Удмурт шаер люкиськиз «Удмурт Кенеш» огазеяськонлэн нырысетӥ кивалтӥсеныз, экономика наукаосъя докторен, профессорен Михаил Шишкинэн

Ангелина Снигирева
By Ангелина Снигирева 2 февраля, 2021 09:32

Куд-ог адямиос улонысь кошко ке, соосын валче кошке кадь быдэс даур. Одӥгез сыӵе адями — «Удмурт Кенеш» огазеяськонлэн нырысетӥ кивалтӥсез, экономика наукаосъя доктор, профессор Михаил Шишкин. Удмурт калыклэн визьмо пиеныз, азьветлӥсен люкиським арня талэсь азьвыл. Нош калык понна со озьы ик быдэс усьтӥськытэк кылиз кадь…

М. И. Шишкин
Фото: «Удмурт дуннелэн» архивез

Мынам атае — мынам пие кадь…

Михаил Шишкин сярысь тодэ ваёно ке, мар бордысен кутскыны ик паймоно. 100-лэсь трос книгаослэн авторзы, УАССР-ысь одӥгез бадӟымез кивалтӥсь — обкомлэн 2-тӥ секретарез, Удмуртиысь Тодосчиослэн огазеяськонзылэн нырысетӥ вице-президентэз, «Наука Удмуртии» но «Вести краеведов Удмуртии» журналъёслэн редакторзы, Удмуртиысь Шаерчиослэн огазеяськонэнызы кивалтӥсь, Россиысь фин-угор калыкъёслэн ассоциацизылэн нырысетӥ кивалтӥсез, «Удмурт Кенеш» огазеяськонлэн нырысетӥ президентэз…

Сое тодо вал Генсекъёс Л. Брежнев, К. Черненко, Ю. Андропов…

Вордӥськиз Михаил Иванович Можга ёросысь Бадӟым Сибы гуртын Быдӟым война кутскон азьын ик. Атаез нырысетӥ нуналъёсысен ик ожъёсы пыриськиз но чиптэм-чаптэм ышиз. Михаил Шишкин быдэс улонзэ атаезлэсь кытын мар быремзэ утчаз, но шедьтӥз сое 69 аресказ гинэ. Эшшо ке туспуктэмзэ но.

Ӵапак атайзэ шедьтэмез бере, 10 ар талэсь азьло, ми Михаил Ивановичен пумиськылӥм, интервью лэсьтӥм. Соку со пушкыз тырыса кадь вераз:

— Дырын-дырын учкылӥсько концлагерьын лэсьтэм туспуктэмез. Атаелы отын 25 арес. Мыным со пие кадь потэ, сыӵе мусо. Сомында улытозям, мон нырысьсэ аслым кельшись адямиез адӟи.Жаль, анае — Россиысь огез устоез етӥн будэтӥсь — кузпалыз сярысь номыр тодытэк ик, кулӥз. Нош атай улонысь кошкем нацист лагерьын 1942-тӥ арын… Асме монэ уж будэтӥз. Изъянтӥсько ке, песятае кыл кутытэ вал. Со, 2 война пыр потэм адями, пельтӥм кыскоз но шуоз: тодӥськод-а мар понна? Войналэсь азьло песятай сельсоветлэн председателез луыса ужаз. Соин ик дораз ялан ветлӥзы, визь-кенеш юаса, вазиськон дасяны курыса. Песятай данъяськылӥз: «Мон Вера Васильевна Толстаялэн дышетскисез!» Мыным но удалтӥз В. Толстаяен пумиськылыны.

Пичи дыръям песятае, шорам возьматыса, шуэ вал: мон та пиме министр каро. Пырак министр ӧй луы, но песятайлэсь оскемъёссэ быдэстӥ. Котьку но туж гажай ужез. Вань кивалтон интыосам ачим ӧй куриськылы, монэ дэмлаллязы, оскизы…

Туннэ обкомын, ӵуказе — ожын…

Колхозын ужась бордысен кутскыса, Михаил Шишкин пумен будӥз КПСС-лэн Удмурт обкомезлэн 2-тӥ секретарез дорозь. Элькунысьтымы одӥгез бадӟым кивалтӥсь. Нош собере сое витёнтэм вылысь келяло Афганистанэ командировкае.

