Ижын кылдоз Вифлеем кизили!

Ангелина Снигирева
By Ангелина Снигирева 14 января, 2021 11:24
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

7-тӥ-19-тӥ толшоре Ижкарын ортче «Ангелъёс но архангелъёс» фестиваль.

Кӧня ке нунал талэсь азьло дун-чылкыт Михаиллэн соборез, Вулэн музеез котырын но Дмитрий Пригов нимо ошмес дурын йӧ пилетъёс кылдӥзы. Тросэз соос пӧлысь чеберскизы ини: Удмуртиысь но палэнысь вуэм скульпторъёс, кезьыт куазьлэсь кышкатэк, бензопилаосын, ожонъёсын (стамеска), резакъёсын йӧэз вӧло. Котькудӥзлы висъязы ог 2-4 кубометр йӧ, нош кыӵе киужъёс вордскозы кынмем ву пушкысь, тодмо луоз Йӧвылэсултон нуналэ, 19-тӥ толшоре.

Куд-ог кибашлыос та дырлы ужзэс йылпумъязы ини. Пичи Пурга ёросысь Виктор Яковлев но Сюмси ёросысь Алексей Кузнецов лэсьтӥзы «Всевидящий» нимо скульптураез: йӧлэсь вордскиз инмын лобась, адямиосты чаклась-утись кылчин. В. Яковлев та фестивале 4-тӥ арзэ пыриське ини. Нош Дэри ёросысь Италмас черкогуртысь Сергей Митрофанов «Ангелъёс но архангелъёс» фестивале 5-тӥзэ вуиз. Туэ скульптор чылкыт яратонэз возьматыны медэ: йӧлэсь анаез но нылпиез вӧлэ.

— Ужасько шумпотыса, ӟеч мылкыд басьтыса, — вера Сергей Аркадьевич. — Йӧлэсь скульптураос 10-тӥ арзэ вӧлӥсько. Йӧэн капчи ужаны, со небыт (пластичной), художниклэсь кылзӥське. Ожонэд но резакъёсыд лэчытэсь ке, уж капчиен мыноз. Йӧлэсь скульптураос, тулыс вуэмен, шунало ке но, жаль ӧвӧл — вуоно арын выльёссэ лэсьтомы на.

Талэсь азьвылгес Сергей Митрофанов пыриськиз Екатеринбургын ортчем «Вифлеемская звезда» йӧ скульптураосъя фестивале. Татын со Николай Вылка скульпторен валче «Хрустальная мелодия» нимо композиция вӧлӥз. 26 команда пӧлысь соос 2-тӥ инты басьтӥзы.

Ижкаре вуизы палэнысь скульпторъёс но — удмурт йӧэз туэ вӧло Москваысь, Санкт-Петербургысь, Пермьысь, Белоруссиысь вуэм кибашлыос. Дун-чылкыт Михаиллэн соборез азьын ик ӝоген «Вифлеем кизили» бадӟым скульптура вордскоз. Со бордын али ужало Пермьысь кибашлыос Наталья Белобородова но Павел Спехов.

— Эскизмес лэзьыкумы, ӧй но малпа вал, милемыз фестивальлэн тӧр шораз пуктозы шуыса, — вера Н. Белобородова. — Павел Спеховен валче кемалась ужаськом ини, ӵошен пуэз но вӧлӥськомы. Со сяна, мон изэн, лымыен ужасько. Таяз толалтэ йӧ вӧлонъя тросэз фестивальёс ортчытэк кылизы. Ярам, Иже вуыны быгатӥм.

Туэ «Ангелъёс но архангелъёс» фестиваль котырес лыдпуссэ пусъе: со 10-тӥзэ ортче. Котьку сямен радъясьёс калыкез йӧ скульптураосын тодмато но кибашлыосты данъяло Йӧвылэсултон нуналэ. Фестивальлэн кураторез Анфим Ханыков суредась верамъя, туэ Иже вуэм ог 30 кибашлыос 20 скульптура лэсьтозы.

Анастасия ШУМИЛОВА

Туспуктэмъёсыз Максим Егоровлэн

Ангелина Снигирева
By Ангелина Снигирева 14 января, 2021 11:24
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<