Омырын — ӝокыт, сюлэмын — шуныт

Удмурт Дунне
By Удмурт Дунне 29 июня, 2021 16:23

26-тӥ июне Вавож ёросын ортчиз Гербер шулдыръяськон. Ёрос центр но Уё-Докья вискысь паськыт бусы пачылаз уно куноосын. Маин вавожъёс паймытӥзы, кыӵеен Гербер кылёз удмурт калыклэн сюлэмаз?

Паськыт бусы тырме калыкен

Омыр ӵукнаысен ик 30 градусозь ӟырдаз ни кадь, но вавожъёс тае чик уг шӧдо, кожалод: котькуд куноез сӥе-дано пумитало тангыра выллем лэсьтэм бадӟым капка дорысен — кырӟало-верало, экто, перепечен, турынлэсь парем чаен куноято. Капка вамен потыку, котькудӥз тангыра борды шуккыны, та интыосысь кузёосынызы — удмурт инмаръёсын — ӟечбуръяськыны быгатэ. Озьы нырысетӥ минутъёсысеныз ик адӟиське: вавожъёс быгато куно пумитаны.

Куноос нош кыӵе чебересь! Данакез — удмурт дэремъёсын. Троссэ делегациосты дӥськутсыя валаны луэ, кудпалась лыктӥллям — Пичи Пурга, Кияса, Алнаш, Шаркан котырысь, уйпал ёросъёсысь…. Нимысьтыз ӧтем куноос пӧлын — Пермь, Свердловск улосъёсысь, Татарстанысь, Башкириысь но Удмуртилэн палэнысьтыз мукет интыосысь вуэмъёс. Син сузёнтэм бусы пумен калыкен тырме.

Герберез сиё-дано усьтытозь час пала кылемын на, нош котыр ӵаш вазе ни. Капкаос дортӥ ортчись нырысетӥез ик урам ВДНХ-ен ӵошатымон. Мае но отчы потӥллямтэ шаерысьтымы кибашлыос — куролэсь, пулэсь, горд сюйлэсь, суллэсь лэсьтэм уно арбериос. Синъёсты мальдыто чырты весьёс, пелюгыос, суйпоскесъёс… Куд-огез басьтэ удмурт дэрем, пырак татысен ик сое дӥсяса, шулдыръяськыны кошке. Ӧжытак пыдлонгес чуренак интыяськиллям воршуръёслэн азбаръёссы, бусылэн мукет палаз пуртыосын ӝук пӧзе ни, саюлэ люкаськыны кутскизы крезен шудӥсьёс, усьтӥськиз коронавируслы пумит прививка пуктылон пункт…

Пӧлэсьтӥсько удмуртэз но ӟучез Ой, кыӵе тузӥ лэсьтэмын валтӥсь сцена! Нош ужрадэз усьтон кутскиз гинэ, со воксё улӟиз. Одӥг бадӟым хороводэ султо республикаысьтымы пӧртэм ёросъёсысь кырӟась-верась коллективъёс — «купанчаос», «вуюисьёс», «тюрагайёс», «ибырвесьёс», «зоринчаос», «мылкыдъёс», «жильыртӥсь ошмесъёс»… Соос мӧнья, бигра, докья, пельга, пия, какся воршудъёсысь луо — сокем пӧртэмесь но сокем огкадесь! Огазея соосты вашкала сям-йылолъёссэс утьыны, ужаны, нылпиоссэ будэтыны быгатэмзы. Люкаськем калыкез сӥлы карыны пото элькунысьтымы валтӥсь кивалтӥсьёс.


— Дуно куноос! Вань сюлмысьтым ӟечкыласько Гербер праздникен! — удмурт кылын вазиське Удмуртилэн Тӧроез Александр Бречалов.

Тӧро нимысьтыз пусъе гуртоослэсь ужаны быгатэмзэс, тау каронъёс сётэ шаерысьтымы азинскись гурт но фермер хозяйствоослэн кивалтӥсьёссылы. Веранзэ нош ик йылпумъя удмурт кылын — Ашальчи Окилэн кылбур чуръёсыныз:

Вордӥськем музъеме,
Вордӥськем шаере,
Туж мусо потӥськод,
Туж шулдыр адскиськод…

Тае кылыса, быдэс бусы тыр чузъясько кичабонъёс. Удмурт сямен калыклы вазисько Кун Думалэн депутатэз Андрей Исаев, Иж город Думалэн йырыз Олег Гарин. Мусо но сюлме пырымон чебер удмурт кылын гуртоосты ӟечкылало Кун Кенешысь депутат, «Удмурт Кенеш» огазеяськонлэн кивалтӥсез Татьяна Ишматова, йӧскалык политикая министр Лариса Буранова. Отӥяз но сцена вылысен пӧлэсьтӥськыса кадь чузъясько удмурт но ӟуч кылъёс — ваньмызлы валамон, сюлме пырымон.