1979-тӥ арын Афганистанлэн куремезъя отчы советской войскоос пыртэмын вал.

— Та сярысь ивор вуиз Выль ар азьын, 27-тӥ декабре, — тодаз вайылӥз Михаил Иванович. — Обкомлэн нырысетӥ секретарез В. Марисов гань-гань шутэтскиз отпускын. Нош мон, солэн воштӥсез, котьку сямен ик йылпумъяны тырши кылем ужъёсты. КПСС-лэн ЦК-аз ивортӥзы: Афганистанын революцилы пумит ӝутскемъёсын сэрен сюресъёс таркамын, связь быдтэмын, предприятиос сыло, реформаослы дурбасьтӥсь патриотъёсты ыбыло-быдто. Соку ик монэ пыртӥзы Афганистанэ келяно кандидатъёс пӧлы. Но та сярысь нокинлы вераны лэземын ӧй вал ай.

Нош 1980-тӥ арын августэ, ёросысь бусыосты эскерыкум, жингыртӥз В. Марисов. КПСС-лэн ЦК-аз луоно, пе. Уй ӵоже адӟиськыны вуылӥ Можга ёросэ анае доры, кузпалылэн анаез доры — Вавож ёросэ, ӵуказеяз ӵукна Москваын вал ни. 2 арня ортчыса — Кабулын. Кытчы партия келяз — отчы ик мыноно.

Озьы Михаил Шишкин валтӥсь советник луиз. Сое ыстӥзы тужгес секыт интые, Пакистанэн кунгож доры, отчы, кытын бугыръяськизы ожъёс.

Со вакытъёс сярысь Михаил Шишкин кызьы ке туж огшоры мадьылӥз. Но син азе пуктоно ке — юзыр-кезьыр луоно.

— Огпол ожгарчиосмы вайизы листовка. Со, пе, быдэс городын ошылэмын. Вирен зыраськем бумага вылын пусъемын: сыӵе-сыӵе адямилэсь — советниклэсь — йырзэ ваем понна 3 миллион афгани сётом. Возьматэмын тусы но. 3 миллион афгани — соку со 140 сюрс манет пала вал, туж бадӟым коньдон.

Ноку ӧй малпалля, сыӵе югдуре шедё шуыса. Но тыныд оскемын бере, кышкаса улыны уг луы — азяд пуктэм ужпумез быдэсъяно, номыр шоры учкытэк. Ялан кулон но улон вискын улыса, адями зол воштӥське, чурытгес луэ. Ыбылӥськемъёсын сэрен кыре потыны воксё уг луы, нош мыным Кандагар кузя ӵем ветлоно. Быдэс ар ӵоже вӧзам автоматъёсын адямиос гинэ вал. Огполаз вертолётмес уськытӥзы, монэн артэ пукись таджик переводчикез душман пуля вииз. Кулонлэсь кӧня ке сантиметр-миллиметр кеме кыльылӥ 9 пол. Кызьы луло кыли? Малпасько, дунне вылын тужгес визьмо адями — удмурт. Малы? Со вань малпанъёссэ уг вера, шыпак кариське. Нош вераз ни ке — меӵак ӵогоз. Визьтэм адями озьы уз выры, куаш поттыса улоз. Удмуртэз улон но, история но визьмо луыны дышетӥллям, — мадьылӥз Михаил Иванович.

Сюлэмаз — фин-угор дунне

Кандагарысь бертэмез бере Михаил Шишкин ужаз на обкомын, УАССР-ысь Министръёслэн Советсылэн тӧроезлэн воштӥсез, Госпланлэн председателез,

КПРФ-лэн республикаысьтымы секретарез вал. Гурт хозяйствоя академиысь агропромышленность комплекслэн экономикаезъя кафедраен кивалтӥз, экономика наукаосъя доктор луиз.

Тросэз уг ни тодо, но ӵапак Михаил Иванович удмуртъёслэн «Удмурт Кенеш» огазеяськонзылэн нырысетӥ кивалтӥсез вал. Со ик кылдытӥз Россиысь фин-угор движениез.

