25 муниципал округъёсын уломы

Ангелина Снигирева
By Ангелина Снигирева 1 апреля, 2021 16:45
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

30-тӥ мартэ ортчиз Кун Кенешлэн 31-тӥ сессиез. Депутатъёс эскеризы 33 ужпумез, со пӧлысь 25-ез герӟаськемын вал элькунысьтымы законъёсты воштонэн.

Кун Кенешысь депутатъёс законъёсы воштонъёс пыртӥзы.
Фото: udmgossovet.ru

Кыдатӥсь 26 ар

Сессилэн ужаз пыриськизы Кун Думаысь депутатъёс Андрей Исаев, Алексей Загребин, Правительстволэн Тӧроез Ярослав Семёнов но Удмурт Республикая валтӥсь федерал инспектор Сергей Панов. Кун Кенешлэн Тӧроез Владимир Невоструев сессиез усьтӥз ӟечкыланэн: 26-тӥ мартэ 26 ар тырмиз элькунмылэсь парламентсэ кылдытэм дырысен. Кылем арын та нунал пыртэмын вал шаерамы пусйиськись дано нуналъёс, праздникъёс пӧлы.

— Та дыр куспын депутатлэн мандатэз оскемын вал 401 адямилы. Котькуд ӧтчамысь депутатъёслы ас вакытаз сэрттоно-пертчоно луиз пӧртэм ужпумъёсты, — пусйиз В. Невоструев. — Куд-ог законъёс кунысьтымы одӥгаз улосын но ӧй вал на, нош Удмурт шаерын пыӵазы ни. Кылсярысь, 1997-тӥ арын кутэмын егитъёсын ужан политика сярысь закон. Бӧрысь ини асьмелэсь адӟем каризы мукет улосъёс. Удмурт парламент 26 ар ужатозь, шаермес азинтонлы кужмо инъет кылдытэмын: юнматэмын 1 сюрс 800-лэсь уно законъёс, пыӵазы пӧртэм удысъёсты азинтонъя 90-лэсь ятыр улос программаос. Но лэчыт ужпумъёсты макем ӝог сэрттыны-пертчыны быгатэммес эскериз кылемез — 2020-тӥез — ар, коронавирусэн нюръяськон. Экономикаез возён вылысь юнматэмын вал пӧртэм капчиятонъёс, калыклы котыр ласянь юрттэт сётӥськиз. Малпасько, ми та ныпъетэз вормим. Кылем ар асьмеды кыдатӥз.

— Кун Думаысь депутатъёс но Удмуртиысь Кун Кенешлэн тыршемез сярысь ӟеч кылын гинэ верало, — шуиз Кун Думаысь депутат Андрей Исаев. — Федерал законъёсты кутыку, соос кичӧлтонъёсынызы пото, законэз эшшо но пайдаёгес карон вылысь воштонъёсты ӵекто. Тани та вакытэ мынэ калыкез уже интыян сярысь законэ, Ужъя кодексэ ӵектэм воштонъёсты эскерон. Та уж борды рос-прос басьтӥськизы 5 улосъёс, пӧлазы Удмурт шаер но.

Владимир Невоструев Кун Кенешысь депутатлэсь удостоверенизэ но пуссэ сётӥз «КОМОС ГРУПП» огазеяськонлэн кивалтӥсезлэн вош­тӥсезлы Андрей Денисовлы: 28-тӥ мартэ со тужгес трос куара люказ Ижысь одӥг мандатъем 8 номеро Рабочий округын ортчем ватсаса быръёнъёсын. Депутатлэн та округъя мандатэз бушаз вал кылем арын сӥзьыл — Зоя Степнова улонысь кошкемен валче.

0 процентъем выт

Депутатъёс воштонъёс пыр­тӥзы выт тыронэн герӟаськем элькун законэ. Озьы выт тыронлэсь мозмытэмын луозы туэ 1-тӥ апрель бере улосамы ужбергатонзэс усьтэм адямиос — патент амалэз кутӥсьёс. Соос выт уз тыре 2 ар ӵоже. Паськытатэмын та капчиятон улэ шедись удысъёс но — соос 18. Выт тыронлэсь, кылсярысь, мозмытэмын луозы сюан радъясь-нуисьёс, пудо вандонэн но нуон-ваёнэн 
вырисьёс, очки тупатъясьёс, ю тысь, кеньыр изӥсьёс, горд сюйлэсь арбериос но гын сапег лэсьтӥсьёс.

— Та капчиятон иназ луоз кутскись ужбергатӥсьёслы, — шуиз Кун Кенешысь Бюджетъя, вытъёсъя но коньдон ужпумъёсъя ялан ужась комиссилэн кивалтӥсез Владимир Паршин. — Озьы соос вужерысь потозы, ужбергатӥсьёслэн лыдзы йылоз, таин валче выль ужан интыос кылдозы.

