсэз пудо сиёнлы но калтыны ӧз яра — пӧсь шунды шорын выжыозяз сутскиз. Оглом кутсамын 488 сюрс тонна котыр ю-нянь. Куасьтӥзы, сузязы ке, амбаре 10-13 процентлы ӧжытгес пыроз ай.

Туспуктӥз Елена Сараматова
Бусы ужъёс. Туспуктэмез Елена Сараматовалэн

— Кылем арын урожай 703 сюрс тонналэсь ортчиз вал. Но кӧс аре 488 сюрс тонна люканы быгатэммылы но туж шумпотӥськомы ни. Нырысь 12-13 центнер сяна гектарлы быдэ ӧз люкаськы. Берло нуналъёсы котькуд гектарысь шорлыдын 18 центнер басьтыны быгатӥмы, но 2020-тӥ арын сярысь, со 5,3 центнерлы ичигес. Чабей но йыды гектарлы быдэ шорлыдын 18 центнер сётӥзы, нош сезьы но ӟег шорлыдын 16 центнер гинэ люкаськиз. Но куд-ог ёросъёсын бусыос 8-10 центнер сяна ӧз сётэ. Тужгес трос ю тысь ӝоктӥзы алнашъёс, шарканъёс, уваос но вавожъёс — гектарлы быдэ 20-21 центнер. Арез потыны шаермылы 923 сюрс тонна ю-нянь кулэ. 101 сюрс тонна гуртоос басьтыны быгатӥзы ни. Эшшо ог 519 сюрс тонна шедьтыны кулэ, — шуэ гурт удысъя но сиён-юонъя министр Ольга Абрамова.

Зэм, куд-ог ёросъёслы пӧсь куазь тупаз. Кылсярысь, Сьӧлта ёросын туэ 17,8 сюрс тонна урожай басьтӥзы, кылем арын сярысь, со 1 сюрс тонналы уногес. Нюлэс дуръёсысь бусыоссы интыен-интыен гектарлы быдэ ог 40 центнер но сётӥзы.

Гуртоосты пӧсе вуттӥз рапс. Со 18 сюрс гектар вылэ киземын вал. 56 процентэз рапс утялтэмын ни. Но гектарлы быдэ 6,9 центнер сяна уг люкаськы, миым сярысь, со 9,3 центнерлы ичигес. Талэсь но ичи кидыс басьтӥсьёс вань. Кылсярысь, Можга ёросын гектарлы быдэ 1,2 центнер гинэ бичало, нош Сарапул, Грак, Вотка ёросъёсын — ог 3 центнер. Со вакытэ ик уваос но, глазовъёс 14-15 центнер кидыс кутсало. Оглом шаерысьтымы 20 ёросъёсысь хозяйствоос утялтыны пӧрмытӥзы ни ог 3 сюрс 500 тонна рапс кидыс. Куд-огез сутскем бусыосаз ӧз ик пыра ни. Юнме дизтопливо уд быдты, пе.

Ольга Абрамова пусъемъя, алама югдур етӥнэн но. Таиз культура 6 сюрс 736 гектар вылэ киземын вал, 874-ез воксё сутскиз. Ӝыныез утялтэмын ни.

Шаерамы кизем бусыослэн быдӟалазы арлы быдэ кулэсме. Туэ оглом 911 сюрс гектар киземын вал, кылем арын сярысь со ог 10 сюрс гектарлы кулэс. 2016-тӥ арын гинэ 1 миллион 8 сюрс гектарез кизимы вал ай. Ольга Викторовна пусъемъя, тужгес паськыт бусыоссы Можга ёросын — 75 сюрс гектарлэсь ортче. 2-тӥ интыын Балезино но Алнаш ёросъёс — быдэн 53 сюрс гектар. 3-тӥ интыын Ува но Пичи Пурга ёросъёс — быдэн 51 сюрс. Но бусылэн быдӟалаез бордысь гинэ урожай уг поты. Министр верамъя, трос ю тысь калтӥсьёс пӧлын Можга, Алнаш, Вавож, Сарапул но Шаркан ёросъёс возисько — 70 сюрс тоннаысен 41 сюрс тоннаозь урожай басьто.

Кӧнялы кулэсмозы вуоно арын бусыос — возьматоз ни 2022-тӥ ар. Нош туннэ гуртоос кыштыр кизё ни. 93 процентаз муосы ю тысь понэмын ни — со ог 54 сюрс гектар. Толлы небӟытыса дасямын 26 процентэз бусыос — 84 сюрс гектар.

Елена САРАМАТОВА

Удмурт Дунне
By Удмурт Дунне 7 сентября, 2021 13:03