Одӥг герӟетын

Ангелина Снигирева
By Ангелина Снигирева 12 апреля, 2021 10:28
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Башкортоснанысь удмуртъёслэн 6-тӥ ӧтчамзы ортчиз

Башкортостанын удмуртъёслэн лыдзы ичи ик ӧвӧл — 21 сюрс 477 адями. Соос пӧлысь тужгес мыло-кыдоос, удмурт выжыоссы сярысь сюлмаськисьёс люкаськылӥзы ӧтчаме.

Ӧтчаме лыктэм куноосты пумитан
Туспуктэм: «Ошмес» газетлэн архивысьтыз

Татышлы ёросысь Вылысь Татышлы черкогуртысь культурая юртэ 150-лэсь ятыр делегатъёс вуизы: Башкортостанысь удмурт азьветлӥсьёс гинэ ӧвӧл, бускель улосъ­ёсысь но — Удмурт шаерысь, Татарстанысь, Пермь палъёсысь. Ӧтем куноос радын вал Башкортостан Республикалэн тӧроезлэн администрациысьтыз йӧскалык политикая ёзэн кивалтӥсьлэн воштӥсез Ильшат Ханов, Башкортостанысь парламентлэн (Курултайлэн) депутатэз, республикаысьтызы Фин-угор калыкъёслэн ассамблеяенызы кивалтӥсь Юлия Герасимова, Удмуртиысь Кун Кенешлэн депутатэз, «Удмурт Кенеш» огазеяськонлэн кивалтӥсез Татьяна Ишматова но мукетъёсыз.

25 ар талэсь азьло Башкортостанын ӧсъёссэ вӧлъяз Эшъяськон юрт. Со котыре биниськизы 50-лэсь ятыр калык огазеяськонъёс. Тужгес бадӟымъёсыз ужзэс радъязы, центръёс кылдытыса. Таос пӧлын вал Удмуртъёслэн историяя но культурая центрзы но. Ӵапак та центрлэн берло 5 ар ӵоже ужамезлы ӧтчамын йылпумъянъёс лэсьтэмын. Быръемын центрлы выль кивалтӥсь — Улын Балтач школалэн директорез Людвиг Зидымаков.

— Азьланяз эшшо золгес ужаны малпаськомы нылпи садъёсын: пиналъёс ӟучомыны кутскемын, удмуртсэ тодыса мед будозы. Мукетыз ужпум: удмурт кылъя дышетӥсьёсмы мӧйымо. Соин ик та удысэ егитъёсты кыскон сярысь сюлмаськоно луоз.

Матысь дыре радъяны малпаськомы «Чеберина» конкурсмес, озьы ик чакласькомы нимо-дано суредасьлэн Менсадык Гариповлэн вордскем юртаз музей усьтыны, со интыяськемын Татышлы ёросысь Бальзюга гуртын. Ужъёсмы лачак.

— Центрмы кылдӥз 1996-тӥ арын, — шуиз Башкортостанысь Удмуртъёслэн историяя но культурая центрзылэн азьвыл кивалтӥсез Салимьян Гарифуллин. — Та дыр ӵоже юн кусыпъёс тупатэмын кун но муниципал ёзъёсын. Бадӟым саклык висъяське анай кыллы: удмурт кылэз дышетэ 1 сюрс 253 нылпи (54,2 процентэз) 39 школаын. Нодъяло соосты 30 дышетӥсьёс. Школаосын ужало удмурт кылъя 21 кабинетъёс. Улын Балтач школаын 2012-тӥ арын усьтӥськиз национальной (удмурт) школаын азинлыко личностез будэтонъя экспериментальной площадка. Но анай кыллы висъям часъёс кулэсмо, оптимизациен йырин удмурт школаос пытсасько.

— Башкортостанысь удмуртъёсты палэнысь удмуртъёс шуыны ым ик уг пыры — Удмурт шаерен соос юн кусып возё, асьме дорын сямен ик, пӧртэм бадӟым ужрадъёс ортчытъяло: «Ӝужась кизилиос», «Чеберина» конкурсъёс, «Усточикар» лагерь но уно мукетъёссэ. Удмуртлыкен герӟаськем ужпумъёссэс вутто Башкортостанысь кивалтӥсьёс дӥне. Озьы удмурт школаоссылы басьтыны быгатӥзы удмурт кылъя тырмыт учебникъёс. Бадӟым саклык висъяло кадръёсты дасянлы но: уноез удмурт егитъёс целевой амалэн дышетско, специалист луыса, гуртъ­ёсазы берытскозы.

Ӧтчамын уно мукет ужпумъёс но ӝутэмын вал: сям-йылолъёсты пиналъёслы пыӵатон, удмуртлыкез СМИ-ос пыр возьматон, кадръёсты дасян, удмурт гимназиез усьтон. Ӧтчамын матысь 5 арлы чаклам резолюция кутэмын.

Елена Слащёва

Ангелина Снигирева
By Ангелина Снигирева 12 апреля, 2021 10:28
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<