Удмурт сямен вераськоно но тӥни!

Ангелина Снигирева
By Ангелина Снигирева 30 марта, 2021 12:15

«Удмурт Кенеш» ога­зеяськонлэн азьвет­лӥсьёсыз вуылӥзы Татарстанысь Кукмор ёросысь удмуртъёс доры. Татысь удмурт кылъя дышетӥсьёсын, школаослэн директоръёсынызы пумиськон дыръя пӧртэм сюлмаськытӥсь ужпумъёс ӝутэмын вал.

Огъя шугъяськон

Татарстанын 23 но ӝыны сюрс удмуртъёс уло. Со пӧлысь 7 сюрслэсь тросэз — Кукмор ёросын (ёросын оглом 52 сюрс улӥсез).

Кукморысь удмуртъёслэн центренызы кивалтэ Ош-Юмья школалэн директорез Виталий Семёнов. Со рос-прос ивортӥз ёросын удмурт калыклэн улэмез сярысь.

— Кукмор ёросын 6 удмурт поселение, — пусйиз Виталий Геннадьевич, — 5-яз культура юртъёс вань. Удмурт школаос районын тужгес устоосыз лыдъясько. Нылпиосын ужаны быгатэммылы бигеръёс но паймо.

Озьы ке но бигер шаерын улӥсь удмуртъёслэн сюлмаськонъёссы но тырмыт. Доразы, пе, удмурт учебникъёс шуген вуо. Кызьы та югдурез сэрттоно?

«Удмурт Кенеш» огазеяськонлэн кивалтӥсез Татьяна Ишматова пусйиз: Удмуртилэн Конституцияз гожтэмын, республикалэн палэназ улӥсь удмуртъёсын но ужано шуыса. Соин ик школаосы учебникъёс келян ласянь шугъяськонъёс луыны кулэ ӧвӧл. Кытчы, кыӵе школаослы удмурт кылъя учебникъёс кулэ, гожтэт гожтоно министерствое.

Татарстанысь дышетонъя министерство вуоно дышетскон арлы удмурт школаослы удмурт учебникъёс басьтыны чакламзэ вераз ни. Но со понна школаос асьсэос заказ лэсьтыны кулэ.

Татьяна Витальевна пус­йиз, азьланяз, оло, кылъёс сярысь законэз улонэ пыӵатон программая учебникъёсты палэнын улӥсь удмурт пиналъёслы, школаослы, дунтэк но келяны луоз. Но та бордын ужано на.

Со сяна, кивалтӥсь тодэ вайытӥз: вань удмурт учебникъёс федерал экспертизаез ортчемын, соин соосын ужанъя нокыӵе шугъяськонъёс луыны кулэ ӧвӧл. Мукет ужпум, куке куд-ог школаос, дышетӥсьёс капчигес сюрес быръё — нылпиоссэс «Ӟеч-а, бур-а, удмурт кыл!» книгая дышетонэ выжто. Нош Татарстанын та ласянь кызьы?

Кукморысь удмурт кылъя дышетӥсьёс, директоръёс огымысь кадь шуизы: ми удмурт кылэз кызьы кулэ, озьы ик, капчиятонъёстэк, дышетӥськом, удмурт кылэз ляб тодӥсь пиналъёслы чаклам учебник вылэ выжон малпанамы ик ӧвӧл…

Озьы ке но Кукморысь пиналъёс пӧлын но ӟучомон вань, пе.

— Берло дырзэ проблема садикын шӧдӥськыны кутскиз, — шуэ Кукморысь удмуртъёслэн центренызы азьвыл кивалтӥсь Римма Зай­цева, — покчиосын отын удмурт сямен ӧз ке вераське, удмурт кыл бытмыса (бырыса) мыноз 
ни. Тани ми одӥг удмурт мероприятиысь бертӥськом. Азям удмурт песянай аслаз внукеныз мынэ. Соос клубысь удмурт ужрадысь берто, но куспазы ӟуч сямен верасько. Паймыса юасько: удмурт сямен уд вераськиське шат? Ма, пе, внуке Казаньын улэ ук. Отын анай кыл кулэ уз луы…

Римма Николаевналэн верамезъя, сыӵе шугъяськонэн удмуртъёс гинэ ӧвӧл, бигеръёс но пумисько.

Удмурт пинал быръе… бигер кылэз

Куд-ог бигер гуртъёсын луэ, пе, озьы но: анай кыл шуыса урокын удмурт пиналъёс бигерзэ дышетоно луо. Анай-атайёс шаплыгес кариськыны, анай кылзы удмурт кыл шуыны уг дӥсьто, лэся. Но туж тунсыко пӧрме: со удмурт нылпиос ик бигер кылъя олимпиадаосын нырысетӥ интыос басьто. Озьыен, огдыре ик 3 кылэз тодыса будэмзы соослы уг люкеты азинлыко луыны. Но, жаляса верано, асьсэ анай кылзэс сыӵе ик ӟеч дышетыны соослэн луонлыксы но, дырзы но уг ни кыльы.

