Нюлэскы, инсьӧре яке шкаф пушкы?

Ангелина Снигирева
By Ангелина Снигирева 19 апреля, 2021 15:03

Ижлэн шораз огдырлы кылдӥз удмурт мылкыдын тырмем инты — «Галерея» адӟытон центрын усьтӥськиз удмурт суредасьёслэн Анна Образцовалэн но Чудья Женилэн (Евгений Бикузин) «Где прячутся удмурты?» выставказы (0+).

Чудья Жени но А. Образцова суредасьёслэн творчествоенызы тодматскыны луэ «Галерея» центрын.
Туспуктӥз Максим ЕГОРОВ

Кытчы ватско удмуртъёс? Малы соос ватско? Кинлэсь ке пегало шат? Пичи залэ пырыса, валамон луэ: удмуртъёслэн лушкем, шыпыт интызы — со пуш дуннезы. Шуныт тодэ ваёнъёсын, лякыт тусъёсын, гань-гань мылкыдъёсын тырмем инты.

Анна Образцовалэн лушкем дуннеез выжыкылъёслэсь куэмын. Солэн героиняосыз — удмурт наядаос (ву нылъёс) но дриадаос (нюлэс нылъёс) — аспӧртэм дуннеосы (тымет пыдсы, инсьӧре, ярдуртэм нюлэсъёсы) вуыло, та интыосысь изьверъёсын, пӧйшуръёсын эшъясько. А. Образцова быгатыса возьматэ нылкышнолэсь чеберзэ, солэсь либыт кужымзэ. Суредасьлэн акварельёсыз огдыре напесь но омыр кадь чильпырасесь.

Адӟытонэ поттэмын Чудья Женилэн пӧртэм сериосысьтыз ужъёс. Синмаськоно «Кыз» нимо суредъёсызлы: суредась куштӥськем пу арбериос вылэ (вашкала мудорлэн мышказ, сандыклэн урдэсказ, наличник вылэ…) кызъёсты суредам. Художник, кисточкаеныз кӧня ке пол гинэ зыралтыса, 
писпуосты кылдытэм пеймыт, пильылӥськем пу юдэсъёс вылын. «Ночной костёр на берегу Вятки» ужез но кылем-мылем пу вылын пӧрмытэмын, одӥг-кык буёл виштыосын улӟытэмын. Лад-лад гурт улонэз возьмато «Кенеро-нюлэсо» суредъёсыз, сураськем-пожаськем дуннее ӧтчало эктӥсь нылъёсыз, динозавръёслэн вакытысьтызы вуэмын кадь адӟытонэ «Азьдага» сериысьтыз изь­веръёс — пулэсь вӧлэм пичи пӧйшуръёс.

Заллэн сэргаз озьы ик сылэ совето вакытысь шкаф. Вылаз суредам кыз ӧте кадь учкисез: пыр шкаф пушкы. Мар отын — йылтэм-пумтэм нюлэс я кыӵе ке Нарния? Кинэ пумиталод шкаф пушкысь? Суредась Чудья Жени верамъя, адӟытон ӵоже та объектлэн пушкыз вошъяськылоз.

«Где прячутся удмурты?» выставкаез дасяны юрттӥз Туризмъя но киужъёсъя элькун центр — татын ужало Анна Образцова но Чудья Жени. «Галереяысь» куратор Тамара Михайлова верамъя, 2 центръёс азьланяз но адӟытонъёс ӵошен радъялляны ӧдъяло. Нош таиз выставка ужалоз 23-тӥ куартолэзёзь «Галереялэн» пичи залаз. Пыронэз дунтэк.

Анастасия Шумилова

Ангелина Снигирева
By Ангелина Снигирева 19 апреля, 2021 15:03
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<