Пулэн аслаз чеберез

Удмурт Дунне
By Удмурт Дунне 13 июля, 2021 14:10

Пичи Пурга ёросысь Баграш-Бигра гуртысь Дмитрий Ушаков ужтэк пукыны уг чида. Ваньмон дыр сюре ке, мастерскояз вамыштэ — пу вӧлон станокез сьӧры султэ.

Телефонын, телевизор азьын дырез быдтытозь, ножовка, тӥр борды кутскод, лыдъя Дмитрий. Со чебер, аспӧртэмлыко арбериос пӧрмытъя. 10 ар пала пуэн выре ни. Нырысь ик 4 аресъем пиезлы пичи пукон лэсьтӥз вал — али ке но та ужез тужгес дуноез потэ, пе.

— Соку нокыӵе инструментъёс но ӧй вал ай, тӥрен, ножовкаен гинэ ужай, — тодаз вае Д. Ушаков. — Интернетмы но ӧй вал. Ваньзэ ас валамея, книгаосысь учкыса, лэсьтӥ. Табере котьмае Интернетысь адӟыны, фантазиед вань ке, ачидъя пӧрмытыны луэ ни, ужан тӥрлык но котькыӵе басьтыны луэ. Мынам но пу вӧлон, струган станокъёсы, лобзик но мукет арбериосы кылдӥзы ни.

Воргоронлэн корка пушкыз ас киыныз лэсьтэм арбериосын узырмытэмын — ӝӧк, пуконъёс, тубат… Дасьсэ басьтыны капчигес, пе, но киын лэсьтэмез дуногес.

— Пуэн ужаны туж кельше. Маке борды басьтӥськисько ке, пумозяз лэсьтэм потэ. Нош пӧрмемзэ адӟыса йылпумъясько ке, кыӵе шумпотӥсько! Выль киуж борды басьтӥськыны эшшо но мылкыды ӝутске, — шуэ со.

Дмитрий Ушаковлы бускельёсыз, гуртоосыз но, созэ, я тазэ лэсьтыны курыса, вазиськыны кутскизы ни. Берло дыре модае нош ик пырыны ӧдъяз шыкыс. Бызись нылъёс выль семьяе потон азязы выльысен пирдан дасяны кутскиллям. Шыкысъёс лэсьтыны курыны ӧдъязы.

Кибашлы пиосмурт пу дасьсэ басьтэ, котькыӵе пуэз гажа — котькудӥзлэн аслаз чеберез но пайдаез, пе. Кылсярысь, тубат лэсьтыны кызьпуэз кутэ, угось со чурыт, вылаз мар ке усиз ке но, гопез уз кыльы. Ӝӧкъёслы пужымез басьтэ — ӝӧк выл пужыё, чебер пӧрме, пе. Беризь мунчо пушез лэсьтыны (обшить) умой мынэ.

Дмитрий Ушаковлэн быгатонлыкъёсызлы семьяосыз но шумпото. Атаез вӧзын бадӟым пиез инструмент возьыны дышетскиз ни, али Казаньын тодон-валан люка. Покчиез но пизы тани будэ — 3-тӥ классэ потӥз. Ӝоген со но воргорон ужлы дышетскыны чакла. Нош нылзы анаез вӧзын котьмалы дышетске.

Ангелина Снигирёва

Удмурт Дунне
By Удмурт Дунне 13 июля, 2021 14:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<