Вуоное вамышъёс

Удмурт Дунне
By Удмурт Дунне 26 марта, 2021 11:08
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Дышетӥсьёсты, тодосчиосты, анай-атайёсты огазеян понна

18-тӥ южтолэзе, «Вордскем кыл» журналлэсь 30 аръем юбилейзэ пусйыса, Эшъяськон юртын «Вуоноез ачиз уз лыкты» ужрад ортчиз. Пумиськонэ 80-лэсь ятыр адямиос пыриськизы: Удмуртиысь но Татарстанысь дышетонъя управлениосысь ӧнерчиос, школаослэн директоръёссы, тодосчиос, методистъёс, дышетӥсьёс. Соос журналлэн ортчем сюресэныз но азинскон амалъёсыныз тодматскизы.

«Вордскем кыл» журналысь ужасьёс
Туспуктӥз М. Егоров

Кутскон

1990-тӥ аръёсы Россиысь бускель калыкъёсын ӵош удмуртъёслэн но асваланзы ӝужаны ӧдъяз. Шоркарысьтымы но мукет каръёсысь школаосын удмурт классъёс усьтӥськыны кутскизы, нош нылпи садъёсын — удмурт группаос. Таин валче дышетӥсьёс шуг-секытъёсын пумиськизы: ӧвӧл тырмыт учебникъёс но методикая юрттэт.

Со вакытэ калыкез дышетонъя министрлэн воштӥсез луыса ужаз педагогика наукаосъя кандидат Валентина Ившина. Со школаослы но нылпи садъёслы журнал поттон пумысен кичӧлтонэн потӥз. Озьы 1990-тӥ арын Калыкез дышетонъя министерстволэн бурд улаз «Вордскем кыл» журнал кылдӥз.

Нырысетӥ араз «Кенеш» журналын приложениез чотын 2 номерез потӥз, вуоно араз — 4 номер. Выль приложенилы редакторе юнматӥ-
зы литературоведэз Анатолий Уваровез, журналэз радъяны юрттӥзы писатель Галина Романова но методист Раиса Пчельникова. Вуоно араз шугъяськонъёс кылдӥзы: журналэз дасян-радъян понна кулэ вал коллектив но ужан инты. Озьы 1991-тӥ арын 15-тӥ шуркынмонэ редакция кылдӥз. Валтӥсь редакторе юнматӥзы Удмурт Элькунысь Вылӥ Кенешлэсь депутатсэ, «Советской Удмуртия» газетлэсь собкорзэ Илья Байметовез. Со люказ коллективез: Рашит Хайдаров валтӥсь редакторлэн воштӥсез луиз, Надежда Хайдарова — текст бичась но корректор. Выль арысен коллективе вуизы писательёс
Галина Романова но Анатолий Перевозчиков.

Со аръёсы редакция бадӟым саклык висъяз тодосчиослэн выль ужъёсынызы тодматонлы, удмурт кылмес городысь нылпи садъёсын пыӵатонлы но удмурт кылэз тодӥсьтэм нылпиосты анай кылмылы дышетонлы. Ӟучомыны кутскем нылпиослы программаосын но со вакытэ кылдытэм учебникъёсын ужанъя дэмланъёсын тодматон но палэнэ ӧз кыльы.

1990-тӥ аръёсы, кылдон но пыд вылэ султон вакытаз, журнал котыраз зэмос эшъёссэ, визьнодасьёсты (воспитательёсты) но дышетӥсьёсты, люканы быгатӥз, соос журналэз занятиослы но урокъёслы сценарийёсын тырмытӥзы.

Выльзэ кылдытон

2001-тӥ арын удмурт кыл элькунамы ӟуч кылэн артэ кун кылэн лыдъяськыны кутскиз, дышетон удысэ выль кун стандарт вуиз. Азьпала потӥзы пиналъёсты азинскытӥсь амалъёс.

Ваньмыз со журналлэн пуштросэз вылын шӧдӥськиз. Озьы 2002-тӥ арын кылдытэмын вал журналэз 2010-тӥ арозь азинтонъя концепция. Та ужен кивалтӥз редакцилэн кенешезлэн ёзчиез, педагогика наукаосъя доктор, профессор Геннадий Ушаков. Концепциын «Вордскем кыл» журналлэн валтӥсь ужпумез пусъемын — удмурт кылын дышетон удысысь валтӥсь ӧръёсын но ужан амалъёсын тодматон, предметэз дышетонэн герӟаськем тодон-быгатонъёс сётон. Соин валче журналын выль рубрика усьтӥське, отын дышетӥсьёслэн выль куронъёсъя но технологиосъя ужъёссы печатласько.

Та аръёсы нылпи садъёс, школаос но ёросъёс сярысь нимаз номеръёс пото. Озьы печатласько Пичи Пурга, Глазов, Дэбес, Можга, Шаркан ёросъёслы но Татарстанысь Бавлы ёрослы сӥзем номеръёс.

Лыдӟисьёслэсь куронъёссэс но кулэяськонъёссэс лыдэ басьтыса, редакция дасялляз педагогика мастерскойёсъя (2005), шаертодонъя (2006), удмурт художникъёсъя (2007) но мукет номеръёс. Та аръ-
ёсы ик пото дышетӥсьёслы но визьнодасьёслы нырысетӥ методикая юрттэтъёс: «Праздники в детском саду» (2009) но «Зарни шыкысъёсме усьтыса» (2010).

