Удмуртиысь калык суредасьлы Семён Виноградовлы — 85 арес

Удмурт Дунне
By Удмурт Дунне 27 января, 2021 16:16

Туннэ, 27-тӥ толшоре, 85 арес тырме Семён Николаевич Виноградовлы — Удмуртиысь калык суредасьлы, профессорлы, этнографлы, Трокай Борисов нимо йӧскалык премилэн лауреатэзлы.

егоров
Удмуртиысь калык художинк Семён Виноградов.
Туспуктӥз Максим Егоров

Алнаш ёросысь Шайтангуртын 1936-тӥ арын вордскем художниклэн улон но творческой сюресэз герӟаськемын удмурт калыклэсь лулчебертсэ утёнэн.

Семён Николаевич йылпумъяз Москваысь В. Суриков нимо художественной институтэз, кема аръёс ӵоже ужаз УдГУ-ысь Искусствоосъя но дизайнъя институтын, ӵем поталляз этнографической экспедициосы. С. Виноградов — «Удмуртская одежда» (1974), «Удмурт пужыос» (1994) но мукет книгаослэн авторзы.

Калык художник быгатыса огазеяз наукаез но лулчеберетэз: калык дӥськутэз, символикаез эскерыса, возьматъяз сое суредъёсаз. Тросэзлы тодмо солэн «Пельнянь» (1979), «Гырон быдтон юмшан» (1970) но мукет суредъёсыз. Удмурт сямъёсты, калыкез, инкуазез, дано муртъёсты суредаса, Семён Виноградов шаермылэсь данзэ ӝутӥз. Солэн суредъёсыз анайлэн киосыз кадь шуныт мылкыд, атай юрт кадь йыг-йыг оскон кузьмало учкисьлы.

Пельнянь. Дэра, вӧё буёл. 1979.

«Удмурт дунне» газетлэн редакциез ӟечкыла дано художникез Вордскем нуналэныз. Шуд но тазалык сӥзиськомы, тау шуиськомы тӥледлы, Семён Николаевич!

Удмурт Дунне
By Удмурт Дунне 27 января, 2021 16:16