— Удмуртъёслэн ӧтчамазы, 1998-тӥ арын, «Удмурт Кенеш» огазеяськон кылдытэмын вал. Солы кивалтӥсе 7 муртэ дэмлазы. Ваньзы визьмоесь, нимо-даноесь. Съезд шуиз: куспазы мед вераськозы, асьсэ пӧлысь одӥгзэ мед быръёзы. Озьы ик каримы, — тодаз вайылӥз Михаил Иванович. — Монэ бырйизы. «Удмурт Кенеш» азьын ужпум сылӥз: калыкмес азинтоно. Кылдӥзы егитъёслэн «Шунды» огазеяськонзы но «Удмуртбизнесцентр», удмурт нылкышно движение. Пыр-поч ужаны кутским палэнысь удмуртъёсын. Сётъяны кутскимы К. Герд нимо премиез. «Удмурт Кенешлэн» исполкомез потаз парламент азе Удмурт Республикалэн Конституциезлэн проектэныз, «Удмуртъёслэн съездзылэн статусэз», «Удмурт Республикаын гражданство сярысь» законъёсын но мукет…

«Удмурт Кенешез» Михаил Иванович 2 ар ӵоже валтӥз. Нош Фин-угор калыкъёслэн консультативной комитетазы 3 ар ужаз. Со дыр ӵоже фин-угор улосъёсысь калык клубъёслэсь, пичи огазеяськонъёслэсь кылдытэмын вал огъя кужмо движение. Нялтас вераса, Михаил Иванович сад-бакчаяз но фин-угор дунне-музей кылдытӥз. Садаз писпуос мерттӥз карта вылысь калыкъёслэн интыяськемзыя. Котькудӥз писпу— кыӵе ке фин-угор азьветлӥсь. Бордазы бырттэмын кин луэмзэс верась табличка…

Соку, 10 ар талэсь азьло вераськыкумы, мон пайми, бадӟым кивалтӥсьын, кун службаын сокема ужам, зэмос война пыр потэм адями, огласянь туж чурыт, юн, мукет ласянь, туж лякыт сюлэмо. Соин ик кошкон азям юатэк ӧй чида: сомында олома но пыр потыса, чылкыт кылемын-а лулпушез?

— Ӧвӧл, — соку ик шуиз Михаил Иванович, — соин мон та пумысен трос малпаськисько. Огшоры адямилэн но, зэмос геройлэн но улонзы огсыр ӧвӧл. Огпол Калмыкиысь обкомлэн нырысетӥ секретарез доры пырай, кабинетаз 4 портрет ошемын: К. Маркс, В. Ленин, Л. Брежнев… Нош ньылетӥзэ уг тодмаськы. Кин со шуыса юамелы кивалтӥсь туж зол паймиз: ма, со, пе, тӥляд, удмуртъёслэн, пиды ук — Трофим Борисов, со сомында лэсьтӥз калмык калык понна… Сыӵе учыр бӧрсьы возьытлык (совесть) чылкыт луыны быгатэ шат? Мон, КПСС-лэн обкомезлэн 2-тӥ секретарез, вань удмуртъёслэн президентсы, номыр ӧй тодылы калыкмылэн тужгес дано пиез Трокай сярысь…

* * *

Вакыт воштӥськиз. Трокай Борисовлэн нимыз Удмурт шаере берытскиз, со сярысь гожъяны, вераны, книгаос поттыны кутскизы. Михаил Иванович талы шумпотӥз, трос лыдӟиськиз, удмурт калыклэн ортчем сюресэз сярысь малпаськиз.

Зэм, табере со ачиз но вӧзамы ӧвӧл ни. Тани та материалэз гожъян вискам шуак малпай: али Михаил Ивановичлэн туспуктэмез вӧзтӥ ортчись удмурт егитъёс, азьветлӥсьёс, тросэз-а тодозы, кин со?

Михаил Шишкин дунъямын Трудовой Горд Знамя орденэн, «От благодарного афганского народа» медален, Афганистанлэн Эшъяськон орденэныз но трос мукет медальёсын. Удмурт Республикаысь наука удысысь дано ужась, Россия Федерациысь дано экономист луиз, Россиысь «Арлэн менеджерез» конкурсын 2008-тӥ арын вормиз. Швейцариысь издательство со сярысь ивор пыртӥз «Whо is Whо в России» энциклопедие.

Елена Миннигараева

Ангелина Снигирева
By Ангелина Снигирева 2 февраля, 2021 09:32
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<