Кузьым — «Егит гвардилэсь»

Удмурт Дунне
By Удмурт Дунне 23 июля, 2021 13:22

Ижысь Ленин ёросын та нуналъёсы сӥё-дано усьтӥськиз инвалид егитъёслы чаклам центр — отын соос ваньмон дырзэс ортчытыны быгатозы. Таӵеез, Ижын сяна, кунамы нокытын ӧвӧл на.

Ижысь инвалидъёслы центрын шудыны луоз шоуданэн.
Фото: «Егит гвардия» огазеяськонлэн Удмуртиысь ёзэтэзлэн «ВКонтакте» бамысьтыз

Кык вӧл-вӧл висъетын пуктылэмын ӝӧкъёс, пуконъёс, огаз борддораз — бадӟым экран. Нимысьтыз сэрег висъямын ляб адӟисьёслы теннисэн — шоуданэн — шудон ӝӧк: теннис туп корт юдэсъёсын тырмытэмын, ӝӧк вылтӥ кудпала ширтэмзэ сукыр мурт куа­раезъя кылэ, ваче шудӥсезлы лэзья. Татын егитъёс понна радъяськозы пӧртэм ужрадъёс — мастер-классъёс, нимо-дано адямиосын пумиськонъёс, ӵошатсконъёс, шудонъёс, визь сынанъёс.

Пусйымон: центрез кыл­дытӥзы «Егит гвардия» огазеяськонлэн Удмурт ёзысьтыз мыло-кыдоос. Ижысь Клубной урамысь одӥг юртысь буш висъетъёсты шедьтӥзы, сое тупатъяны уксё утчазы, асьсэлэн кисыысьтызы но поттӥзы. Озьы ас кужыменызы сое быдэсак выльдӥзы.

— Егитъёслэн огазеяськонъёссы кунамы трос. Но одӥг улосысь но кылэме ӧвӧл, кытын ке егитъёс та выллем центр усьтӥзы шуыса — нокин косытэк-курытэк, асьсэ мылкыдынызы, кужыменызы. Удмуртиысь огазеяськон та ласянь котькинлы адӟем карымон. Малпазы — лэсьтӥзы! Оскисько: Ижысь Ленин ёросын гинэ ӧвӧл, мукет интыосын но кылдозы та выллем центръёс. Егитъёс отын ваньмон дырзэс пайдаё ортчытыны быгатозы, — центрез сӥё-дано усьтон ужрадын шуиз Удмуртиысь Тӧролэн но Правительстволэн администрациенызы кивалтӥсь Сергей Смирнов.

— Табере татын пумиськылон интымы луоз. Сӧсыръёслы гинэ ӧвӧл, котькуд егит муртлы ӧсъёсмы усьтэмын, — шуиз та центрез радъянэ пыриськем нылаш Елена Суслопарова.

Е. Суслопарова ачиз но воксё уг адӟы. Но со туж усто шудэ шоуданэн: пыртэмын Россиысь инвалид егитъёс пӧлын теннисэн шудӥсьёслэн сборноязы. Кемалась ик ӧвӧл Подмосковьеын ортчем ӵошатсконын 4-тӥ интые потӥз. Центре лыктӥсьёсты, сукыръёсты табере дышетоз шоуданэн шудыны, ваньмон дырзэс тунсыко но пайдаё ортчытыны юрттоз.

Елена Тугашова

Удмурт Дунне
By Удмурт Дунне 23 июля, 2021 13:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<