Алнаш ёросысь Шайтангуртысь Людмила Васильевалэн кылбуръёсыз

Удмурт Дунне
By Удмурт Дунне 28 июля, 2021 16:05
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
Туспуктӥз Максим Егоров
Улон сюрес

Анае индылӥз —
Мон ӧй кыл верамзэ.
Улыны дышетӥз,
Малпаса ортчемзэ.
Аслэсьтыд шат пегӟод?
Коть дунне пуме мын —
Быръёно сюресэд
Мертамын-чотамын.
Ву пыр, тыл пыр ортчи,
Чиданэ чигылӥз.
Улонэд шат капчи?
Думемез — пертчиськиз.
Анайлэн верамез
Уз но поты сюлмысь.
Ӝутскылӥ инбаме,
Шурдылӥ но — ӧй усь.

Толлоезтэк ӧвӧл ӵуказеез

Толлоезтэк ӧвӧл ӵуказеез,
Нош тол куазьтэк ӧвӧл вылез тулыс.
Ортчемезтэк уз луы азьланез,
Шумпотонэ поттэ синкылиез.

Куддыр, кӧмысь потэм чипы сямен,
Мон шунасько яркыт шунды улын.
Жильы йылысь пересь пуны сямен,
Мон вузӥсько секыт кайгу пӧлын.

Йӧзор улэ сюрем коӵыш сямен,
Мон утчасько небыт, югыт инты.
Катьтэммыса, вунэтыса ваньзэ,
Ӟыгырскисько матысь эше борды.

Толон вал со, туннэ мон — сюресчи,
Сюрс ар азьлань ӧтиз монэ сюрес.
Со сюреслэн пумаз вуо ачим —
Толлоезтэк уз лу ӵуказеез.

* * *
Инбамын пӧсь шунды пыжыку,
Ошмеслэсь мон юи дун вузэ.
Возь вылысь турынэз турнакум,
Чик ӧй шӧд нуналлэсь ортчемзэ.

Лушкемен тон пырид сюлэмам,
Мон ӧй шӧд сюлмысьтым ышемдэ.
Тӧл гинэ пельтылӥз пумитам,
Мон уг вить ни выльысь лыктэмдэ.

Нюлэскын весь силе ай кикы,
Ӵок ойдо — нош вуоз ай тулыс.
Котьмалэн но луэ ук пумыз.
Сись лӥял весь тэляз но… ӧз кыс.

Бус

Шур сьӧрысь возьёс кузя
Вӧлдӥсько бусъёс.
Азвесь сӥньыслэсь, лэся,
Чильпамын соос.

Шунды потэ но — сылмо
Чильтэро бусъёс,
Пурысь инбаме вӧлмо
Тури куараос.

Мыным ваньмыз ик тодмо:
Тэль, бусы, сюрес —
Удмурт шаере соин
Кошкыны уг лэзь.

* * *
Тэль вадьсысь ӵужалэс ӵук ӟардон
Пазьгиське кыдёке-кыдёке.
Со ӝуа кадь, пиштэ кадь тылын,
Шунытэз нош ӧвӧл малы ке.

Ма, шунды но тани ӝужалоз,
Сиосын ӟыгыртоз ай гуртме.
Сӥялскем омырез со шунтоз,
Нош ӝутоз-а куашкам мылкыдме?

Омыр кадь сӥялскем кусыпмес
Бен шунды но уз шунты ноку.
Лек кылын ӵушкаськом ог-огмес —
Ӵук ӟардон но пурысь кадь соку.

* * *
Малпанъёс, малпанъёс
Вуныло но ышо омыре.

Нуналъёс, нуналъёс
Люкасько но вутто дауре.

Пилемъёс, пилемъёс
Пазьгисько но сылмо инбаме.

Мӧзмонъёс, мӧзмонъёс
Чигтыло, бӧрӟыто сюлэмме.

Ыр тӧлъёс, ыр тӧлъёс,
Тӥ эн пельтэ шорам кезьытэн!

Тулысъёс, тулысъёс,
Мон доры берытске сяськаен!

Пужым

Татын эркын тӧлъёс шудо,
Гужем шунды пыже.
Гурезь йылын огназ будэ
Дас кык йыло пужым.

Татын куке вашкалаос
Йыр-пыд сётылӥллям.
Ветлын уг лу — котыр изъёс,
Татчы вегин васькам.

Оло, тросгес вайёс сэрен
Йыг-йыг сылэ пужым.
Лек сильтӧллы сётӥськытэк,
Аслыз люкам кужым.


Пичи дыр

Вунонтэм пичи дыры —
Сэргын пукись мунё, дыр, со.
Кузь йырсиё. Сутэр синъёс
Шорам учко, учко мусо.

Вунэтонтэм пичи дыры
Шудэ, дыр, пичиос пӧлын.
Чималиен пеган дыръя
Пыдло-пыдло, дыр, пегӟемын.

Вунэтонтэм пичи дыры
Тусбуеным рамка сьӧрын.
Кык аресъем нуныкае
Сылэ со синучкон азьын.

Тӥни кытын пичи дыры —
Сэргын пукись мунё кадь со.
Ӵыжыт бамо. Сутэр синъёс
Шорам учко, учко мусо...


Сяськаё тулысэ

Тулысэ, сяськаё тулысэ,
Тон лыктӥд тюрагай кырӟанэн.
Нош кин ке аратэм тылскемзэ,
Ӵукназэ пумитам ӟардонэн.
Егитъёс тыл дурын пукиллям,
Выль тулыс яратон, дыр, ваем.
Уӵылэсь чирдэмзэ кылзӥллям.
Пӧсь мылкыд кадь, ӝуам горд тылскем.
Шаере, вордӥськем шаере!
Тулысэн тон эшшо шулдыргес.
Аныкай музъеме, чебере,
Ӧвӧл, дыр, тынэсьтыд дуноез.

Купанча

Возь вылэ усьтӥськем ӵуж сяська,
Шундылэн сузэрез — купанча.
Вуюись но татчы, дыр, васька,
Сяськалэсь буёлзэ со бича.

Карнан кадь куасалскем инбаме,
Ву юэ шапыкен куар вылысь.
Усьтоно шат тыныд сюлэмме,
Тон кылод-а монэ кыдёкысь?

Малпанме мон тыныд верасал —
Мылкыды ӵуж сяська кадь чебер.
Тон доры лобӟыса мынысал —
Тодӥсько: чик ӧвӧл на ай бер.

Кинлэн ролез?

Кинлэсь меда шудӥ рользэ?
Ачим уг тодӥськы кинлэсь.
Вань карыса ӧвӧлтэмзэ,
Ӧжыт басьтӥ-а улонлэсь?

Маска сьӧрысь бездыт синъёс
Кинэ меда нош утчало?
Татын, льӧль занавес сьӧрын,
Кинлы рольёс ни люкыло?

Ӧй дугдыты ворттӥсь валэз,
Улӥ шыпыт ас дуннеям.
Уз луы ни роле вылез,
Сцена лыктоз на вӧтъёсам.

Удмурт Дунне
By Удмурт Дунне 28 июля, 2021 16:05 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<