Толлозэ валатэк, азьлань уд мыны

Ангелина Снигирева
By Ангелина Снигирева 1 марта, 2021 09:28

Туэ милицилы 100 ар, сюрес вылын кышкытлыклэсь утиськонъя инспекцилы 85 ар тырме. Трос аръёс ӵоже ГАИ-ын ужамын Владимир Хомяков, МВД-лэн дано ветеранэз.

ГАИ-ысь ветеранъёслэн кенешсы: В. Дзюин, В. Афанасьев, 
В. Хомяков, Н. Пастухова, В. Максимов
Фото Владимир Хомяковлэн архивысьтыз

Владимир Алексеевич вордскемын Ижевскысь бад­ӟым семьяын, со 6-тӥ пинал. Дышетскыкуз ик спортэн эшъяськем, пыдын но куасэн бызьылэм, синмаськем биатлонлы. Отӥяз Удмурт кун университетысь мугорез кыдатонъя факультетын тодон-валан люкам. Армиын службазэ ортчытэм Германиын.

Армиысь бертыса, Владимир Хомяков «Ижпланета» клубын биатлонъя тренер вал, бӧрысь 7 номеро школаын физкультурая урокъёсты нуиз. Улоназ ваньмыз вань ни кадь, семьяез, нылпиосыз, нош сюлмыз ялан кытчы ке куриськиз. 1980-тӥ арын тодмоосыз ӵектӥллям югдурез утён удысэ вамыштыны, отын, пе, спортсменъёс кулэ, пӧртэм ӵо­шат­сконъёс ортчыло.

— Автомобильной инспекцие ыстӥзы, — шуэ В. Хомяков. — Туннэ но син азям пуксе нырысетӥ авария. Ува тракт вылын автобус но ЗИЛ-133 машина шуккиськизы, автобусын 8 мурт пуке вылэм, 1-ез луло кылиз, мукетъёсыз ӝуазы. Али со сюресъёс вылын шуккиськон учыръёсы «скорой», спасательёс пото, нош соку ГАИ-ысь инспекторъёс гинэ потазы, асьмеос ик, машина утчаса, кулэм яке вӧсь луэм муртъёсыз больницаозь нуиськомы вал.

Вазенгес машинаос но ичигес вылӥллям. Со сяна, котькуд предприятиын транспортной дружина ужалляз. Озьы ГАИ-ысь котькуд инспекторлэн 5-15 юрттӥсьёсыз — калык инспекторъёс — вылӥллям. Соос инспекторъёсын ӵош нуналлы быдэ рейдъёсы поталлям, водительёсты эскерылӥллям. ГАИ-ын ужам на нимысьтыз кылдытэм медицинской группа. Соос но районъёстӥ рейдъёсын вет­лӥл­лям.

1998-тӥ арын ГАИ луиз ГИБДД, 1999-тӥ арын Ижын ГИБДД-лэн выль юртэз усьтӥськиз. Отын музей кылдытэмын вал. 2002-тӥ арысен ветеран огазеяськонэн кивалтӥсь Владимир Хомяков верамъя, музей — со историез гинэ ӧвӧл, ужам ветеранъёсыз сӥ­лы карон. Владимир Хомяков али но одӥг нунал но тэк пуконэз уг тоды, ӝӧк вылаз бадӟым блокнотэз, отчы котькуд ветеранлэн вордскем нуналыз гожтэмын. Праздникъёсын ӟеч­кы­лам, пӧртэм кенешонъёс, конкурсъёс ортчытъям сяна, будӥсь пиналъёслы Атыкай музъеммес гажан мылкыд пы­ӵа­тон сярысь но сюлмаське. Та дыре ваньмыз-ӧвӧлэз 250 пала ветеранъёссы. Соос спортэн эшъяськон сярысь но уг вунэто. Кылсярысь, югдурез утён удысысь ветеранъёслэн спартакиадаязы ГАИ-ысь ветеранъёс — Андрей Жуйков (биатлон), Наталья Афанасьева (капчи атлетика), Радик Бадретдинов (многоборье) но мукетъёсыз — котьку но вормисьёс радэ шедё. Ветеран огазеяськон ӵектэмъя, 2011-тӥ арын ГИБДД-лэн азбараз усьтӥзы ас ужзэс быдэстыкузы бырем сотрудникъёсты но Быдӟым оже пыриськем инспекторъёсты буре ваён мемориал. Владимир Хомяков ялан сюлмаське, егитъёс, пе, толло нуналэз, тупаса улон кузьмасьёсыз медаз вунэтэ вылэм, сотэк азьлань мынэмлэн пайдаез уз шӧдӥськы.

Валентина Емельянова

Ангелина Снигирева
By Ангелина Снигирева 1 марта, 2021 09:28