Шапык борды шапык — вормонъёсын зарезь

Ангелина Снигирева
By Ангелина Снигирева 2 марта, 2021 13:18

Александр Ившин кизили луон понна куасэн уг бызьылы

Февральлэн кутсконаз Финляндиын Вуокатти карын ӵошатскизы куасэн бызьылӥсь юниоръёс. Дуннелэн чемпионатэзлэн берпуметӥ нуналаз пиос классической амалэн 30 иськем ортчизы. Вормиз Якшур-Бӧдьяысь 18 аресъем Александр Ившин.

Якшур-Бӧдьяысь А. Ившин вормиз дуннеысь 
юниоръёслэн чемпионатазы.
Туспуктӥз Вячеслав ВЕДЕНИН

— Кызьы улонэд куасъёсын герӟаськиз?

— 1-тӥ классын дышетскыкум, папаелы верай, куасэн бызьылэме потэ шуыса. Но малы ке но со монэ капчи атлетикая секцие нуиз. Отын тренер вераз, мон укыр пичи на шуыса, ӧз куты.

Но ваньмыз малпамея ик луиз: спортшколаысь куасэн бызьылонъя секциез нуись Эдуард Владимирович Михайлов соку ик монэ дораз басьтӥз. Нырысетӥ нуналаз ик куас вылэ султытӥз, секциысь мукет пиналъёсын тодматӥз. Мон вазь куасэн бызьылыны кутски, ӵемысь пиналъёс секциосы 3-тӥ классысен ветлыны ӧдъяло.

— Кыӵе лыжникъёслэсь адӟем кариськод?

— Пичи дыръям туж висисько вал Удмуртиысь спорт­сменъёсмы понна, соку Леонид Виноградов но Максим Вылегжанин Россилэн сборнояз бызьыло вал. Выжыкылын кадь потылӥз, мынам элькунам кыдам спортсменъёс быдэс дуннеысь лыжникъёсты вормыло шуыса. Кунгож сьӧрысь спортсменъёс но мылкыдме бугыртылӥзы, кылсярысь, Норвегиысь Петтер Нортуг но Мартин Сундбю, Швейцариысь Дарио Колонья. Али туж яра асьме сборнойысьтымы Андрей Мельниченко.

— Куасэн тӥ марафонъёс но, спринтъёс но бы­зьы­лӥськоды, пӧртэм амалъ­ёсын ӵошатскись­ко­ды. Кызьы нискыланы золгес яратӥськод?

— Мон вань гонкаосты яратӥсько, но кузь дистанциосты бызьылыны ӟечгес пӧрмытӥсько. Юниоръёслэн ӵошатсконъёсазы марафонъёс (50 иськемлэсь кузьгес гонкаос) ӧвӧл, тужгес но кузь гонкамы 30 иськемъем. 
Котьку но яратылӥ классической амалэн бызьылыны. Малпасько, чемпионатын вормонэ юнме шорысь ӧз луы. Со вал тыро-пыдо дасяськемелэн емышез.

Туэ нырысьсэ Россилэн сборнояз тренироваться кариськи, коньковой амалэн нискылан техникаме тупатӥ, малпасько, азьланяз коньковой амалэн ӵошатсконъёсын но вормонъёсы луозы шуыса.

 Вормемед бере астэ кизилиен шӧдӥд-а?

— Кыӵе мон кизили!? Вотэсын вормеме сярысь трос иворъёс вӧлмизы, журналистъёс юалляськыны кутскизы. Тодмотэм адямиос вормонэн ӟечкылало… Но мынам спортын сюресэ али гинэ кутскиз. Та вормон — зарезьысь пичи шапык гинэ. Кизили луон понна куасэн уг бызьылӥськы!

— 30 иськемез туж кема мыноно. Мар сярысь малпаське спортсмен та дыр ӵоже?

— Гонкае быдэсак зымиськод, мултэс малпанъёс йыре уг лыкто. Стартысь ми трос кузя кошкиськомы, спортсменъёс куддыр вылысьтызы вылазы усьыло, соин ӟеч сюрес, лыжня бырйыны тыршиськод.

Бӧрысь кин ке азьлань кошке, кин ке кыле. Соку мукет спортсменъёсты эскерыны кутскиськод, угось валамон луэ, кинэн тыныд отӥяз ӵошатсконо луоз: кызьы соос дасесь, куасъёссы умой-а мыно, кыӵе тактика быръё. Россиын ми дышемын старт бере шутэтскыса, дыртытэк мыныны — финишлы кужыммес кельтӥськомы. Нош дуннелэн чемпионатаз ӵошатскон старт бере ик кутске, кин ке исаськыса гинэ мынэ, кин ке нырысетӥ метръёсын ик мукетъёсызлэсь пегӟыны выре.

Нош гонка пумын ини вань кужымдэ сётӥськод — ваньзэс азьпалтоно, вормоно!

Финляндиын данъян ужрад дыръя
Туспуктэм басьтэмын А. Ившинлэн архивысьтыз

— Дуннеысь спортсменъёсын нырысьсэ ӵошатскид, дыр?