«Удмурт Кенеш» огазеяськонлэн кивалтӥсез Татьяна Ишматова верамъя, тросэз шугъяськонъёс анай-
атайёслэн катъёсты тодымтэзы бордысь пото. Пинал анай кыл чотын удмурт кылэз лыдъя ке, солы удмурт кылъя дышетӥсь висъяськыны кулэ. Татын анай-атай чурыт кылзэ вераны быгатыны кулэ.

Нош ӟучомись удмурт садикъёсын ма кароно? Номыр выльзэ малпанэз но ӧвӧл, дыр, нылпиосын удмурт сямен вераськоно но тӥни, огкылэ вуо кукморъёс. Но вань удмурт воспитательёс тае валало меда?

Кукмор ёросысь удмуртъёс дэмлазы: воспитательёслы ужаны капчигес, валамонгес мед луоз шуыса, нимысьтыз пумиськон, семинар радъяны умой луысал. Эшшо — квалификациез будэтонъя курсъёс.

Удмурт кылъя дышетӥсь­ёслэсь, воспитательёслэсь тодон-валанзэс будэтон сярысь пыр-поч вераз «Удмурт Кенеш» огазеяськонлэн кивалтӥсезлэн воштӥсез Наталья Кондратьева. УдГУ-ысь Удмурт филологияя, финно-угроведениея но журналистикая институт та ласянь трос лэсьтыны быгатэ. Озьы ик огъя кужымен радъяны луоз тодмо удмурт азьветлӥсьёслы сӥзем научно-практической конференциосты но.

Паськытгес учконо

Нимысьтыз вераськон ӝу­­тэмын вал удмурт газет-журналъёслы гожтӥськон 
пумысен. Кукморысь дыше­тӥсь­ёс пусйизы, урокъёсазы куто дышетӥсьёслы чаклам «Вордскем кыл» журналэз, нылпиослы потӥсь «Кизилиез».

«Удмурт дунне» газетлы электрон амалъя гожтӥськы­ны луэ. Но люкаськемъёс пӧлысь нокин та сярысь уг тоды вылэм.

Кукморъёслэн кӧня ке арзэ ини асьсэ удмурт газетсы потэ — «Вамыш», солэн вотэсъёсын но аслаз бамез вань. Та газет интыысь удмуртъёслэн улэм-вылэменызы тодматэ. Удмуртлык шоры паськытгес ке учконо, «Удмурт дунне» газетэн кусып возьытэк уз луы. Со пыр но, удмурт соцсетьёс пыр но удмурт кылэн герӟаськем пӧртэм конкурсъёс сярысь дыраз тодыны луэ. Пумиськонын тае пусйиз «Удмурт нылкышно кенеш» огазеяськонлэн кивалтӥсез Елена Миннигараева.

Удмурт кылэз тодӥсьёс пӧлын трос гинэ конкурсъёс ортчыло. Шуом, 10 арлэсь кема ни «Удмурт нылкышно кенеш» радъялля «Пичи чеберайёс но батыръёс» вож­вылъяськон. Та сярысь Кук­­морысь удмуртъёслэн кы­лэм­зы вылэм ик. Но удмурт нылкышноослэн мукет проектъёссы сярысь татын уг тодо. Дышетӥсьёслы тужгес тунсыко потӥз «Удмурт нылкышно. XX даур» проект. Кукмор дышетӥсьёс но отчы вашкала туспуктэмъёссэс ке­ляны мылкыдзэс веразы. Но нылкышноос сяна, воргоронъёс но, семьяослэн тус­пуктэмъёссы но отын мед, пе, луысалзы. Угось ваньмыз со — удмурт калыклэн историез.

Кукморъёс туж мӧзмо удмурт писательёсын, поэтъёсын пумиськонъёслэсь. Ми, пе, туала удмурт писательёсты ум ни тодӥське, соин ик тодматскем, творческой пумиськонъёсы ветлэм туж потэ.

Пумиськонлы аспӧртэм йылпумъян лэсьтыса, Татьяна Ишматова тодэ вайытӥз: туэ ортчоз калыкез лыдъян-чотан. Тыршоно отчы туж мыло-кыдо пыриськыны, аслэсьтыд выжыдэ, кыӵе калыкысь луэмдэ возьдаськытэк вераны. Та ласянь калык пӧлын валэктон уж нуоно. Матысь дырлы ӵапак со тужгес бадӟым сюлмаськон луыны кулэ.

Елена Васильева

Ангелина Снигирева
By Ангелина Снигирева 30 марта, 2021 12:15
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<