7 бӧляк пумитаз

Ангелина Снигирева
By Ангелина Снигирева 9 июля, 2021 10:46

Татарстанысь Огырчи ёросысь Варклед-Бӧдья гуртын ортчиз Гершыд юмшан, мукет сямен вераса, Гыронбыдтон шулдыръяськон. Ужрадэ люкаськылӥзы Татарстанысь, Удмуртиысь, Марий Элысь, Башкортостанысь но Пермь улосысь удмуртъёс.

Варклед-Бӧдья гуртын улӥсьёс куно пумитанлы 2 арлэсь кема дасяськиллям. Тыршемзылэн емышез, гуртэ пырыку ик, адӟиськиз. Вань куноосты пумитаз гурт азе пуктэм вӧл-вӧл инсталляция, вылаз удмурт кылын «Инмар мед утёз» гожтэм сюлэмез ик буйгатэ кадь. Озьы ас быгатонлыкъёссэ шарае поттыны луонлык сётӥллям гуртысь кибашлы воргоронлы Александр Матвеевлы.

Та гуртын вашкала дырысен йылол-сямъёсты чакласа возё. Вань соослэн вӧсяськон интыоссы но. Гершыд юмшан дыръя но арлыдоос Вӧсь гур кырӟазы, Инмарлы, Куазьлы но Кылдысинлы вӧсяськизы: ю-няньзы мед удалтоз, семьяос куспазы яратыса но тупаса мед улозы, котьма ужын азинлык но удалтонлык куризы, нош висёнъёс, кайгыронъёс но мукет шуг-секытъёс палэнтӥ мед ортчозы.

Гыронбыдтон шулдыръяськонэ лыктӥсьёсты 7 бӧляк пумитаз: Эскак, Микит, Митой (Салим), Шор, Иман, Кадыр но Камит. Пусйыны кулэ, ваньзылэн соослэн асьсэлэн тодмет пусъёссы вань.

— Та ужрадлы юри дасямы бӧлякез утись «Берекет» пус, сое малпаз но пулэсь лэсьтӥз Камит бӧлякысь Александр Матвеев, — шуиз Огырчи ёросысь удмуртъёслэн азьветлӥсьсы Наталья Матвеева. — Сое сётыны малпамы вал ас бӧляксы сярысь умой вераны быгатэм но азбарзэс усто дасямъёслы. Но ваньзы сюлмаськизы, азбаръёссэс лэсьтыны огкадь тыршизы бере, сое гозы кысканын вормись бӧляклы сётыны малпамы. Озьы Кадыр бӧлякмы котькинлэсь кужмо луэмзэ возьматӥз но утись пусмес утӥз. Та бӧляке пырисьёс дорын со быдэс ар куноялоз.

Бӧлякъёслэн азбаръёстӥ­зы ортчемзы бере калык люкаськиз бадӟым сцена доры. Азьвыл аръёсы сямен ик, та шулдыръяськонын тулыс бусы ужъёслы йылпумъянъёс лэсьтӥзы. Гурт, культура удысъёсын ужасьёсты, удмуртлыкез азинтӥсьёсты сӥлы каризы. Отӥяз бадӟым сцена вылын ас быгатонлыкъёссэс возьматӥзы пӧртэм интыосысь вуэм кырӟась-верась коллективъёс, праздникез чебертӥз фольклор кырӟанъя «Айкай» театр.

Варклед-Бӧдья — ошмес син выллем, татысь потэм тросэз удмуртъёс дано луэмын. Со — эмъян удысын ужасьёс Валентина Казанцева но Екатерина Егорова, «Мынам Удмуртие» телекомпаниысь режиссёр Лев Вахитов, «Удмуртия» телекомпаниысь корреспондент Людмила Спиридонова, капчи атлетикая Россилэн чемпионэз Людмила Шакина, дано лэсьтӥськись Полина Иванова, суредась но кибашлы воргорон Александр Матвеев но мукетъёсыз. Удмуртлыкез ӝутонэ мыло-кыдо пырисько «Бӧдья кенакъёс», «Инвис» но «Чингыли» коллективъёс. Микол ошмессы но татын юн пӧзе, ужрадэ вуылэмъёс, тазалык курыса, юзмыт вузэ шӧмъязы.

— Татарстанын улӥсь удмуртъёслэн Гыронбыдтон шулдыръяськонзы улӟытэмын вал 1998-тӥ арын, со дырысен сое пӧртэм ёросъёсын ортчытӥськомы, — шуиз улосысь удмуртъёслэн огазеяськонэнызы кивалтӥсь Андрей Герасимов. — Берло ужрадмес пусйимы 2019-тӥ арын Мамадыш ёросысь Пӧйкагуртын. Удмуртъёс сяна, та шулдыръяськонэ мукет выжы калыкъёс но пырисько, эшлыко мылкыдъёс юнмало.

— Огырчи ёросын 40-лэсь трос выжы калыкъёс уло, вылаз ик, туэ ар Татарстанын Анай кыллэн но калык огазеяськонлэн аренызы ялэмын, — шуиз Огырчи ёрослэн йырыз Азат Валеев. — Удмуртъёс котьку висъясько тыршись, кырӟаны-вераны быгатӥсь сямъёсынызы но капчи мылкыдынызы. Гыронбыдтонлы но соос быдэс гуртэн дасяськизы, Варклед-Бӧдья гурт вакчи дыр куспын чеберскиз.

Бадӟым сцена вылын шулдыръяськон вакытэ ик пӧртэм площадкаос ужазы. Кин ке спортэн эшъяськыны быгатэмзэ эскериз, кин ке кырӟан-веранъя конкурсэ пыриськиз, киужен вырыны мылкыд карисьёс понна пӧртэм мастер-классъёс ужазы. Озьы ик Татарстанысь удмурт егитъёслэн «БиГерд» форумзы ужаз, егитъёс пӧлын «Чеберина» но «Батыр» конкурсъёс ортчизы — отын вормисе потӥзы Балтач ёросысь Алина Калинина но Огырчи ёросысь Роман Матвеев.

Пусйыны кулэ: Гыронбыдтонэз ортчытонлы Татарстан умой дасяськем. Ужрадэ лыктыны мылкыд карисьёс понна Огырчи — Варклед-Бӧдья маршрутъя нимысьтыз автобус висъямын вал, асьсэ азбаръёссэс лэсьтон вылысь бӧлякъёслы коньдон сётӥллям. Вуоно арын Татарстанысь удмуртъёслэн Гыронбыдтонзы ортчоз Бавлы ёросын.

Валентина Емельянова

Ангелина Снигирева
By Ангелина Снигирева 9 июля, 2021 10:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<