Кузебай Герд — улэп!

Мар со шуд? Инкуазен тупаса улыны быгатон. Тани валтӥсь сцена вылысь экран пыр адӟиськом ни, кызьы вӧсяло ӝукез — вӧсясьёс шыпыт гинэ вазисько инкуазьлы, инмаръёслы тау каро кизьыны-гырыны луонлык сётэмзы понна. Вавож палъёсысь пересьёслэн тодэ ваёнъёссыя, ӵапак та интыосын вӧсьёсы пыриськылӥз, пе, тодмо удмурт югдытӥсьмы Кузебай Герд. Кузебай Гердэз калык уг вунэты. Со сярысь кырӟанъёс но гожтэ. Ма, тани ук Богдан Анфиногенов мытэ ни гурзэ:

Кузьма Павлович Чайников,
Герд Кузебай,
Тон али но милемын —
Мон сое валай!

Экран вылын — Кузебай Гердлэн «улӟытэм» туспуктэмез! Со улэп! Со калык пӧлын! Сыӵе оскымон адӟиське — сюлэм ик шымырске. Шуд ӧвӧл шат со — тонэ уг вунэто ке? Тани сцена вылэ потэ Нина апай. Со шудо кышномурт: пиналъёсыз ярамон ужын ужало. Шудо кышномурт кырӟа. Бен, куараез ляб кылӥське. Кин ке таӵе дыръя шуоз: сётэ кияз микрофон. Уг, уг сёто. Нина апай борды итӥсько матысьёсыз, ӵыжы-выжыосыз, эшъёсыз. Нырысь 3 мурт, собере 10, 20, 30… Тани Гербере вань люкаськемъёс кырӟало, 1 шудо адямилэн кырӟанэз быдэс улос тыр чузъяське ни:

Ум люкиське, ум люкиське,
Ноку но ум люкиське…

Нош ик ик сюлэм шымырске, пуш тыре удмурт калыкеныд данъяськонэн! Тодын но ӧвӧл ни кадь, шунды жалятэк пыже шуыса… Режиссёр Павел Поздеев ваньзэ туж валаса радъя. Шундыен гинэ кивалтыны уг пӧрмыты на.

Пырелэ, кунояське!

Удмурт воршудъёслэн азбаръёсазы пыриськод ке, потыны уд валаськы ни. Котькудаз ошылэмын воршуд пусъёсын ӵушконъёс, вӧлдэмын выжлёгетъёс. Гуръёсын вашкала рецептъёсъя пыжисько табаньёс, пуртыосын пӧзё ӝукъёс — одӥгъёсызлэн ӵӧж сӥлен, мукетъёсызлэн кунян яке така сӥлен. Котькуд азбарын — кузь-кузь ӝӧкъёс — пырелэ, кунояське!


— Ой кыӵе ческыт каляганяньды! — пӧрамез ушъяло уйпал дӥсьёсын пӧрмем нылкышноос. — Ма, ми сяртчы нянь пыжим вал, — пумитазы серекто вавожъёс. Вань мылкыд карисьёсты дышето вашкала киужъёслы — черсӥськыны, куиськыны, вӧй шуккыны, етӥн коканы…

— Кин ке пичияк юрттӥське вал мынам, — куре кӧын ю-тысь изыны дасяськем Ева Щвецова мӧнья воршудысь нылкышно.

Кызьы уд юрттӥськы! Мылкыд карисьёс соку ик котыраз люкасько. Данакез — туспуксьыны. Ева Швецова 35 ар пала «Колос» хозяйствоын осеменатор луыса ужам, пенсие потыса но, тэк пукыны уг чида. Вань ужрадъёсы пыриськыны турттӥсько, шуэ.

Какся азбарын «Бӧляк» — Ӟозлудысь коллектив — возьматэ шорт миськон сям-йылолэз. Керттэм пыдвылъёсын, ку пыдкутчанъёсын лыктэмын.

— Соос пӧсьлы чик уг ӝожтӥсько, — вера калык ансамблен татчыозь кивалтэм Геннадий Шутов. — Костюмъёссы соослэн сыӵеесь, вашкалаосмылэсь дӥсьсэ озьы возьмато. Нылкышноос соглаш карисько: пӧсь сярысь малпаськыны дыр ӧвӧл, пе!

Элина Кумачёва

Удмурт Дунне
By Удмурт Дунне 29 июня, 2021 16:23
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<