Калмез азбар гочатэ

Удмурт Дунне
By Удмурт Дунне 14 июля, 2021 11:28

Сьӧлта ёросысь Зямай гуртын берло аръёссэ тол но, гужем но калык уг бырылы. Отын пуктэм «Шудор» азбар быдэс ёросысь калыкез бордаз кыске.

Тодэ вайытом: ёросысь «Удмурт Кенеш» огазеяськонлэн «Шудор» проектэз Президентлэн фондысьтыз грант утӥз вал. Туэ куартолэзь пумын проект улсын чаклам ужрадъёс йылпумъямын: Зямай гуртысь тымет дурын калмез удмуртъёслэн азбарзы кылдӥз. Отын возьматэмын удмурт корка, кенос, пуктэмын капка, ӟечыран. «Шудор» азбарез чебер каризы асьсэос «Удмурт Кенешысь» азьветлӥсьёс — котыраз но пушказ утялскизы, сяська мерттӥзы. Коркан гур пуктэмын, отын табань но, перепеч но пыжыны луэ. Азбар котырын шупуосын 2 аллея мерттэмын, огзэ сӥзизы Зямайын вордӥськем Николай Дубовцевлы. Пиосмурт Афган ожмаськонын быриз. Со сяна, «Шудор» бордын 76 кызъёс ӝужало. Быдӟым Вормонлы 75 ар тырмон улсын татчы 75 уд мерттэмын вал, аллея котькуд ар быдэн одӥг писпулы йылоз.

Сьӧлтаос азбарзэс толэзь талэсь азьвыл сӥё-дано усьтӥзы, «Тетера-дор» фестивальзэс ортчытыса. Калмез сям-йылолъёсын тодматскыны, та палъёсын вӧлмем тетера сиёнэз веръяны вуылӥзы Пичи Пурга, Сюмси, Ува, Грак, Юкаменск, Можга, Эгра ёросъёсысь коллективъёс. Али но куноос чик уг бырыло, шутэтскыны мылкыд карисьёс быдэс гужемлы гожтӥськемын ни, пе.

— Ум ик малпаське вал, та инты калыкмылы сокем яралоз шуыса. Гужемлы толэзьлы быдэ 250 муртэз пумитаны ужпум пуктӥм вал, нош инвожо куспын гинэ сюрслэсь трос адями ветлӥз ни. Али нылпиослэн гужем лагерьёссы ортчо, ваньмызлэн татчы вуылэмзы, перепеч пӧранъя мастер-классъёсы, киуж лэсьтонэ пыриськемзы потэ. 2 вал басьтӥмы, куноосмес азьланяз дӧдьыен, уробоен ворттылытыны чак­ласьком. Ар куспын кыӵе гинэ ужрадъёсты ортчытыны татчы уг курисько: семьяос люкаськыло, пӧртэм коллективъёс, организациос вуыло, — вераз проектлэн кивалтӥсез Наталья Русских.

Та интыез азинтонъя малпанъёс йылтэм-пумтэм ай. Азбарез узырмытон сярысь трос сюлмаське Кильмезь муниципал кылдытэтлэн йырыз, «Удмурт Кенешлэн» ёзчиез Олег Пчельников.

— Малпаськомы на куноосты пумитаны нимаз бадӟым корка пуктыны. Пичияз кафе выллем усьтыны луысал. Собере, рос-прос калмез азбар мед луоз шуыса, гидъёс ӝутыны кулэ на. Та сяна, шаерчимылы Пётр Коробовлы (кылем арын улонысь кошкиз – авт.) сӥзем «Куака Петыр» музей сэрег луоз. Вордӥськем гуртысьтыз музейзэ, отын утиськись арбериосты вайыны малпаськом. Бадӟым мылкыд тымет дурез утялтыны. Вумы чылкыт, но пыласькыны лэзись лицензия кулэ. Гужемзэ дорамы калык шутэтскыны мед лыктоз, толалтэзэ — нискыланы, соин ик гурезь ӝутыны ӧдъяськом на, — вера Олег Викторович.

Азбарез пуктэм бере Зямай гуртлэн улонэз огыр-бугыр луиз. Азьвыл ми вунэм азьын кадь улӥмы, нош табере кӧня ужрадъёс дорамы ортчо, кӧня куноосты пумитаськомы, верало зямайёс. Соос мыло-кыдо пырисько азбарез ӝутон но гуртсэс чылкытатон ужрадъёсы.

Ангелина Снигирёва

Удмурт Дунне
By Удмурт Дунне 14 июля, 2021 11:28
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<