Котькуд сюлэмлэн аслаз кырӟанэз

Удмурт Дунне
By Удмурт Дунне 2 августа, 2021 16:11
Кылбурчи Лиля Рыбакова. Туспуктэмез Максим ЕГОРОВЛЭН

Алнашысь Лилия Рыбаковалэн чуръёсыз

Вордскем кылме кылӥ кӧкыысен
Вордскем кылме кылӥ кӧкыысен,
Мыным анай-атай кадь со дуно потэ.
Соин вераськисько пичиысен,
Вордскем кылы монэ азьлань валтэ.

Соин мон вамыштӥ та улонэ
Выжыкылъёс но кылбуръёс вылтӥ.
Мон яратӥ дорме но калыкме,
Кылме гажан мылкыд сюлмам пыртӥ.

Вордскем кылы — калыкелэн кырӟанъёсаз,
Вераськоназ но исаськонъёсаз.
Вордскем кылы — пыдлось потӥсь ошмес,
Со ноку но медаз луы мултэс.

Анаелы
Туж кемалась ӧвӧл ни тон вӧзам,
Нош шуныттэ али но шӧдӥсько.
Котькуд ӵукна тон сайкаськод сюлмам,
Тынад визьмаменыд мон улӥсько.

15 арес дыръям кадь ик туннэ
Тон туж кулэ ук, туж кулэ мыным.
Тонтэк соку уг пот вал улэме,
Али но викышъя на ай сюлэм.

Ортчо аръёс, толъёс но гужемъёс,
Туж кыдёке кылиз ни со нунал:
2-тӥ оштолэзь, кыниськизы синъёс…
Кыли огнам, туж еж на вал, пинал.

Кезьыт тӧлъёс пумит пельтылӥзы,
Кынтылыса лулме но мугорме.
Матысьёсы но эшъёсы юрттылӥзы,
Толалтэе ӧз кельтэ сюлэмме.

Мон табере ачим анай ини,
Анай ке но, анай кулэ вылэм.
Отын тон, мусое, ӟеч кӧл ини,
Огпол ке но коть лыкты уйвӧтам.

Мултэс
Сыӵе чебер тон, йыр ик пороме,
Шорад синмаськыса учкылӥсько.
Ӧд бырйы тон монэ, бырйид эшме,
Эх, кыӵе мон солы вожъяськисько!

— Вождэ эн вай, — шуид мыным толон.
— Мон туж зол синмаськи но яратӥ.
Ми тонэныд эшъёс гинэ кылём,
Монэ нош, курисько, тон вунэты.

Верад но серектӥд капчи, жингрес,
Кошкид, поръян эшме кунултыса.
Валай, куинетӥез луи — мултэс,
Кыли ӝожомыса но гуньдыса…

Тӥ ӵош, тӥ шудоесь, нош мон огнам.
Сыло, кема учко на бӧрсяды.
Кудӟем кадь ӟигартэк берто дорам,
Но ӟардытозь синме уг кыньылы.

Марлы тонэ лэзи мон улонам?
Адӟи гинэ — йырме воксё ыштӥ.
Тылпу ӝуа, гома егит сюлмам,
Мар дауртӥ мон, мар-о дауртӥ?

Капчи ик вылымтэ та дуннеысь
Яратонэз, шудэз пумитаны.
Эшшо секыт вылэм та улонын
Яратыса куинетӥ кыльыны.

Выль ӵукнае
Яратӥсько, ӵукнаосы сайкалляса,
Укноетӥ выль нуналэ учкылыны.
Куддыр отын зоре жалетыса,
Куддыр усе тӧдьы-тӧдьы лымы.

Куддыр отын сайкыт, чагыр инбам,
Куддыр шунды пилем сьӧры ыше.
Та нуналын мон ноку но ӧй вал,
Тон но ӧй вал татын, дуно эше.

Котькуд нунал — со паймымон кузьым,
Кудзэ Инмар кузьма яратыса.
Сётэ со асьмелы сайкан кужым,
Нуэ нуналэтӥ сэзь, валтыса.

Ортчоз нунал но, уй сое воштоз,
Но осконме сюлмам мон возисько:
Выль нуналэн одно ик пумисько
Выль ӵукнае, со ӵуказе луоз.

Алнашез кылбурам данъясько
Юало ке: — Кытысь?
Шуисько: — Алнашысь!
Алнашысь мон,
Отын улӥсько.
Алнашын ужасько,
Нылпиме вордӥсько,
Алнашез кылбурам данъясько.
Лыктэлэ, ӧтисько куное, Алнаше,
Кунолы ми туж шумпотӥськом —
Вӧйнянен, табанен но шулдыр кырӟанэн
Котькинэ ик пумитаськом.

