Дораз бертӥз пыраклы

Ангелина Снигирева
By Ангелина Снигирева 3 июня, 2021 10:52

28-тӥ куартолэзе Можга ёросысь Кватчиысь школалэн юртэз борды Маргарита Иванова тодосчиез буре ваён пул юнматӥзы.

Маргарита Иванова — история наукаосъя доктор, профессор, Удмуртилэн Кун премиезлэн лауреатэз. Вордӥськиз Можга ёросысь Вылӥ Кватчи гуртын. Семьязы бадӟым вал: 4 пиос но ныл. Маргарита — бадӟымез. Соин ик пичи дырысеныз анай-атаезлы вынъёссэ будэтыны юрттӥз. Атаез школаын ужаз, историен, наукаен тунсыкъяськиз, семьязылэсь выжызэ эскериз. Маргарита Иванова, атаез сямен ик, Можга педучилищеез йылпумъяз, 2 ар покчиосты дышетӥз, собере Удмурт пединститутысь историяя факультетын дышетскиз, Удмуртиысь шаертодонъя музейын тыршиз, аспирантураын дышетскиз. 9-тӥ — 13-тӥ дауръёсы уйпал удмуртъёслэн гурт котырзылы сӥзем диссертацизэ дасяз но наукая кандидат луиз, нош 1996-тӥ арын доктор ужзэ утиз.

Маргарита Григорьевна наука пӧлы выемын вал. Солэн нимыз люконтэм герӟаськемын вашкала удмуртъёслэсь улэм интызэс эскеронэн. Трос лэсьтӥз вашкала удмуртъёслэсь улэм интызэс — Иднакарез — эскерон понна. М. Ивановалэн ӵектэмезъя Глазовысь «Иднакар» музей инбам улысь музейлэсь статуссэ басьтӥз, нош 2020-тӥ арысен та музей-заповедник Маргарита Ивановалэсь нимзэ нуллэ.

Кылем арня пумын дано кышномуртэ вордскем гуртаз данъязы. Буре ваён пулэз юнматонэ пыриськизы «Удмурт Кенеш» огазеяськонлэн тӧроез Татьяна Ишматова но огазеяськонлэн Можга ёросысь ёзэныз кивалтӥсь Эдуард Петров, Можга ёрос йырлэн воштӥсез Марина Сарычева, Маргарита Григорьевналэн ӵыжы-выжыосыз, эшъёсыз, школаын дышетскисьёс но гуртоос, «Иднакар» музей-заповедникын ӵош ужам эшъёсыз. Та нуналэ М. Иванова сярысь трос ӟеч кылъёс веразы.

— Кылем арын берпум сюресаз келямы чебер, визьмо, азяз чурыт куронъёс пуктыны быгатӥсь, дӥсьтӥсь, мыло-кыдо, йӧно нылкышноез — Маргарита Ивановаез, — шуиз Татьяна Ишматова. — Нош солэн интыез туннэ но буш кадь. Солэн нимыз Россиын но, кунгож сьӧрын но тодмо вал. Тодосчилэн 300 пала наукая ужъёсыз, пӧлазы 16 монография но научно-популярной книгаос, учебникъёс, пособиос. Маргарита Григорьевналэн ужъёсызъя тодӥськом, кызьы улӥзы вашкала выжыосмы Чупчи котырын, кыӵе вал соослэн культуразы. Наукаен вырем сяна, удмуртлыкез ӝутонэ но мыло-кыдо пыриськиз. Юн кусып возиз журналистъёсын, соин котьма сярысь вераськыны луылӥз.

Шуныт кылъёссэс веразы Кватчиын улӥсьёс. Маргарита Ивановалэн Александр выныз котьку данъяськылӥз аслаз апаеныз. Анайзы улонысь кошкем бере со анайзэс воштэм, котькудӥзлы визь-кенешен юрттэм. Семьяязы ог-огзылэсь номыре ватылӥллямтэ, шумпотэ, яратоно апайзы доразы пыраклы бертӥз шуыса.

— Маргарита Иванова, педучилищеын дышетскыкумы ик, юн сямыныз но визьмыныз висъяськылӥз, — шуэ шаерчи Лев Смирнов. — Одӥг полаз пумиськон ортчытӥмы, ӵош дышетскем эшъёсмылы ваньмызлы жингыръяз но калыкез люканы быгатӥз. Азяз кыӵе ке ужпум пуктэ ке, одно ик сое быдэстэ вал, котькуд пумиськонмы шаертодон сярысь кенешонэн йылпумъяськылӥз. Нош кыӵе небыт куараез вал, кыӵе чебер кырӟалляз со…

Мария Мамонтова

Туспуктӥз Иван Тимофеев.

Ангелина Снигирева
By Ангелина Снигирева 3 июня, 2021 10:52
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<