Азьланьзэ адӟыны быгатӥз

Ангелина Снигирева
By Ангелина Снигирева 8 апреля, 2021 15:57
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Та нуналъёсы 90 арес тырмысал удмурт тодосчилы, К. Герд нимо премилэн лауреатэзлы Карл Пономарёвлы. Ӝыны ар талэсь азьвыл со улонысь кошкиз. Озьы юбилейзэ пусъён пӧрмиз буре ваёнлы, тодэ ваёнъёслы, удмурт движенилы дунъет сётонлы.

К. Пономарёвлэн нылъёсыз И. Войтович но О. Бабушкина но кыкетӥ кузпалыз А. Романовская
Туспуктӥз Елена Миннигараева

Ижысь Эшъяськон юртын ужрадэз ортчытӥз «Удмурт Кенеш» огазеяськон. Быдэс зал тыр люкаськем адямиос Карл Александровичез пӧртэм ласянь «усьтыны» тыршизы. Тодмо тодосчилэн, политиклэн, общественной ужасьлэн улон сюресэз сярысь туж умой мадиз педагогика наукаосъя кандидат Валентина Ившина.

Глазов ёросысь Коблагуртын вордӥськем пияш висъяськиз мыло-кыдо, котькыӵе ужез валаса, визьмын­ лэсьтыны быгатэменыз. Кыӵе гинэ удысъёсын ӧз ужа со — «Комсомолец Удмуртии» газетлэн редакторез, шаерысьтымы Просвещениея министр, КПСС-лэн Удмуртиысь обкомезлэн секретарез, Вылӥ Кенешлэн депутатэз вал, туж трос лэсьтӥз наука удысын, гурт удысъя академиысь, университетысь кафедраосын кивалтӥз, студентъёсты дышетӥз-визьмаз, 11 монография дасяз.

Со сяна, Карл Александрович туж сюлмаськиз удмурт движениез ӝутон понна. 1989-тӥ арын сое Удмурт культурая обществоен кивалтӥсе бырйизы, 1992-тӥ арын — Фин-угор калыкъёслэн ассоциацизылэн сопредседателез луиз. 1990-тӥ аръёсы анай кылэз, шаертодонэз (национально-региональной компонент) дышетонъя стандартъёсты лэсьтон бордын тыршиз, пыриськиз Удмуртилэсь Конституцизэ, кун кылъёс сярысь законэз дасянэ.

Аресыз вал ни ке но, Карл Александрович буйганэз ӧз валалля, котьку азьлань мынӥз, тодэм-валамъёссэ рос-прос книгаосын пот­тӥз.

Кыӵе инты со но солэн гожъямъёсыз басьто удмурт калыклэн улоназ? Та сярысь мадизы Кун Думаысь депутат Алексей Загребин, филология наукаосъя кандидат Александр Шкляев, медицина наукаосъя кандидат Елена Ботникова, «Удмуртия» издательстволэн директорез Юрий Кузнецов но трос мукетъёсыз.

Атайзы сярысь туж шунытэн тодазы вайизы нылъёсыз: тодосчи Ирина Войтович, эмъясь Ольга Бабушкина. Соос ик тодосчилэсь книгаоссэ синпельлы вайизы, калык­лы кузьмазы.

Пумиськонэ люкаськемъёс, Карл Александровичлэн улэм-вылэменыз тодматскыса, выльысь бурдъяськизы, шумпотӥзы-бӧрдӥзы, кужмогес луизы.

Тросэз пусйизы: К. Пономарёв азьлань сюресэз адӟыны но мукетъёссэ сьӧраз валтыны быгатэ вал. Калыкмылэн улоназ солэн интыез азьланяз но умой-умой эскериськоз, валамон луоз, дыр, ай. Нош али, Карл Александрович сямен, туж секыт дыръёсы вань кужымез, мылкыдэз мыжыке кырмыса, ӵош ужаны мед быгатом.

Туэ «Удмурт Кенеш» огазеяськонлы 30 ар тырме. Соин валче удмурт движениын тужгес бадӟым пытьы кельтэм азьветлӥсьёслы сӥзем буре ваён, тодэ ваён ӝытъёс азьланяз но луозы на.

Елена Миннигараева

Ангелина Снигирева
By Ангелина Снигирева 8 апреля, 2021 15:57
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<