Кин сюдоз?

Удмурт Дунне
By Удмурт Дунне 13 июля, 2021 15:04

Хозяйствоослы 1 сюрс 300 ужась кулэ

Гурт хозяйствоосын кадръёслы арысь аре золгес но золгес ёрмо. Кин ужалоз азьланяз?

Эгра ёросысь Мазьги гуртысь нылпиосты фермае экскурсие нулло.
Туспуктӥз Ольга СОЛОВЬЁВА

Уждун уг куты

Гурт хозяйствоос ичизэ 1 сюрс 300 муртэ али ик уже кутыны дасесь. Но лыктӥсь ӧвӧл. Городъёс котырысь хозяйствоосын но кадръёслы ёрмо.

— Тужгес секыт югдур скал кыскисьёсын, пудо утялтӥсьёсын, — вера гурт удысъя но сиён-юонъя министр Ольга Абрамова. — Та удысын али 8 сюрс адями тырше, ог 400 мурт уг тырмы. 4 сюрс 300 трактористъёс-машинистъёс бусыосын но фермаосын бергало, эшшо 270-лэсь ятыр механизаторъёслы вакансия вань. Специалистэ лыктӥсьёс гинэ но уг сюро. Кылсярысь, хозяйствоосын али кулэ пудо эмъясьёс, зоотехникъёс, агрономъёс, инженеръёс — оглом 230 мурт.

Туала вакытэ бадӟым уждунэн нокинэ гочатыны уг луы ни, шуо хозяйствоосын кивалтӥсьёс. Кылсярысь, туэ 1-тӥ июньлы Эгра ёросысь хозяйствоосын 11 агрономъёс ужало, эшшо 3 муртлы вакансия вань. Сыӵегес ик югдур зоо­техникъёсын, инженеръёсын, энергетикъёсын. Эшшо секытгес пудо эмъясьёсын — 13-ез ужа, эшшо 8 специалист кулэ. Шуге-леке вуэмын трактористъёсын — 19 муртэ туннэ ик кутысалзы, бусыосын таӵе пӧсь вакытэ ужась уг тырмы. Скал кыскыны кинэн паймо — 6 доярка уг окмы. Ярам, кыед но тузон пӧлын ужамзы уг поты, но бухгалтере гинэ но ёросын лыктӥсь уг сюры.

— Юн хозяйствоос но ужасьёслы ёрмо, — лулӟе Эгра ёросысь «Зуринский» агрокомплексэн кивалтӥсь Елена Чиркова. — Кужмо специалистъёслы ми 100 сюрс манет но тырыны дасесь. Но сомында уждун басьтон понна рос-прос ужаны, ӟеч результатъёс возьматыны кулэ. Зэм, уждунэн гинэ егитъёсты уд возьы. «Мон ачим кыед пӧлын быдэс даурме ужай, тон ке но городэ кошкы» шуыса, нылпиоссэс данакез гуртысь улляло. Отын йӧнала уждун, улон сэрег вань-а, ӧвӧл-а — созэ нокин уг учкы — мед гинэ кошкозы. Кинэн ужаны но куддыр паймоно. Милемлы али дояркаос уг тырмо. Уждунзэс эшшо будэтон понна фермаямы перестройка лэсьтӥськомы, выль оборудование басьтӥськомы. Скал кыскисьёслэн нагрузказы йылоз ик, но 100 сюрс манетозь уждун тырыны луонлык кылдоз.

Агрокомплексэ куриськисьёс нуналлы быдэ вань. Но ваньзэс туала техника сьӧры уд пукты, скалэз но ваньзылы уд оскы. Юисьёсты хозяйство чот йӧнатӥ ни кадь, шуэ Елена Михайловна. Но дырын-дырын ӟенелик борды кин но со кутске.

— Асьмелы асьмеос заложник кадь потӥськомы: ужась кутӥськомы, кузяз ветлӥськомы, нош соос сьӧраз ортчо, асьсэлэсь условиоссэс пуктыны кутско, — азинтэ Елена Михайловна. — Ужась уг шедьы ке, кытчы пырыны но уд вала. Али тани пудо эмъясь уг тырмы. Квартирамы но вань. Практиказэс ми дорын мед ортчозы, гуртэнымы, калыкен мед тодматскозы шуыса, Можга агроколлеждысь кӧня ке муртэ ӧтчамы. Огез соглаш кариське кадь ужаны. Табере малпаськиськомы: кызьы сое гуртэ кельтоно? Кинэн умойгес пияшен тодматоно шуыса, йыр висе ни. Кивалтӥсь со понна гинэ но сюлмаськыны кулэ ук. Хозяйствое ум мынэ, секыт, шуо студентъёс. Гуртын дояркаос ведра уг ӝутъяло ни, но малы ке калык весь сыӵе малпанэн улэ. Комбайнъёсын но кондиционер, бортовой компьютер вань ни. Азьвыл 10 комбайнэн ужаськомы вал ке, али 3-ез тырме — сокем уж капчияз, бусыос йылӥзы ке но.

