Коронавируслы пумит вакцина сярысь юанъёс

Удмурт Дунне
By Удмурт Дунне 13 июля, 2021 16:39
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Коронавирус мугоре сюриз ке но, мугор сое капчиенгес вормоз

Коронавирусэн черласьёслэн лыдзы выльысь йылыны кутскиз. Оскон — вакциналы. Ужпум пуктэмын: нуналаз ог 7 сюрс адямилы прививка лэсьтоно. Нош калык­лэн пӧртэм юанъёсыз кылдо. Валэктонъёс сёто Тазалыкез утёнъя министерствоысь специалистъёс.

Кыӵе вакцинаос та вакытлы шаерамы вань но маин соос ог-огзылэсь пӧртэм луо?

Россиын 3 вакцина пусъемын: «ГамКовидВак» («Спутник V»), «ЭпиВакКорона» но «КовиВак». Туннэ нуналлы элькунамы тырмыт ваемын нырысетӥез. 3-зэ ик вакцинаосты 2 пол пуктоно.

«Спутник V» кылдытэмын эпидемиологияя Н. Гамалея нимо национальной исследовательской центрын. Вакцинаез, 21 нунал вис карыса, пуктоно. Мугорлэн коронавирусэн нюръяськон кужымез юнма, прививка нырысьсэ пуктэм бере 42 нунал ортчыса. Вакцина лэсьтэмын адямилэн аденовирусъ­ёсыз вылын, коронавируслэсь S-белоксэ ватсаса. Ачиз коронавирус отын ӧвӧл, соин ик прививка пуктэм бере ковидэн черланы уг луы.

«ЭпиВакКорона» кылдытэмын вирусологияя но биотехнологияя «Вектор» научной кун центрын. Вакцинае озьы ик кутэмын коронавируслэн S-белокез. Мугорлэн коронавирусэн нюръяськон кужымез юнма, нырысьсэ прививка пуктэм бере 35-40 нунал ортчыса. Кыкетӥзэ пуктоно озьы ик 21 нунал вис карыса.

«КовиВак» вакцина бордын ужаз М. Чумаков нимо научной кун центр. Таяз кутэмын быдэсак вирус, но со улэп ӧвӧл ни, озьыен, адямилы кышкыт уг луы. Пуктоно, 14 нунал вис карыса.

Ку но кинлы прививка пуктыны алэмын?

Прививка уг пуктӥськы:

  • 18 аресозь пиналъёслы;
  • вакциналэн компонентъёсызлы аллергия кылдыны быгатэ ке (марлэсь лэсьтэмын вакцина — учкыны луоз, сое дасясьёслэн сайтазы пырыса);
  • кызыса-кизьнылыса висем бере 2-4 арня ортчемын ӧвӧл на ке;
  • кема кыстӥськись висёнъёслэн лек вакытсы бере 2-4 арня ортчымтэ на ке;
  • нонтӥськыку;
  • кыкетӥ ползэ пуктытэк умойгес луоз, нырысетӥ прививка бере адямилэн мугорыз 40 градуслэсь зол ӟырдаз, аллергиен сэрен шугектӥз ке.

Кытын дунтэк прививка пуктыны луэ?

Вазиськоно улон интыя поликлиникае. Озьы ик али пӧртэм интыосын вакцинацияя пунктъёс усьтэмын.

Сыӵе учыръёсы, куке адямилэн пропискаез одӥг интыын, нош улэ мукет азьын — вазиськоно улон интылы матысь поликлиникае.

Кызьы дасяськоно прививка пуктыны?

Ковидлы антителоос вань-а, ӧвӧл-а мугорын — анализъёс одно лэсьтыны кулэ ӧвӧл.

Прививка пуктон азьын нуналзэ ке но кудӟытӥсь юонъёс юоно ӧвӧл, мунчое, бассейнэ ветлоно ӧвӧл. Уг яра кынтӥськылыны, туж жадьытозь ужаны. Прививка пуктэм бере но кӧня ке нунал та куронъёсты чаклано, трос калык пӧлы потанлэсь возиськоно.

Мар кулэ прививка пуктон понна?

  • Сьӧрады одно мед луоз паспортты, медицина страхованиея полисты но СНИЛС-ты (таиз «Госуслуги» портал пыр электронной сертификат басьтон понна кулэ).
  • Прививка пуктон азьын анкетаысь юанъёслы валэктон сётоно, возьматӥськоно эмъясьлы.
  • Прививка пуктэм бере ӝыны час ке но пуконо на, чаклано, аллергия уг луы-а шуыса.
  • Кыкетӥ ползэ прививка пуктыку, та куронъёсты озьы ик чаклано луоз.

Нырысетӥ но кыкетӥ прививкаослэн виссы кӧня луыны быгатэ?