Юало ке: — Кытысь?
Шуисько: — Алнашысь!
Алнашъёс, пе, мактаськисесь…
Со ӧвӧл мактаськон,
Со, эшъёс, данъяськон,
Алнашъёс пала дурбасьтӥсько.
Лыктэлэ куное Алнаше,
Адӟоды соку, кин мактаське.
Тододы, мар сыӵе алнашлык,
Калыкмы милям туж кибашлы.

Юало ке: — Кытысь?
Шуисько: — Алнашысь!
Номырин но уг вошты дорме.
Со одӥг дуннеын,
Со борды думемын
Суйёсы, пыдъёсы но сюлмы.
Мед улоз, азинскоз Алнашмы.
Мед бызёз, жильыртоз Туймымы.
Соосын ӵош улоз, ужалоз калыкмы,
Азьлане валтоз алнашлыкмы.

Юало ке: — Кытысь?
Шуисько: — Алнашысь!
Алнашысь мон,
Соин ик шудо!

Ву шапык
Мар вань пичи ву шапыкын?
Ма, номыриз но кадь ӧвӧл отын.
Нош умойгес ке учкиськод шапык шоры,
Быдэс дунне кадь со пушкын…
Вань улэпез ву котыре бинялскемын,
Со котькытын — инмын но омырын,
Возьёс но нюлэсъёс, гуртъёс, каръёс вадьсын.
Ву шапыкысь вордско шуръёс но зарезьёс,
Солы шумпотыса, пушъё вань будосъёс.
Улон сётӥсь ву шапыкъёс инмысь усё,
Музъем пушкысь вуос, ошмес луса, пото.
Вуэз данъя калык, кылбур гожтэ поэт,
Солы сӥзем выль кырзанъёс вордско,
Бусъёс, лымы, йӧ гурезьёс кылдо.
Ву — чылкытлык, со паймымон кужым,
Сое уд вормы нокыӵе ожын.

Данъя улонэз
Котькуд нуналлэн вань аслаз крезьгурез,
Туннэ крезьгура туж шулдыр со.
Туннэ со данъя улонэз, шундыез,
Кырӟа тон сярысь, мон сярысь со.

Котькуд сюлэмлэн но аслаз кырӟанэз,
Куддыр со задор, куддыр ӝож со.
Улон со сыӵе, мар ини веранэз
Серем но потэ, куддыр — вож но.

Сюлмад ке тросгес чебересь крезьгуръёс,
Соку тон урод кыл уд вера.
Йырад ке уло югытэсь малпанъёс,
Муртлэсь шудбурзэ тон уд тала.

Уд тала. Солы кузьмалод тон ачид
Кырӟан но, кузьым но, мылкыд но…
Мынод улонтӥ туж чебер но капчи,
Шедьтод яратон но, шуддэ но.

Пичи дыр
Пичи дыр сяськалэсь но чебер,
Пичи дыр тулыслэсь но шулдыр.
Со тэтча, серекъя урам тыр,
Соин ӵош шулдырме улосмы.

Пичи дыр, нош марлэсь со меда?
Кампет-печеннялэсь-а, яке
Дэрилэсь, пась штанлэсь-а меда?
Боколэсь кышканлэсь-а яке?

Пичи дыр — со шудон, бызьылон но,
Усьыса, вӧсь луыса бӧрдылон но.
Пичи дыр — со пӧртэм юанъёс:
Ку? Марлы? Собере мар луоз?

Пичи дыр — со сяська но, шунды но,
Со велик-машина но, мунё но,
Со ӵукна шундылэн ӝужамез,
Со шудо анайлэн мынямез.

Эшъяськон
Зэмос эшъяськонэз
Уз тӥялты сильтӧл,
Йӧзор уз пасья,
Юг пужмер уз кынты.

Зэмос эшъяськонэз
Уз сӥятэ аръёс,
Уз соге лымыос,
Тудву уз гылты.

Зэмос эшъяськонэз
Ачиз Инбам кузьма,
Кинэн кулэ, соин
Пумиськытэ, герӟа.

Зэмос эшен гинэ
Кузь сюресэз ортчод,
Солы сюлмысь оскод,
Соин кенеш кутод.

Зэмос эшен потод
Шуг-секытъёс пыртӥ,
Шумпотондэс люкод
Соин котьку шори.

Адямиос
Мыным кельшо зэмос Адямиос,
Соосын вераськыса, улэм потэ.
Котьку капчи мылкыдоесь соос,
Котькуд кылзы сюлэм пыртӥ потэ.
Соос уг пумитало дӥськутъя, тусъя,
Сыӵеослы дуно лулпуш дунне.
Соос одно кариськозы тонъя,
Вуид ке куддыръя шуге-леке.

