«Инвожо» пиналме

By Ангелина Снигирева 1 марта, 2021 16:45

Ижысь «Восточный» культурая юртын «Инвожо» калык ансамбль нош ик возьматӥз аслэсьтыз концертсэ. Соин артэ калыкез шулдыртӥзы поръёслэн «Ош пеледыш» группазы но ӟучъёслэн «Ярмарка» фолк-группазы.

Ижысь Д. Герасимов но Ю. Горбушина
кырӟало «Инвожо» ансамбльын.
Туспуктӥз Людмила ЗАГРЕБИНА

Мон туж синмаськыса учки мӧйы артистъёс пӧлысь чебер веськрес нылаш шоры — эктӥз но, кырӟаз но. «Инвожо» коллективлэн кивалтӥсез Елена Шутова шумпотэ, доразы егитъёс лыкто шуыса.

Коллективын, зэм но, куд-огъёсыз 40 ар пала ветло ини выль кырӟан-эктонъёс дышетыны, асьме калыкмес сцена вылысен шумпоттыны, но коллектив мӧйыме, соин ик витёно пиналъёслэсь но вуэмзэс, — шуиз кивалтӥсь.

Кылсярысь, Данил Герасимов дышетске Ижысь культурая колледжын калык творчествоя отделениын 3-тӥ курсын, мылкыд карем удмурт коллективын диплом ужзэ быдэстыны.

— Мон удмурт сямен вераськыны уг быгатӥськы, нош дорын мынам ваньмыз удмуртъёс, удмурт кылэз ялан кылӥсько, соин ик удмурт кырӟанъёсты шугъяськытэк дышетӥсько. Озьы ик удмуртэн но вераськыны дышо ай, — шуэ егит артист.

Нош 56-тӥ гимназиысь 9-тӥ классын дышетскись Юлия Горбушина кемагес ик утчаны вырем удмурт сямен кырӟаны-вераны яратӥсь коллективез. Со ӝыны ар «Инвожо» ансамблен ӵош удмурт кырӟан-эктонъёсты быгатыса возьматэ ни сцена вылын.

Концерт бере нылашлэн песянаеныз но тодматски. Со пайме, внучкаез сокем удмурт коллективе выемын шуыса. Юля, нош кин тынад эшед, юасько, пе, котырад мон кадь арлыдоос ук. 60 плюс — со ваньмыз мынам эшъёсы, мыло-кыдо вера, пе, нылаш. Школа бере психологлы дышетскеме потэ, но удмурт коллективме уг кушты, шуэ гимназистка.

Юлялэн песянаез Алевтина Геннадьевна редакциямы вуылыса, газетлы но гожтӥськиз. Глазов палан вордскем песянай табере шумпотыса лыдӟе удмурт газетмес.

Людмила Загребина