Оглом 2000-тӥ аръёсы дышетӥсьёс огдышем амалэн ужан ӧрысь потӥзы азинтӥсь дышетонэ, урокъёсазы но ужрадъёсазы пӧртэм туала технологиосты пыӵатыны кутскизы.

Вакытэн ӵош

2011-тӥ арын «Вордскем кыл» журналэз азинтонъя 2-тӥез концепция кутэмын. Сое 2020-тӥ арозь улонэ пыӵатыны чакламын вал. Редакция вань ужзэ сӥзиз удмурт кылэз нылпиослы пыӵатон бордын тыршисьёслы юрттонлы. Озьы воспитательёслы но дышетӥсьёслы пӧртэм ресурсъёс чакламын вал: журнал, методикая юрттэтъёс, редакцилэн вотэсъёсын огинъёсыз, конференциос, семинаръёс, котырес ӝӧкъёс, эчешонъёс но вожвылъяськонъёс.

Дышетонын выль федерал кун стандартъёс пыӵамен валче выль технологиосын тодматон азьланьтӥське. Азьвыл возьматъям технологиос борды ватсаськизы кейс-метод, пайдалыко лыдӟиськон технология но проектной задача. Редакциын ужасьёс нимысьтыз саклык висъяны кутскизы урокын ивортодэтэз выль сямен радъян амалъёслы.

30 ар ӵоже 26-лэсь ятыр пӧртэм методикая юрттэтъёс поттэмын, кылсярысь, удмурт кылъя, литературая но литературной лыдӟиськонъя урокез радъян вылысь конспектъёсын юрттэтъёс, пиналъёсты удмуртлыко будэтонлы сӥзем сценарийёсын «Пӧлэстӥськем вапумъёс» бичет, нылпи кырӟанъёсын «Лэйкась гуръёс» нотаосын книга, «Ресурсъёсын каталог: удмурт кыл но лулчеберет» справочной издание но мукет ужъёс. Ваньмыз соос туала дышетонлэсь куронъёссэ но лыдӟисьёслэсь мылкыдъёссэс чакласа дасямын. Соосты лэсьтонэ пыриськизы Удмурт Элькунысь тодмо дышетӥсьёс но визьнодасьёс. Туэ арлэн кутсконаз ик удмурт кылэз тодӥсьтэм нылпиосын ужан вылысь 1-тӥ класслы «Ӧтиськом удмурт кылъя уроке» методикая юрттэт поттэмын. Пособиез дасязы Якшур-Бӧдья гимназиысь покчи классъёсын ужась дышетӥсьёс, огъя редакциез Ирина Тимирзяновалэн.

Арысь аре вожвылъяськонъёс но мукет ужрадъёс радъясько. Кылсярысь, «Удмурт кылъя но литературая дышетӥсьёслэн методикая устоез ёрос огазеяськонзы» (2018), «Егит ӧнерчи но нодъясь» (2019) но мукет.

Озьы ик дышем сяме пыриз ини покчи классъёсын ужась дышетӥсьёс но дышетскисьёс понна «Питыран» элькун фестиваль. Таиз ужрад Якшур-Бӧдья ёросысь Мукши шор ёзо школаен ӵош 2018-тӥ арысен радъяськылэ ини. Туэ со онлайн амалэн ортчиз.

Лыдӟисьёсын кусыпъёсты юнматыны юртто визьнодасьёс но дышетӥсьёс доры потаса ортчылӥсь ужрадъёс. Берло аръёсы соос, нимысьтыз ужпумъёслы сӥзьыса, радъяськыло. Туэ пумиськонъёс сӥземын луозы горизонтальной шуиськись дышетсконлы но нодъянлы (наставничестволы). Таӵе ужрадъёс журналлэсь вакытэн ӵош азинскемзэ чакланы юртто.

21-тӥ дауре азинлыко луэ тодон-валанъёссэ вис карытэк будэтӥсь, быгатонлыкъёссэ волятӥсь, пӧртэм воштӥськонъёслы дась луись дышетӥсь. Воштӥськытэк кыле одӥгез: удмурт кылэз утён, нылпиослы сое тодыны мылкыд пыӵатон. Та ужпум бордын ужа «Вордскем кыл» журналлэн редакциез но.

«Вуоноез ачиз уз лыкты» форсайт-сессиын дышетӥсьёслэсь но визьнодасьёслэсь дэмланъёссэс кылзэм бере азьланезлы 5 бадӟым ужпум пуктэмын:

  1. Журналлэн пуштросэзлэсь ӟечлыксэ но турлы луэмзэ будэтон: удмурт кылэз но лулчеберетэз азинтон, этнокультура дышетон удысысь лэчыт ужпумъёсты сэрттон-пертчон; дышетон удысысь туала куронъёсын герӟаськем ужъёсты печатлан но мукет.
  2. Визьнодасьёслэсь но дышетӥсьёслэсь кулэяськонъёссэс лыдэ басьтыса, юрттэтъёс дасян.
  3. Азьланяз но конференциосты, котырес ӝӧкъёсты, семинаръёсты радъяллян. Муниципал кылдытэтъ-
    ёсын но дышетон заведениосын журналлэсь нуналъёссэ ортчытъян.
  4. Редакцилэсь сайтсэ но «ВКонтакте» мерлыко вотэсын огинзэ азинтон. Интернет-магазин но электрон библиотека кылдытон.
  5. Журналлэсь туала дизайнзэ лэсьтон.

Александр КОРЕПАНОВ, «Вордскем кыл» журналлэн валтӥсь редакторез

Удмурт Дунне
By Удмурт Дунне 26 марта, 2021 11:08
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<