Удмурт Тициан

Ангелина Снигирева
By Ангелина Снигирева 26 апреля, 2021 14:04

Ижысь Суредаськон искусствоосъя музейын оштолэзь но куартолэзь ӵоже ужалоз Удмуртиысь калык суредасьлэн Семён Виноградовлэн «Природный календарь» адӟытонэз (0+).

«Природный календарь» адӟытонын искусство но этнография
юн герӟаськемын.
Туспуктэм басьтэмын «Музей искусств» огинлэн «ВКонтакте» бамысьтыз

Выставка сӥземын суредасьлэн, этнографлэн, писательлэн юбилеезлы (туэ январе солы 85 арес тырмиз) но радъяське элькунысьтымы Гуртлэн арез улсын. «Природный календарь» адӟытон, Семён Виноградовлэн творчествоез кадь ик, этнографиез но искусствоез эшъяськытэ. Суредъёс сяна, татын люкамын суредаськон искусствоосъя музейысь калык киужъёс (кубоос, тусьты-пуньы, пӧртэм ужан тӥрлык) но Кузебай Герд нимо Йӧскалык музейысь вуж туспуктэмъёс. Суредъёс бордын ошылэмын пӧртэм ужъёсын (етӥн дасян, турнан вакыт, пӧраськон, киужъёс) тодматӥсь табличкаос.

Арлэсь бергамзэ, инкуазьлэсь, ужъёслэсь воштӥськемзэс 2 зал возьматэ. Нырысетӥяз пырыса, бусые шедиськод кадь — татын пӧсь шунды улын пыжем, пыд улын куажыртӥсь турынлэн зыныз вӧлске. Таиз люкет тодматэ тулыс, гужем, сӥзьыл ортчылӥсь ужъёсын, возьматэ та вакытъёслэсь чеберзэс. Егит нылкышно етӥн утялтэ, кышномурт пудо возьма, егитъёс ю кутсало… Мукет залын — удмурт юртъер: пӧсь гур, ӝомӟем (ӵыжектэм) табань, яркыт выж лёгетъёс, нуны сюан… Та суредъёс син азьын улӟо, зынъёсын-куараосын тырмыны ӧдъяло. Шӧдӥськод эстэм гур бордысь потӥсь пӧсез, кылӥськод эктӥсь кышноослэн дэремъёссылэсь шильыртэмзэс… Йӧно но лякыт учке «Анайлэн тусбуез» суредысь кышномурт, визь-нод сётыны ӧдъя кадь «Удмурт усточи К. Чирков» (сое С. Виноградов суредам М. Врубельлэн «Пан» суредэзъя).

Суредаськон искусствоосъя музейысь искусствовед Елена Стерхова вера:

— С. Виноградовлы туж кельшо Возрождение вакытысь суредасьёс, шуом, Леонардо, Тициан… Тани «Анайлэн тусбуез» туж тупа со вакытысь быдӟым суредъёслы. Художник анайзэ улӥысен учкыса кадь суреда, соин кышномуртлэн мугорыз быдӟым памятник кадь адске. Нош зэмзэ ке, суредасьлэн анаез лапег гинэ, 1 метр но ӝыны пала, вылэм. Возрождениын быдӟым, йылтэм-пумтэм луонэн (вечность) герӟаськем образъёс трос. С. Виноградовлэн но соос вань, со дыре ик ужъёсаз улонлэн ӝог ортчемез шӧдӥське. Шуом, бадӟым суредын коӵышлэн мышкыз, быжыз вань. Озьы суредъёсыз улэпесь адӟисько.

С. Виноградовлэн ужъёсыз шоры учкыса, зэм но шӧдӥськод улонлэсь ӝог воштӥськемзэ. Суредъёсаз возьматэм удмурт йылолъёс али гинэ ӵем ортчытъяськыло вал, пӧртэм котыр улонын ӵем кутӥськылэ вал. Пумен ваньмыз пӧрме музейысь экспонатъёслы, кыле этнографической книгаосы. Улонлэн воштӥськемезлы ӧпкелёнэз токма, дыр. Шумпотоно таизлы: кошкись узырлыкмес сыӵе чебер возьматӥз, дунне культурае пыраклы кельтӥз удмурт Тицианмы.

Анастасия Шумилова

Ангелина Снигирева
By Ангелина Снигирева 26 апреля, 2021 14:04