— Озьы шуыны луоз, та дырозь мон Удмуртилэн, Россилэн ӵошатсконъёсазы гинэ пыриськылӥ, Россия но Китай куспын ортчись соревнованиосы ветлэме вань.

Туэ Тюменьын юниоръёс понна вожвылъяськон радъязы, отын эскеризы, кинэ сборноямы кутозы но Финляндие чемпионатэ келялозы. Огаз гонкаын, 10 иськем ортчыса, 3-тӥ луи, нош 30 иськемын ворми. Озьы сборное шедем 8 шудоос пӧлын луи.

— Вань-а юниоръёслэн луонлыксы Россилэн «бадӟым» сборнояз шедьыны, Александр Большуновен артэ ӵошатскыны?

— Вань, но со понна трос ужано. Нылъёслы капчигес, малы ке шуоно соос пӧлын бадӟым конкуренция ӧвӧл. Нош дуннелэн кубокез понна бызьылӥсь пиос котькуд гонкаын ӟеч инты басьто, соос туж кужмоесь, соосты егитъёсын воштыны мугез ӧвӧл.

Но ми понна но Россиын трос ӵошатсконъёс радъяськыло, нимаз кубок понна нюръяськонъёсмы вань. Ми шоры сак учко Куасэн бызьылонъя федерацилэн президентэз Елена Вяльбе, сборнойысь тренеръёс. Быгатӥсь, тыршись муртъёсты адӟо ке, бадӟым ӵошатсконъёсы ӧтё, 1-2 гонкаын бызьылыны, астэ оскалтыны луонлык сёто.

— Милям кунамы биатлон, куасэн бызьылонэн ӵошатыса, золгес вӧлмемын. Уг-а поты биатлонэ кошкемед?

— Ноку сыӵе малпанэ ӧз кылдылы! Кызьы асьмелэн луэ: ӵош кутско куасэн бызьылонъя секцие ветлыны. Бӧрысь адӟиське: кин ке классической амалэн нискыланы уг пӧрмыты, кин ке уг вормылы. Соку лыжник биатлонэз быръе. Нокинэ ултӥяме уг поты, но биатлон но куасэн бызьылон — пӧртэм удысъёс, котькудӥзлэн аслаз аспӧртэмлыкез. Сое валано.

Биатлонэз телевизоретӥ ӵемгес возьмато, валамон, малы. Учкисьлы тунсыко ӝыны часъем гонкаез, ыбылӥськемез адӟыны. Нош, кылсярысь, марафонэз лыжникъёс 3 но, 4 но час бызьыло. Сое кема учкыны акылес.

Асьмелэн элькунамы, мон малпамъя, биатлон но куасэн бызьылон артэ вамышъяло, куд-ог вакытъёсы ми биатлонистъёсты азьпалтӥськомы но кадь потэ. Тани учкомы Россилэн куасэн бызьылонъя сборноез шоры: бадӟым ӵошатсконъёсы пырисько Удмуртиысь Денис Филимонов, Сергей Ардашев, Дмитрий Баграшов. Арысь аре выль нимъёс кылӥсько. Нош биатлонъя сборнойын Ульяна Кайшевамы гинэ бызьылэ.

— Али бадӟым ӵо­шатсконъёсын Россилэн сборноез флагтэк но гимнтэк ӵошатске. Тӥляд но озьы ик вал-а?

— Гимнмы но флагмы ӧвӧл дуннелэн чемпионатъёсаз но Олимпийской шудонъёсын гинэ. Нош милемлы, юниоръёслы, удалтӥз. Асьме куншетмы улын бызьылӥмы, вормеме бере стадион тыр Россилэн гимнэз чузъяськиз.

Зэмзэ ке, та югдур туж валантэм, али но трос юанъёс кылдо. Зэм-а Сочиын ортчем Олимпиадаын асьме спорт­сменъёсмы допинг вылын бызьылӥзы яке ӧз-а — мон уг тодӥськы. Но али со вакытысь спортсменъёс уг ӵошатско ни, нош санкциосты выль спорт­сменъёс чиданы кулэ.

Гимнтэк но флагтэк ӵошатскиськод ке но, ваньзы тодо ук, тон Россиысь шуыса. Ӵапак та веранэн мылкыдэз ӝутыны тыршо. Котькуд спорт­сменлы кулэ, сое кунэзъя мед тодмалозы шуыса. Тон Россилэсь данзэ утиськод, странаед тыныд та ӵошатсконъёсы пыриськыны луонлык сётӥз. Ас кожад ке соревнованиосы лыктӥд, соку ӵок, флагтэк но яралоз.

— Кыӵе ужпумъёс али азяд пуктӥськод?

— Турттӥсько Россилэн кубокез понна вожвылъяськонын Удмуртилэн командаезлы юрттыны. Бӧрысь юниоръёс пӧлын ортчись Россилэн чемпионатаз пырисько. Сэре адӟом, пӧрмоз на-а мукет ӵошатсконъёсы вуылыны.

Нош бадӟым малпанэ, конешно, Россилэн сборнояз шедьыны, дуннелэн чемпионатъёсаз, Олимпийской шудонъёсын вормылыны.

Мария Емельянова

Ангелина Снигирева
By Ангелина Снигирева 2 марта, 2021 13:18