Кышномуртлэн улонэз — пужыё айшет

Ангелина Снигирева
By Ангелина Снигирева 5 марта, 2021 10:27

Куэм, пужъятэм, чильпам, сӥньысэн биняса лэсьтэм турлы айшетъёсты адӟыны луэ Калык творчествоя элькун коркалэн адӟытон залаз. Быдэс март ӵоже татын мыноз «Ваньмыз кутске айшетысен» выставка (0+).

Удмурт нылкышно дӥсез син шоры пуктыны уг луы айшеттэк. Солэн туж бадӟым кужымез: уте но, ватэ но, тыро-буро улон но сӥзе. Нимыз но кӧня ке пумо: уйпалъёс азькышет нимало, лымшор палъёсын айшет яке арӵет шуо.

Вашкала дыръёсы удмурт нылкышноос котьку айшетэн ветлылӥзы. Пичи дыръязы нылъёслы сое ӧз керттылэ. Но будэмъяз нылашлы но кусказ айшет думылӥзы ни. 3, 7, 12 арес тырмонзылы соослы выль айшет кузьмаллязы.

— Тужгес чеберез айшет луэ вал али гинэ бызем нылкышнолэн. Отын туж трос пужыез, клеткаез, яркыт буёлъёсыз. Малы ке шуоно та айшет улын нылмурт нуллэ нырысетӥ нунызэ. Семья-
осыз возьмало, нылпи таза но чырткем вордскоз, выжызэс азьланьтӥсь луоз шуыса. Тани алнаш айшет вылын туж трос клеткаос. Со бусылэн, мулэн пусэз. Нош бызем удмурт кышномурт — со али гинэ гырем музъем. Айшет вылысь пужыос — солэн пушъетъ-
ёсыз, сяськаосыз, емышъёсыз, — шуэ калык киужъёсъя отделысь валтӥсь методист Наталья Прокопьева.

Нош макем турлыесь удмурт айшетъёс! Тани уйпал удмуртъёслэн азькышетсы куске керттӥське, лымшор палась кенакъёслэн айшетсылэн гадьыз вань. Котькудӥз чебермамын пужыосын. Соос но валаса, радызъя пуктылэмын: бызем кышноос воршуд пужызэс кельто вал, одно ик луыны кулэ кышномурт но воргорон выжыослэсь огазеяськемзэс возьматӥсь пужы.

Ваньмызлэсь висъясько калмез айшетъёс. Кылсярысь, Сьӧлта но Ува палъёсын сюанлы шуыса юромо азькышет дасяллязы — со туж аспӧртэмлыко амалэн — сӥньысэн биняса (по выдергу) — лэсьтӥськиз. Та амал ӟучъёслэсь асэстэмын, озьы ке но удмуртъёс пӧлын мукет ёросъёсын огаз но вӧлмемын ӧвӧл, шуэ Наталья Прокопьева.

Но берлогес лымшор удмуртъёслэн но айшетъёссы воштӥськизы. Отчы чильпам ватсэтъёс пыризы. Нош быдэсак чильпам арӵетъёс шедизы Пичи Пурга ёросысь Гожня гуртысь. Туспуктэмъя 3-4 айшетэз улӟытӥзы Вуж Мӧнья гуртысь кибашлыослэн юртазы ужасьёс. Соос но та адӟытонэ вуттэмын.

Улон воштӥське ке но, удмурт калык дӥсьлэн кужымез уг сылмы.

Кин ӧз на шӧды тулысэз — шаплы дыртэлэ адӟытонэ! Турлы айшетъёсты адӟыса, шунды но ӵемгес поталля ни…

Елена Скворцова

Ангелина Снигирева
By Ангелина Снигирева 5 марта, 2021 10:27
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<