Пумитай… Чебурашкаез

Ангелина Снигирева
By Ангелина Снигирева 13 июля, 2021 17:28

1-тӥ пӧсьтолэзе, «Союзмультфильм» студилэн 85 ар тырмонэзлы сӥзьыса, «Галерея» центрын «Чебурашка и все-все-все» (0+) адӟытон усьтӥськиз. Сое дасяны юрттӥзы «Союзмультфильм» киностудия но Кинолэн кун музеез.

— Та выллем адӟы-тонъёсты ми ӝыны ар пала лэсьтыны выриськомы, — вераз адӟытонлэн кураторез Елена Волкова. — Но пандемия вакытэ мукет сямен ужаны дышимы — чупрес кариськимы но экспонатъёсты 2 толэзь ӵоже люкамы.

«Чебурашка и все-все-все» проектлэсь ужзэ «Союзмультфильм» 2019-тӥ арын мытӥз, соку Санкт-Петербурглэн пӧртэм сэрегъёсаз возьматъязы мультфильмъёсын шудэм мунёосты, фильм пӧрмытон понна суредам эскизъёсты. Но отын интыысь интые репродукциосты, копиосты нуллӥзы ке, Ижкаре зэмос мунёос, суредъёс вуизы.

Бадӟым залэ пырыса, адӟиськод: макем трос адями пияла сьӧры пуктэм экспонатъёсты учкыны выре. Мар меда отын? Матэгес кариськыса, син шоры йӧто мусо мунёос: Крокодил Гена кинэ ке визьнода, Чебурашка малпаськыса сылэ, Шапокляк комаксэ маялля. Та геройёсты кемалась тодӥськод ни, тон сяна
соосты Совето Союзысь, Россиысь трос пиналъёс ярато на, нош соос тани — син азяд сыло! Осконтэм…

Геройёс бадӟымесь ик ӧвӧл — кырымпыдэс вылэ тэрозы. Мультфильмез учкыку, соос ыльысгес пото: котькуд выроссэс, мынямзэс умой-умой возьматыны кулэ ук. Таӵе вакытэ мультипликаторъёслэсь, вуриськисьёслэсь ужзэс эшшо вылӥгес дунъяны кутскиськод.

Бордазы ик сылэ «Чебурашкаысь» туж тодмо азбар: школа, писпуос… Мунёен шудон корка выллем. Паймоно, макем ӟеч соос лэсьтэмын, та дырозь утиськизы бере.

«Чебурашкаысь» геройёс сяна, Удмуртие «Музыкальный магазинчик» мульт­фильмысь нымы-кибыос, коркаос вуизы.

Та мультфильмъёсын му­­нёос шудӥзы. Нош «Союз­мультфильмлэн» карандашен, кисточкаен суредам киноосыз кӧня на! Соос сярысь но, адӟытонэз дасякузы, ӧвӧл вунэтӥллям, отысь эскизъёс шоры но учкыны луэ.

Котькуд борддор пӧртэм мультфильмъёслы сӥземын — «Ну, погоди!», «Малыш и Карлсон», «Винни-Пух», «Весёлая карусель», «Умка»… Тани огаз сэрегын «Бременские музыкантыысь» суредъёс. Сыщикез пал синмыныд гинэ адӟыны вуиськод но, йырад соку ик «Я гениальный сыщик…» кырӟан шудыны ӧдъя… Кӧня меда — сюрс яке миллион — суред лэсьтыны кулэ вал 10 минутъем фильмез кылдытон понна? Галереяысь борддор тужгес но тодмо сценаослы гинэ окме ук!

Эскизъёс бордын раскадровкаос но вань, соосты режиссёр мультфильм лэсьтон азяз дася: мар бӧрсьы мар луоз, кыӵе кадр пӧрмоз, кызьы герой вамышъялоз, кызьы учкоз. Тунсыко ӵошатыны, кызьы
мультфильмез адӟе вал режиссёр но кыӵе со пӧрмиз.

— Ми пӧртэм экспонатъёсты люкамы, — вераз «Галереялэн» кивалтӥсез Юлия Попова. — Мунёос но суредъёс бадӟымъёсты пинал дыразы берыктозы, нош покчиосты выль выжыкыл дуннеен тодматозы. Та залын нылпиос понна пӧртэм ужрадъёс ортчытъяны чакласькомы.

Зэм ик, татын пиналъёс понна пӧртэм сэрегъёс ужало. Соос нимаз залын бадӟым экран вылын «Союзмульт­фильмлэн» ужъёсыныз тодматскыны, кызьы анимация пӧрме валаны быгато.

Залын ик куара гожтон студия кылдӥз, со уно пиналъёсты бордаз кыскиз. Вакчи дыр куспын соос яратоно геройёссылэсь рольёссэс ас вылазы мертазы, соослы асьсэ куараоссэс «кузьмазы».

— Экран вылын мультик мынӥз, нош улаз геройёслэн кылъёссы потазы, — вераз Ижкарысь 8 аресъем Саша, — мон Чебурашка интые вераськи. Туж шулдыр вал, бертыса, мультфильмъёс­ты выльысь учкеме, мукет геройёс интые вераськеме потӥз.

Пиналъёслы киязы кысэм микрофон гинэ сёто ке но, соос бурдъясько ни, мульт­фильм лэсьтон дуннеез асьсэлы усьто.

Мария Емельянова

Ангелина Снигирева
By Ангелина Снигирева 13 июля, 2021 17:28
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<