Депутатъёс воштонъёс пыртӥзы туэлы, озьы ик матысь 2 арлы чаклам бюджетэ. Коньдон ужпумъёсъя министрлэсь ужзэ бы­­дэсъясь Вера Су­хих верамъя, нацпроектъёсты пыӵатыны шаерамы уксё вуыны кулэ. Со кошкоз, кылсярысь, куашкан калэ вуэм юртъёсын улӥсьёслы выль инты висъянлы, коронавирусэн черламъёсты йӧнатӥсь эмъяськонниослы юрттонлы. Со сяна, 234 миллион манет чакламын «Дышетонэз азинтон», «Ужазинлыкез ӝутон», «Кышкыт луисьтэм но ӟеч сюресъёс» нацпроектъёслы. Кун ваньбуре пырись акциосты вузаса но, уксё люкаськоз: 327 миллион манет чакламын АПК-лы, 110 миллионэз — промышленностез азинтонлы. Воштонъёсты юнматэм бере элькун бюджетлэн доход люкетэз луиз 86 миллиард 700 миллион манет, расходъёсыз — 90 миллиард 400 миллион манет, дефицит — 3 миллиард 700 миллион манет.

Семьялэн данэз

Сессиын докладзэ лыдӟиз шаерысьтымы нылпиослэн правооссыя уполномоченной Ольга Авдеева. Со кылем арын ужамзылы йылпумъянъёс лэсьтӥз.

— Коронавирус вӧлмемен, калык ужзэ, доходзэ ыштӥз. Нылпиоссэс сюдыны-дӥсяны юрттэт курыса, уполномоченнойлэн аппаратаз вазиськизы 54 адямиос. Юрттэт сётэмын, — шуиз уполномоченной.

Со вие ик О. Авдеева сюлмаськемзэ вераз: семьялэн данэз арысь аре усе. 2019-тӥ арын 8 сюрс 487 семья кылдӥз, люкиськиз 5 сюрс 317-ез. Нош кылем арын 6 сюрс 290 сюан вал, куашказ 5 сюрс 147 семья.

— Семьялэсь данзэ ӝутон вылысь Дышетонъя но наукая министерствоен ӵош 2019-тӥ арысен 30 школаын нуыны кутскимы семьялы сӥзем урокъёсты. Бадӟым классъёсын дышетскисьёсты специалистъёс дышето семья кусыпъёсты юнматыны. Нош туэ элькунысьтымы загсъёсын усьтыны чакласькомы семьяослы визь-кенешен юрттонъя службаосты, — шуиз уполномоченной.

Нылпиосын ик герӟаське­мын вал сессиын эскерем мукетыз ужпум — анай-атайтэк кылем пиналъёслы кун ласянь юрттэт сётон. Та уж туэ 1-тӥ сентябрьысен выль сямен радъямын луоз.

— Сирота нылпиослы улон-вылонын юрттэт сётонъя куд-ог полномочиос оскемын вал интыосысь аскивалтонъя ёзъёслы. Табере соос выжтэмын луозы улослы. Со понна кылдоз 2 ёз: Нылпиослы социально-реабилитационной юрттэт сётонъя но Опекая но попечительствоя элькун центръёс. Озьы шаерамы кылдоз огъя система: анай-атайтэк кылем пиналъёслы юрттэт ӝоггес сётӥськоз, соослэн правооссы ӟечгес чакласькозы. Нырысетӥез ёз борды огазеямын луозы шаерысьтымы вань нылпи юртъёс. Нош кыкетӥезлы оскемын луоз, нылпиосты гинэ ӧвӧл, бадӟымъёсты но опекае басьтон, соослы улон-вылонын юрттэт сётон. Пиналэз вордыны басьтэмъёслы сётӥськись выплатаос но, сиротаослы улон интыен юрттон но таиз ёз пыр радъяськоз. Та центръёс ужалозы Калыкез улон-вылонын утёнъя но ужъя министерстволэн бурд улаз, — вераз калыкез улон-вылонын утён политикая но ужъя министр Татьяна Чуракова.

Юрттэт сётон уз кулэсмы

Депутатъёс юнматӥзы му­ниципал кылдытэтъёсты 
округъёсы огазеянэн гер­ӟаськем законъёсты. Тодады вайытон вылысь: 2019-тӥ арлэн пумаз Кун Дума юнматӥз интыосысь аскивалтонэз выль сямен радъянъя законэз. Шаерамы со вамышен-вамышен пыӵаны кутскиз ни кылем арлэн кутсконысеныз.

Шаерамы кылдозы 15 муниципал округъёс: Балезино, Вавож, Глазов, Грак, Дэри, Камбарка, Каракулино, Кизнер, Кияса, Красногорск, Пичи Пурга, Ува, Шаркан, Якшур-Бӧдья, Яр. Кун Кенешлэн кылем сессияз юнматэмын вал 10-эз. Озьыен, кылдыны кулэ 25 муниципал округъёс. Та выльдӥськонлы луыса интыосысь поселениосын уксё шыръяськоз — кулэстэмын луозы 2 сюрс 900 депутатъёс. Но калыклы юрттэт сётон азьвыл сямен ик радъяськоз. Котькудӥз округ ачиз тупатоз, кӧня луоз депутатъёслэн лыдзы. Интыосын та вакытэ ужась депутатъёс полномочиоссэс быдэсъялозы сентябрёзь — куара сётонъя огъя нуналозь. Ӵапак соку радъяськоз муниципал округъёсы выльёссэ депутатъёсты быръён.

Елена Никитина

Ангелина Снигирева
By Ангелина Снигирева 1 апреля, 2021 16:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<