Басьтэм сиёнлэн берекетэз ӧвӧл

Удмурт Дунне
By Удмурт Дунне 15 июля, 2021 11:26
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Гурт хозяйствоосын югдур нуналысь нуналэ секытгес луэ. Лудъёс сутскемен, хозяйствоос пудо сиён дасяны Удмуртилэн палэназ потӥзы ни. Пудозэс кулэстыны малпасьёс но вань.

Шаерамы котькуд йыр пудоез сюдыны, 25 центнер интые, шорлыдын 12 центнер сиён дасямын.
Туспуктӥз Елена Сараматова

Пудозэс вузало ни

Шаерамы 14-тӥ июльлы 227 сюрс 94 йыр сюро таза пудо пусъемын. Со пӧлысь кысконо скалъёс — 130 сюрс 920 йыр. Ар пумозь кызьы но озьы пудомес сюдыны быгатомы ай, нош мар луоз отӥяз — вераны шуг, шуо уноез хозяйствоосын кивалтӥсьёс. Кыл­сярысь, Дэбес ёросысь Зар-Медло гуртысь Калинин нимо СПК-ен кивалтӥсь Антон Бушмакин верамъя, силос дасяны Кез ёросэ куриськизы ни. Отын турынъёс сокем зол куасьмемын ӧвӧл. Но со тырмымон уз луы. Соин ик Пермьысь хозяйствоосын кенешыса, отын пудо сиён дасяны ӧдъязы на.

— Али кин кытысь пудо сиён дасяны быгатэ, озьы ик ужа. Ми ог 8 сюрс тонна пудо сиён люканы пӧрмытӥмы ни, нош ичизэ 24 сюрс тонна кулэ. Югдур секыт. Ош куайытӥськом вал. 200 йырзэ вузано луоз — сюдыны ум ворме. Пудоез кулэстэм воксё уг поты, но мукет амал ум адӟиське, — шуэ Антон Александрович.

Дэбес ёросысь Сюрногуртысь «Мир» хозяйство али ик пудозэ басьтэм сиёнэн сюдэ ни.

— Юосмы амбарын вазен быризы ни, — вера 3 толэзь талэсь азьвыл «Мирен» кивалтыны кутскем Николай Стрелков. — Ю-нянь али ик туж дуно. 1 фура тыр ю тысь 370 сюрс манет сылэ, нош со 4 нуналлы тырме. Уборка борды, 2 арня ортчыса гинэ, кутскомы ай. Но та но югдурысь потыны уз юртты: комбикорм лэсьтон вылысь басьяно луоз кыд (жмых), кукуруза но пӧртэм добавкаос. Ю тысь коже уд сюды. Хозяйстволэн пунэмъёсыз ӧй луысалзы ке, трослы капчигес луысал. «Мир» бадӟымесь пунэмъёсы пыремын ни вал, мон сое кутыкум. Ваньмыз сямен поттэм коньдон пунэмъёсты тырыны кошке. Таӵе югдурын пудоен мар кароно шуыса, весь малпаськисько. Ошъёсты араз сюдыны ог 5 миллион манет быре. Кулэ-а со милемлы? Одӥг партия ошъёсмес Татарстанэ вузамы ни. Скалъёсмес кызьы ке утёно. Али 712 йыр кысконоосыз, соос нуналаз 11 тонна йӧл сёто. 15 тоннаозь вуттоно, шуисько, фермаямы реформа ортчытомы. Но талы вань ужасьёс дасесь ӧвӧл. Ужан радлыкез воштон понна сиён но рос-прос луыны кулэ. Сӥзьыл зелёнкаен сюдон вылысь викаен суро сезьы кизимы вал. Но засухаен йырин вика уг ӝужа, нош сезьы шер-тур но лапег потэмын. Кин ке рапс но гужем шорын выльысь кизе на. Мукет культураосты но кизьыны луысал на, дыр, — сӥзьылозь сюдыны турнасалмы. Но кизьыны коньдон ӧвӧл. Кулэяськеммылэсь ӝынызэ гинэ ай пудо сиён дасямы. Калыкен но берло дыре секыт луиз. Хозяйствоын 150 мурт ужа. Механизаторъёслэн шоро-куспо уждунзы 35 сюрс манет, дояркаослэн — 50 сюрс манет. Но куд-огезлэн воксё ужамез уг поты. Гуртын мукет удысын кытын али сомында уждун басьто? Нокытын. Егитъёс воксё но 17 часозь ужасалзы но доразы кошкысалзы. Но гужем хозяйствоын озьы гинэ ужаны уг луы ук. Кинэн пудо сиён но дасяны паймод ай. Тани 2-ез августэ пенсие дасяське.

