Котыразы люкало, уженызы паймыто

Удмурт Дунне
By Удмурт Дунне 21 июля, 2021 16:45

Балезино ёрос библиотека кылем толэзе 85 ар тырмонзэ пусйиз. Солэн фондаз 30 сюрс пала книгаос возисько, лыдӟиськыны яратӥсьёс 2 сюрслэсь трос луо. Юбилейлы сӥзьыса, библиотекаын пӧртэм ужрадъёс ортчо.

Лыдӟиськыны ветлэм сяна, куд-ог адямиос мӧзмем сюлэмзэс но татын буйгато. Ачим но библиотекаын трос аръёс ӵоже ужамын, соин, лэся, мылкыды калык пӧлы куриське. Шумпотӥсько ёрос библиотекае пӧртэм арлыдъем калык кыстӥськемлы. Отын ваньмызлы сюлэмзыя уж шеде. Адӟытонъёс, тунсыко адямиосын пумиськонъёс ортчыло. Кемалась ик ӧвӧл радъямын вал «Восход» огазеяськонын ужась егит агрономлэн туспуктэмъёсыныз адӟытон.

Июнь толэзь кутсконын библиотекаын ужасьёс «Калык лыдӟе» юалляськон ортчытӥзы. Книга ӝажыосын артэ пуктэмын вал нимысьтыз писпу, солэн вайёсаз котькуд лыдӟись лента думиз, аслыз кельшись жанрез бырйыса. Тодмо луиз: балезиноос тужгес ярато война вакытысь гожъямъёсты лыдӟыны.

Нош суредаськыны яратӥсьёс чидатэк витё Нина Лекомцевалэсь мастер-классэ. Со Балезиноысь искусствоосъя школаез йылпумъямын, ачиз но чебер суредаське, мукетъёссэ но дышетэ, нош бӧрысь вань ужъёсты адӟытонэ поттэ. Мастер-классэ пыриськемъёс, палэнысен ужъёссэс адӟыса, асьсэос ик паймо ӟеч суредаськыны пӧрмытэмзылы.

Ёросын гожъяськыны быгатӥсьёс но трос вылӥллям. Кин ке кылбура, кин ке веросъёс гожъя, шаертодонэн тунсыкъяське. Нош гожтэм ужъёссы ӝӧк вылазы тузонӟыса уло вал. Библиотекаын ужасьёс 4-тӥ арзэ тыршо «Знакомьтесь, балезинская книга» проект­сэс улонэ пыӵатон бордын. Озьы ёросысь гожъясьёслэсь ужъёссэс нимысьтыз бичетэн печатланы юртто. Бен, бадӟым тиражен печатланы уг пӧрмыто ке но, гожъяськисьёслэсь мылкыдзэс лӧпкыто. Дӥнязы книга печатланы мылкыд карисьёссы кузь черодэ султэмын. Туэ ар понна соос 3 муртэ шудо каризы ни.

Нош ми, арлыдоос, чидатэк витиськомы «Литературный квартал» ужрадэз. Ёрос библиотекалэн кивалтӥсез Ирина Уракова ивортэмъя, сое 2018-тӥ арысен ортчыто. Кварталлы одӥг пол ёрос центрын улӥсьёс тодматскыны быгато кыӵе ке одӥг муниципал кылдытэтысь усточиосын. Гурт библиотекаосын ужасьёс юрттӥсько муниципал кылдытэтъёсысь тунсыко адямиосыз шараяны. Кырӟась-верасьёс сяна, пӧлазы одно ик луо кибашлыос, адӟем карымон ужасьёс но семьяос.

Туннэ нуналлы 12 муниципал кылдытэтэн тодматскон ортчиз ни. Таӵе пумиськонъёс дыръя паймисько но эшшо юнгес данъяськыны кутскисько Балезино ёросын улӥсьёсын. Кылсярысь, Андрейшурысь Алевтина Шкляевалэн гожтэм кылбуръёсыз сюлэмез вырӟытӥзы, Вадим Ивановлэн но Григорий Тронинлэн чебер кырӟамзылы синмаськи. Вӧёгуртъёслэн улэм-вылэменызы тодматӥз отын ужась библиотекарь Надежда Корепанова. Тодӥмы, война вылтӥ, пе, колхоз луд вылазы запасной аэродром вылэм. «Азвесь даур» ансамбле ветлӥсьёссы, арлыдзыя ваньзы пенсионеръёс, сцена вылын но йӧно возисько: юн тапырто, жингрес кырӟало.

Кызьы пусйи ни, ёрос библиотекаын ужасьёс арлыдоос сярысь но уг вунэто. Юн кусып возё инвалидъёслэн, ляб адӟисьёслэн но ветеранъёслэн огазеяськонъёсынызы. Библиотекаын азьвыл ужамъёсты «Тӥ понна усьтэмын ӧсъёсмы» пумиськонэ люкаллязы. Ужрадэз туж мыло-кыдо нуизы Наталья Яковлева но Людмила Плетенёва. Котырес ӝӧк сьӧрын азьвыл ужам аръёсмес тодамы вайимы, библиотекарьёслэн туала ужан амалъёсынызы тодматскимы.

Фелицата Юферева. Балезино

Удмурт Дунне
By Удмурт Дунне 21 июля, 2021 16:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<