Подъёмной уг гочаты

Министр Ольга Абрамова пусъемъя, кылем арын Ижысь гурт удысъя академиез но училищеосты 186 мурт йылпумъяз. Таос пӧлысь 40-эз гурт хозяйствоосы вуизы ик, но соос радысь но 3-ез 1 ар но ужаны ӧз чида. Нош 3 ар ужамзы бере гуртысь пегӟисьёс эшшо но йыло — та дыр ӵоже егитъёс министерстволэсь подъёмной басьто ни угось. Кылсярысь, очно амалэн дышетскем егит специалистлы тыриське 250 сюрс манет, трактористлы — 140 сюрс манет. Озьы ик выплата сётӥське дояркалы — 140 сюрс манет. Подъёмной тыриське 36 аресозь егитъёслы, со понна министерствое вазиськоно. 2018-тӥ арын выплата басьтӥз 310 мурт, 2019-тӥ арын — 279 мурт, миым — 294 мурт.

— Туэ 1-тӥ июньлы 92 егитъёс выплаталы вазиськизы, — шуэ Ольга Викторовна. — Подъёмнойлы 7 миллион 93 сюрс манет висъямын ни. Выплатаослы оглом ог 30 миллион манет чакламын. Студентъёсты доразы практикае кутэмзы, улон интыен юрттэмзы понна хозяйствоослы быдтэм уксёзы пӧлысь 90 процентсэ кун берыктыны дась. Озьы ик субсидия вуоз со хозяйствоослы, кин студентлы целевой направление сётоз но стипендия тыроз. Оглом 4,6 миллион манет субсидия висъяны чакламын.

ВакансиосУжалоУг тырмо
Валтӥсь специалистъёс (зоотехникъёс, агрономъёс, инженеръёс но мукетъёсыз)

89587
Специалистъёс (пудо першалъёс, зоотехникъёс но мукетъёсыз)
2067144
Тракторист-машинистъёс
4290270
Шофёръёс
102242
Пудо вордӥсьёс, скал кыскисьёс
7987373
Переработкаен вырисьёс
4816

Зэм, туала вакытэ целевой направлениея но дышетскыны пырисьёслэн лыдзы ялан кулэсме. Пӧртэм факультетъёсын визь люкан понна «целевикъёслы» 10-15 процентэз бюджет интыос висъясько ке но, соос ӵемысь уг тырмо. Малы кин ке борды «думылӥськод», оло, гуртэ ик ум мынэ, шуо студентъёс. Хозяйствоослэн но кышканзы вань направление сётыны, стипендия тырыса дышетыны. Егитъёсты угось нокыӵе контракт уг куты. Кылсярысь, «Зуринский» агрокомплексэ кӧня ке ар талэсь азьвыл целевойлы 4 мурт вазиськиз, контракт гожтӥзы. Но, диплом басьтыса, огез но хозяйствое ӧз берытскы.

— Туэ агроинженерия факультетэз 116 мурт йылпумъяз, — вера Ижысь гурт удысъя академиысь наукая но инновациосъя проректор Сергей Коконов. — Гуртлэсь соос кӧня ке кышкатскемын. Тросэзлэн выпускникъёслэн хозяйствоосы мынэмзы уг поты, уждун пичи шуыса. Кытын 50 сюрс манет тыро, отын ужасьлы но уггес ёрмо. Соиз но вань: уноез ӝожтӥсько, куд-ог хозяйствоосын егитъёсты уг дунъяло шуыса. Уд быгатӥськы ке, мукетсэ кутом, шуо, пе. Я специалистъёсты разнорабочий интые возё, быгатонзылы уггес оско. Но адямиез ужын воземед потэ ке, оскыны, валэктыны, мылкыдзэ бурдъяны кулэ. Али гинэ студентъёс радысь потэмъёс кыл кутонлэсь асьсэос но нырысь-валысь кышкало. Ар пала ужаса гинэ, ӧраз пыро ай. Нош хозяйствоослы соку ик рос-прос ужась кулэ ни. Кыл кутонлэсь кышкаса но, уноез шуо: котькыӵе уже, но городэ ик кылём. Куддыр магазинын вуз карыны, пудоен вырыны сярысь, трослы капчигес. Кылсярысь, агроном но зоотехник бордысь хозяйстволэн азьпал улонэз потэ. Бен, студентъёсмы гуртэ уг мыно шуыса, ми, дышетӥсьёс, асьмеос но куректӥськомы. Ужась студентъёслы дышетскыны каньылгес медло шуыса, нимысьтыз график но лэсьтӥськомы — мед гинэ ужалозы.

Сергей Коконов верамъя, хозяйствоосын кивалтӥсьёс академие ӵемысь вазисько, умой специалистъёс кулэ шуыса. Но куд-огез соку ик кӧня ке ужез быдэсъясь-валась универсальной специалистэз куре. Кылсярысь, зоотехник­лэсь но пудо першаллэсь, механизаторлэсь но агрономлэсь ужзэ огдыре мед быдэсъялоз, пе. Ми дышетомы созэ но, тазэ но, милемлы ужпум гинэ пуктэ, дышетскисьёсмы кулэ мед луозы, шуэ проректор.

Ольга Абрамова пусъемъя, туэысен дышетон системае воштонъёс пыртыны чаклало, хозяйствоослэсь куронъёссэс санэ басьтэ.

Елена Сараматова

Удмурт Дунне
By Удмурт Дунне 13 июля, 2021 15:04
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<