Виссы 21 нуналлэсь («КовиВаклэн» — 14 нуналлэсь) ӧжытгес медаз луы. 21-тӥ нуналаз ик поликлиникае лыктэмды уг луы ке, берлогес лыктоды. Но 1-тӥез но 2-тӥез прививкаос вискын 1,5 толэзьлэсь трос медаз луы.

Прививка пуктэм бере но коронавирусэн черланы луэ-а?

Вакцина кылдытӥсьёс верало: мугорлэн коронавирусэн нюръяськон кужымез юнма 35-40 нунал куспын, вакцина 2 пол пуктэмын ке.

Зэм, прививка вань дыръя но коронавирусэн одӥг-ог черлан учыръёс луыны быгатозы. Но висён капчиенгес ортчоз. Кылсярысь, прививка нырысетӥ ползэ гинэ пуктэмын ке, висён ог 30 процентлы, нош кыкетӥ ползэ но пуктэмын ке, 90-95 процентлы капчиенгес ортчоз.

Уж сётӥсьёс кужмысь прививка пуктытыны быгато-а?

Коронавируслы пумит вакцина пыртэмын Россиысь прививкаосъя национальной календаре, кунамы улӥсьёс сое ас мылкыд каремзыя дунтэк пуктыны быгато.

Бен, кылдытэмын список, кинъёс нырысь ик прививка пуктыны кулэ, со — эмъясьёс, дышетӥсьёс, калыклы улон-вылонын юрттэт сётон, югдурез утён, вуз карон удысъёсын, МФЦ-осын ужасьёс. Прививка пуктымтэ ке, ку но кызьы ужан сярысь нимысьтыз кенешоно луоз уж сётӥсен.

Прививка пуктэм бере самоизоляциын улоно-а?

Вакцинаын улэп вирусэз ӧвӧл бере, прививка пуктэм мурт ачиз но ковидэн уз черла, мукетъёсызлы но со бордысь висён уз паласькы.

Прививка пуктэм бере кызьы адями ассэ шӧдыны быгатэ?

Тросэз сое капчиен ортчыто. Но куд-огезлэн йырыз висьыны, мугорыз ӟырданы, прививка пуктэм бервылыз вӧсь луыны быгатэ. Туж шерезлэн ӧскемез потэ, сиськемез уг поты. Но ваньмыз та одӥг-кык нуналскын ортче. Эмъясь дӥне вазиськоно, адями ассэ 7 нуналскын но умой шӧдыны уг на ке кутскы.

Пуктоно-а прививка лек пыктосъёслэсь курад­ӟисьёслы, 60 ареслэсь ортчемъёслы?

Одно пуктоно! Угось сюлэм но сэр, ты, ньылондорбез (щитовидка) висёнъёслэсь, лек пыктосъёслэсь курадӟисьёс ковидэз уката секытэн чидало. Бен, прививка пуктон азьын одно кенешоно эмъясен, висёнлэн лек вакытэз медаз тупа.

Ковидэн висемын ни ке, прививка пуктоно на-а?

Чакланъёс возьмато, коронавируслэсь йӧнатӥськемез бере адямилэн 3-6 толэзь ӵоже вираз антителоосыз вань, озьыен, вируслы пумит иммунитетэз зол. Но дыр ортчемъя антителоос ӧжытгес но ӧжытгес кылё. Соин ик, прививка пуктыса, умойгес луоз.

Коронавируслэн индийской штаммез дорамы вуэмын ни, шуо. Маин со огшоры ковидлэсь пӧртэм луэ?

Коронавируслэсь штаммзэ тодман вылысь нимысьтыз эскеронъёс кулэ, солы тупась тӥрлык али вань бадӟым центръёсын гинэ. Республикаямы сыӵе луонлык ӧвӧл бере, анализъёсты Роспотребнадзор пыр келяськом Саратовысь референс-центре. Отчы ыстэм пробаосмы пӧлысь 18 учыре индийской штамм шараяськиз ни.

Берло дыре висён воштӥськыны ӧдъяз. Адямиослы секытгес луэ. Тросэзлэн нырзы тыре, кот кызыны кутско — нырысетӥ висисьёслэн та ӧз шӧдӥськылы. Озьы ик тросэзлэн кӧтсы чутыръя, йырзы висе, мугорзы зол ӟырда. Зынъёсты шӧдэмысь али туж шерез гинэ дугдэ.

Черламъёслэн шоро-куспо арлыдзы — 40 арес котыр. Вазен шуиськом вал, егитъёс капчиен висё шуыса, нош али пӧлазы реанимацие сюрисьёс но ӧжыт ӧвӧл.

Со сяна, вирус капчиенгес паласькыны кутскиз.

Элина Кумачёва

Удмурт Дунне
By Удмурт Дунне 13 июля, 2021 16:39
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<