Николай Сергеевич пусъемъя, таӵе югдурын хозяйствоосты 3 толэзьлы ке но выт тыронлэсь мозмытысалзы ке, пудо сиён дасяны-басьтыны уксёзэс тырмытысалзы. «Мир» ик толэзьлы быдэ вытъёслы ог 2 миллион манет висъя.

Ю-нянь дуноялоз

Шаерамы али котькуд йыр пудоез сюдыны шорлыдын 12 центнер сиён люкамын, нош ичизэ 25 центнер кулэ. 12-тӥ июльлы тужгес трос сиён дасяны пӧрмытӥзы ни Якшур-Бӧдья котырысь хозяйствоосын — 24,2 центнер. 3 центнерлы гинэ ӧжытгес сиён люказы эграос. Сарапул, Кизнер, Глазов, Грак, Красногорск палан быдэн 15-16 центнер вож сиён люкаськемын. Секыт югдур Вавож, Вотка, Шаркан ёросъёсын — котькуд пудо йырзылы 6-8 центнер гинэ дасямын.

Куд-ог ёросъёсын бусыосысь музъемъёссы ик пильылӥськемын ни. Тужгес зол шуге-леке вуэмын Алнаш ёросын — татын гужем ӵоже зор-кот воксё кӧня ке гинэ усиз. Бусыос ӵышкем кадесь. Ёросэн кивалтӥсь Алексей Семенов пусъемъя, юос сутэмын кадь ик, турын шер-тур. Бусыосысь музъем куасьмемын, интыен-интыен 30 сантиметр мурдалае пильылӥськемын, висъёслэн пасьталазы 3 сантиметрозь вуэ ни. Нокыӵе зор уз юртты ни, шуо. Нош ваньмыз дыраз но вылӥ сортъем кидысэн киземын вал. Ю тысь гинэ 1 сюрс 800 гектар муосы согемын. Бусыос тырмытэк, эшшо 610 гектар Татарстанысь но Грак ёросысь бусыосы кизизы вал. Но ӟечлыкез отын но, татын но ляб — музъем котькытын огкадь ӝуамын. Кунлэсь кыӵе ке юрттэт басьтонзылы гуртоослэн осконзы ик ӧвӧл.

— 2013-тӥ арын бусыосмес страховать каримы вал. Али ке но судъёстӥ ветлӥськомы, нокыӵе компенсация басьтэммы уг луы, — вера Алнаш ёросысь ӟеч кидыс будэтонъя «Оркино» хозяйствоен кивалтӥсь Марина Захарова. — Компенсация тыронтэм вылысь страховой компаниысь юристъёс мар но уг малпало. Соин ик туэ страховать ум каре шуыса малпамы. Юнме уксё кисьтэм луэ ук. Но югдур верантэм секыт. Турынэн потомы ай. 2020-тӥ арын дасям запасъёсмы но вань на. Куромы но кылемын. Ар кыллем сиёнлэн ӟечлыкез начаргес ик, дыр, но со ке но вань. Али пудо сиён кулэяськеммылэсь ӝынызэ гинэ дасямы ай. Тросгес мед люкаськоз шуыса, зерновойёсмес зерносенаже турнаны кутскимы ни. Силос но сенаж басьтыны трослы дуногес усёз ук, ю тысь сярысь.

Кӧс 2010-тӥ арын Киров но Пермь палась 6-7 миллион манет тыр сиён нуллӥмы. Кызьы пудомес утьыны быгатӥмы, али но паймисько. Басьтэм сиёнлэн берекетэз уг луы. Туэ сыӵе ик югдуре медам вуэ шуыса вӧсяськиськом. Но огзэ али ик валасько: ю тысьлэн дуныз туэ туж зол тэтчоз. Толалтэ ик 1 килограмм юэз, 5 манетэн интые, 13 манетэн вузазы. Чувашия, Марий Эл, Киров, Татарстан — котькытын засуха. Милям гинэ но, ӟеч выжыысь кидыс будэтӥсьёслэн, ю-няньмылэн шепез вакчи, шымырскемын. Азьвыл арлы быдэ 8 миллион манет тыр чебер кидыс вузаны быгатӥськомы вал. Туэ фуражлы тырмиз ке, ярам. Тысь векчи кылиз ке, асьмелы кидыслы но дасяны сое ум дӥсьтэ — киземез уз ӝужа, энергиез уз тырмы. Со ваньмыз нош расход.

Ӧркагуртын, 7-10 нунал ортчыса, ю тысь дасяны кутскозы. Уборка дыръя медаз гинэ зоры, шуо гуртоос, соку воксё урожай люканы уз пӧрмы.

Елена Сараматова

Удмурт Дунне
By Удмурт Дунне 15 июля, 2021 11:26