Кырӟась семья усьтӥз музей

Ангелина Снигирева
By Ангелина Снигирева 1 апреля, 2021 15:05
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ува ёросысь Сям-Можга черкогуртысь Римма но Николай Капачинскихъёс культураын ужало, удмурт сям-йылолъёс пыр анай кылэз гажан мылкыд пыӵато. Кемалась ик ӧвӧл асьсэлэсь музейзэс усьтӥзы на.

Римма но Николай Капачинскихъёс

Капачинскихъёс кыкназы но Сьӧлта ёросын вордӥськемын, Римма Григорьевна Уть-Сюмси черкогуртын нош Николай Александрович Кӧпкалан. Тодматскизы бадӟым классъёсын дышетскыкузы — ӵемысь ӵошен пӧртэм ужрадъёсы пыриськылӥзы. Нылмурт чебер кырӟаменыз, ужрадъёсты нуыны быгатэменыз, нош пиосмурт крезьгуро инструментъёсын шудэменыз висъяськизы. Соин ужан сюрессэс кема утчаса ӧз улэ, Н. Капачинских кутскиз Уть-Сюмсиысь клубен кивалтыны, нош Римма Григорьевна, нылпи садын кӧня ке ужаса, клубе лыктӥз. 13 ар Уть-Сюмсись калык понна пӧртэм ужрадъёс ортчытъяса, кузпалъёс 2006-тӥ арын Ува ёросысь Сям-Можгала улыны выжизы

Римма Григорьевна клубен кивалтыны кутскиз, Николай Александрович лулчеберетъя кивалтӥсь луиз. Озьы 14 ар пала та адӟем карымон семья сям-можгаослэсь улонзэс
яркытгес карон понна сюлмаське.

— Татчы лыктыкумы, малпамы вал, гуртын ӟучъёс уло, но берло тодӥм, сомында ­удмуртъёс вылэм шуыса, — вера Р. Капачинских. — Соин ик анай кылэз, культураез утён ӧръя ужаны кутскимы.

Кузпалъёс, мыло-кыдо арлыдоосты люкаса, «Крезьгур» но «Сударушка» ансамбльёс кылдытӥзы. Мӧй­ыос пӧртэм пумо ужрадъёсы вуыло, вормонъёс басьтыло, удмурт калык культураез утьыны юртто.

Капачинскихъёс ог 30 ар талэсь азьло «Кырӟась сюлэмъёс» дуэтсэс кылды­тӥзы, соос ёросын гинэ ӧвӧл, элькунын но тодмо луо. 2013-тӥ арын Капачинскихъёс «Удмуртиысь устоез кырӟась семья» нимын пусъемын. Синмаськымон кырӟасьёс быдэс Россилы но тодмоесь ни. 2016-тӥ арын соос пыриськизы «Играй, гармонь любимая!» телепередачае. Сое лэсьтӥсьёс, мыло-кыдо луэмзылы синмаськыса, кузпалъёсты передачаын кырӟаны ӧтизы на 2018-тӥ арын. Соос, гур пул вылын эктыса, арган чузъяськем улсын «Арганчи» кырӟанэз быдэстӥзы.

Нош кылем арын Капачинскихъёс гурт клубын музей усьтӥзы. Отын 100-лэсь ятыр вашкала арбериос, ваньзэ асьсэ семьяоссы утьыса возиллям. Калык син азе поттэмын куиськон станок, кубо, нылпи валес, самоваръёс, тусьты-пуньы но трос мукетыз.

— Мон понна тужгес дуноез песянаелэн Степанида Попцовалэн киыныз куэм-чильпам ӵушконэз, — вераз Римма Григорьевна. — Таӵе музей усьтыны туж кемалась малпамы вал ини, аслам но, кузпалылэн но анай-атайёсмылэн чуланъёсазы сомында вашкала арбериос утиськыса кыллизы. Соосты калыклы возьматэм потэ, будӥсь нылпиос мед тодозы историез.

Капачинскихъёслэн музеязы пиналъёс ӵемысь вуыло. Школаын удмурт кылэз уг дышето. Нош музейын удмурт калыклэн историеныз, удмурт калык сям-йылолъёсын тодматско. Со сяна, нылпиос удмурт кырӟанъёсты дышето, кылбуръёс лыдӟо, инструментъёсын шудыны дышетско.

Ангелина Снигирёва

Ангелина Снигирева
By Ангелина Снигирева 1 апреля, 2021 15:05
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<