Мыным кельшо зэмос Адямиос,
Сямзы сыӵеослэн мудрон ӧвӧл.
Алдаськытэк вераськозы соос,
Малпанъёссэс но усьтозы вӧл-вӧл.
Шунды кадь пальпотӥсь адямиос,
Соос сёто оскон, куддыр — бурдъёс.
Шудо ке тон, кык пол шудо соос,
Но жаль, ӧжыт ини сыӵе муртъёс.
Мыным кельшо зэмос Адямиос,
Ӧвӧл ке но, оло, матысь эшъёс.
Чик вӧсь уз каре сюлэмдэ соос,
Ӵемтӥд, усид ке, сётозы кизэс,
Возьматозы выль сюресъёс.

Куддыр кулэ, дыр…
Куддыр шыпыт кулэ, дыр, улыны,
Мултэс куашетытэк, черекъятэк.
Огдэ огед кулэ, дыр, кылыны,
Вераськыны ӟечкын, тышкаськытэк.

Куке кулэ ни, дыр, берытскыны
Инкуазь шоры, Кылдытӥсьмы пала,
Лушкем гинэ солы вӧсяськыны.
Тросэз-а пӧламы сое вала?

Куддыр кулэ, дыр, учкыны мыштэ:
Кыӵе меда бӧрсяд пытьы кыле…
Улон питран, угось, берга, дыртэ,
Пытьыямы кыле тузон гинэ…

Тузон медаз лу, мед пушъёз сяська
Пытьыямы но сюлэмъёсамы.
Сяськаослэсь пурысь мылкыд веська,
Яркыт, шудо луэ та улонмы.

Яратӥсь мурт уз ват
яратэмзэ

Азьлань мынӥсь одно шедьтоз сюрес,
Ужась муртлы котьку но сюроз уж,
Сюлмысь потэм кылбур гожтоз поэт,
Сием потӥсь уз шуы: — Няньды вуж.

Кыллы усто мурт вераськоз чебер,
Пумиськонлы оскись мурт — пумиськоз.
Кинлы кулэ, со люкалоз ваньбур,
Алдаськисез уд эмья — алдаськоз.

Яратӥсь мурт уз ват яратэмзэ,
Жалясь мурт будосэз но жалялоз.
Огез синйылтылоз вань уродзэ,
Нош мукетыз ӟечсэ гинэ адӟоз.

Сётӥсь муртлэн медаз буша киыз,
Оскись муртлэн медаз быр осконэз.
Улонмылэн медаз вуы пумыз
Оскалтытэк зэмос яратонэз.

Мынэсьтым дэремме дӥсяса…
Мынэсьтым дэремме дӥсяса,
Мынэсьтым пыдкукме кутчаса,
Мынэсьтым улонме улэлэ,
Мынэсьтым сюресме ортчелэ.

Собере ини кылалэ-буралэ,
Собере улыны монэ дышетэ,
Собере синъёсам мынам учкелэ,
Лулпушме мынэсьтым валалэ.

Мынэсьтым адӟонме адӟыса,
Мынэсьтым бӧрдонме бӧрдыса,
Мынэсьтым кырӟанме кырӟалэ,
Мынэсьтым юдэсме сиелэ.

Собере ини супыльтэ-вералэ,
Собере тыбырам мынам сялалэ,
Собере пытьыям пож ву кисьталэ,
Мон уг потты вожме.

Шудо луэ!
Шуд кыл вакчи, шуд кыл капчи,
Нош пуштросыз ӧвӧл пичи.
Сое сӥзё, сое витё,
Сое вӧсяськыса куро.

Припев:
Шудо луэ, шудо луэ,
Шуд бурдъятэ, кужым сётэ.
Шудо луэ, шудо луэ,
Ог-огдылы шуд сӥзелэ.

Котькуд корка, котькин доры
Со мед пыроз йыгаськытэк.
Котькуд сюлмын, вань дуннеын
Со мед улоз йӧнаськытэк.

Припев.

Мед шуд пушъёз, сяськаялоз
Лулъёсамы — пушъёсамы,
Мед кырӟалоз, мед гурлалоз
Гуртъёсамы, каръёсамы.

Припев.

Ваньмыз ортче
Ваньмыз ортче, одно ортче ваньмыз.
Ортчоз гужем, сое воштоз сӥзьыл,
Ортче возьман, сое вошто малпаськонъёс,
Ортче мӧзмон, сое вошто лулӟылонъёс.

Ваньмыз ортче, одно ортче ваньмыз.
Ортче нунал, сое воштэ сьӧд уй,
Ортчо янгышанъёс, люкиськонъёс,
Соос сьӧры кылё ӧпкелёнъёс.

Ваньмыз ортче, одно ортче ваньмыз.
Ӝытлань секыт ке, возьма ӵукнаозь,
Выль нуналэн выль валэктон вуоз,
Кӧтӝож ортчоз, но улэмед потоз.

Ваньмыз ортче, одно ортче ваньмыз…

Туспуктэмез Максим ЕГОРОВЛЭН

Удмурт Дунне
By Удмурт Дунне 2 августа, 2021 16:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<