Котькуд чурын — асьмелы вазиськон

Ангелина Снигирева
By Ангелина Снигирева 1 марта, 2021 12:53

Матысь дыре шаерысьтымы вань муниципал библиотекаосы вуоз «Удмурт калыклы гожтэт = Письмо удмуртскому народу» (12+). Удмуртилэсь кунлыксэ кылдытӥсьёслэн произведениосынызы но элькунмылэн историез сярысь материалъёсын книга потӥз «Удмуртия» издательствоын.

Книгалэн вылбамыз

«Удмурт калыклы гожтэт» 4 люкетлэсь пӧрме. Одӥг вылбам улэ пыртэмын исторической документъёс, 1910-тӥ-1920-тӥ аръёсы гожтэм чеберлыко произведениос, элькунмес кылдытӥсьёслэн вакчи биографиоссы, та вакыт сярысь статьяос. Книгез люкась-радъясь Георгий Грязев пусъе: котькуд статья, кылбур, верос — со туала лыдӟисьлы гожтэт-вазиськон.

— Та книгаын возьматыны тыршим элькунмес кылдытӥсьёслэсь выль улон понна нюръяськемзэс, малпанъёссэс, та вакытысь мылкыдэз. Книгаез дасякум, весь учкылӥ удмуртъёслэн 1-тӥ съездысьтызы туспуктэм шоры. Татын огазе люкаськемын эсэръёс но, кадетъёс но, коммунистъёс но, дышетӥсьёс но, священникъёс но. Соосты огазеяз одӥг малпан — удмурт автономиез кылдытон. Малпанзы быдэсмиз. Со понна трос муртъёс тыршизы, жаляса верано, ваньзэсты та книгае пыртыны ӧм быгатэ, — шуэ Георгий Геннадьевич.

Книга кутске Кузебай Гердлэн «Мон удмурт» кылбуреныз. Бӧрысь лыдӟыны луэ история наукаосъя докторлэсь Кузьма Куликовлэсь удмурт автономилэн кылдэмез сярысь статьязэ. Собере «верасько» документъёс, отчётъёсысь люкетъёс (кылсярысь, удмурт коммунистъёслэн 1-тӥ конференцизылэн резолюциез но удмурт автономиез кылдытон сярысь декрет). «Кутскон сётӥсьёс» люкетын лыдӟыны луэ Ашальчи Оки, Степан Барышников, Трофим Борисов, Иван Векшин (Айво Иви), Григорий Верещагин, Кузебай Герд, Михаил Ильин, Яков Ильин, Даниил Майоров, Иван Михеев, Иосиф Наговицын, Максим Прокопьев, Иван Яковлев но Константин Яковлев сярысь. Тросэзлэн художественной произведениоссы, публицистической ужъёссы пыртэмын, куд-огез ӟуч кылэ берыктэмын. Книгалэн пумаз — история наукаосъя докторъёслэн Никифор Павловлэн но Карл Пономарёвлэн статьяоссы. Соос сӥземын удмурт комиссариатлы, асьме вакытысь удмурт съездъёслы, удмурт калыклэн сюресэзлы но луонлыкъёсызлы. Озьы книгалэсь бамъёссэ берыктылэмъя шӧдыны луэ 100 ар талэсь азьло пелляськись тӧлъёсты, син азьын, киноын кадь, улӟо ортчем даурысь муртъёс но соослэн сюлэмшугъяськонъёссы.

Книга егитъёслы но тунсыко

Нациосын ужан политикая министр Лариса Буранова шуэ:

— Та книгалэн туж шонер нимыз. Удмуртилэн кунлыкезлы 100 ар тырмонэз пусйыны дасяськыку, таӵе малпанэ вуим: кызьы 100 ар талэсь азьло автономиез малпазы? Кыӵе шӧмыз вал та вакытлэн? Сое тодон понна кулэ лыдӟыны та вакытэ тыршем муртъёслэсь кылъёссэс, гожтэтъёссэс, статьяоссэс…

Книгаен тодматскыны мылкыд карисьёсты Ижысь Эшъяськон юртэ ӧтчазы Йӧскалык библиотекаысь ужасьёс. Татын ик дасямын вал Удмуртилэн автономиез кылдон вакытэ гожъяськем муртъёслэн книгаосынызы, со вакытлы сӥзем литератураен адӟытон. Книгаен тодматсконэ вуылӥзы Ижысь культурая элькун колледжысь студентъёс, соос Кузебай Гердлэсь кылбуръёссэ удмурт но ӟуч кылъёсын лыдӟизы. Книга пумысен мылкыдзэ вераз Удмуртиысь калык писатель, филология наукаосъя кандидат, критик Александр Шкляев.

— Гожтэтъёс — 20-тӥ даурысь жанр, — вераз Александр Григорьевич. — Соку писательёс, гожтэтъёс гожъяса, вазиськылӥзы кивалтӥсьёслы но калыклы. Максим Прокопьевлэн книгаез но «Максимлэн гожтэмез» нимаське. Асьмелы но гожтэтъёс гожъяно на. Ми но весь шуиськомы: удмуртъёс, сайкалэ, дышетэ анай кылдэс — тазьы ик вазиськылӥз удмуртъёслы Кузебай Герд.

«Удмурт калыклы гожтэт» пумысен мылкыдзэ вераз Йӧскалык библиотекалэн кивалтӥсез Татьяна Тенсина:

— Та книга монэ бугыртӥз, трос юанъёсы кылдӥзы, куд-ог интыосыныз споръяськеме потӥз. Та дырозь таӵе книгаез лыдӟылэме ӧй вал: татчы пыртэмын архивысь документъёс но, политологъёслэн статьяоссы но, со дыре ик вакыт возьматэмын творческой интеллигенцилэн синмыныз, художественной произведениос пыр.

Книгаен тодматэ «Удмуртия» издательстволэн редакторез Г. Грязев

Печатья но ивор вӧлмытонъя агентстволэн кивалтӥсез Александр Валов пусйиз: Удмуртилэн кунлыкезлы 100 ар тырмонлы сӥзьыса, кылем арын печатламын шаермылэн историеныз, географиеныз, удмурт кылэн, культураен, калык творчествоен, традициосын тодматӥсь книгаос. Та сериез йылпумъя таӵе аспӧртэм книга: со огдыре исторической но, художественной но луэ, соин ваньзылы тунсыко потоз.

Анастасия Шумилова

Туспуктэмъёс: Йӧскалык библиотека

Ангелина Снигирева
By Ангелина Снигирева 1 марта, 2021 12:53
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<