Бурдъясь кузьымъёс

Ангелина Снигирева
By Ангелина Снигирева 22 января, 2021 09:48

Выль ар азьын шаерамы ялэмын вал «Ёлка желаний» акция. Со быдэс толэзь кыстӥськиз, та дыр ӵоже 600 пала нылпиослэн, ветеранъёслэн куронъёссы быдэстэмын.

Глазовысь Саша Аккузин
Фото: udmurt.ru

Искусство, тазалык но спорт

Ӟеч ужрадэ шаермы 2-тӥ арзэ пыриське ини, сое ортчытъяны кичӧлтӥсь луиз «Огъя Россия» партия. Секыт югдуре шедем семьяосысь, дышетсконын, спортын асьсэдыз ӟеч возьматӥсь, нылпиос но ожысь но ужысь ветеранъёс куронъёссэс гожтылӥзы. Ваньзы соос городъёсысь но ёросъёсысь Выль ар кызъёсы ошылэмын вал. Тол бабайёс — кивалтӥсьёс, депутатъёс — соосты зэматон борды басьтӥськизы.

Нылпиослэн куронъёссы пӧртэмесь вал, кинлэн ке потӥз Удмуртилэн Тӧроеныз тодматскемез, мукетъёсыз коньки, велик, ноутбук кулэ шуыса гожтӥзы.

Удмуртилэн Тӧроез Александр Бречалов Ижысь скрипкаен шудӥсь Элиналэсь малпанзэ быдэстӥз – нылаш сцена вылэ потоз Удмуртиысь симфонической оркестрен. Репетициоссы мыно ни. Элькунмылэн кивалтӥсез пумиськиз шоркарысь 62 номеро школаысь 7-тӥ классысь дышетскисьёсын. Ӵапак сыӵе куронэз — Тӧроен пумиськон — вал отысь пияшлэн Данииллэн. А. Бречалов пиналъёслы «IT-куб» центре вуылыны сертификат кузьмаз, школазы «Бадӟым ремонт» проектэ пыртэмын луоз, шуиз.

К. Сунцов Ваня Кононовлы ноутбук кузьмаз
Фото: udmurt.ru

Глазовысь Саша Аккузинэз Выль ар азьын Ижысь цирке ӧтиз Кун Кенешлэн Тӧроез Владимир Невоструев. Со пияшлы мольберт но суредасьлэсь наборзэ кузьмаз — сыӵе мылкыдзэ пияш вераз вал аслаз гожтэтаз. Саша – инвалид, озьы ке но, со ялан сцена вылын, пыриськылэ ёросын ортчылӥсь ужрадъёсы, вожвылъяськонъёсы, яратэ спортэз.

Нош Якшур-Бӧдьялась 13 аресъем Ваня Кононовлэн ноутбукез кылдӥз. Сое кузьмаз Правительстволэн Тӧроезлэн нырысетӥ воштӥсез Константин Сунцов. Пияш кадет классын дышетске, спортэз гажа, туспуктылэ, пӧртэм олимпиадаосын вормылэ.

Ува ёросысь Рябово гуртысь Антоновъёс доры ёросысь депутатъёс клюшкаосын но ческыт кузьымъёсын лыктӥзы. Анна но Павел Антоновъёс 7 пиоссэс будэто, бадӟымезлы 15 арес, покчиезлы арес но ӝыны.

— Гуртамы хоккеен шудон коробкамы вань, огез пимы быдэс классэныз хоккеен шудыны ветлэ, мукетъёсызлэн но коньки вылэ султыны мылкыдзы вань кадь. Вань пиос, пичиез но, кузьымзэс кӧня ке нунал киысьтызы ӧз ик куялэ, корка азьын тупен хоккей шудӥзы. Соин туж бадӟым тау семьямылы саклык висъямзы но пиналъёсмылэсь спортэ кыстӥськыны мылкыдзэс юнматэмзы понна, — вера Анна Петровна.

Ува ёросысь Рябово гуртысь Антоновъёслэн семьязы
Фото: Анна Антонова

Кузьымлэсь дуногес саклык

Арлыдоос тросгес шумпотӥзы кивалтӥсьёслэн огшоры саклык висъямзылы. Выль ар вунонтэм кылиз Якшур-Бӧдья ёросысь Выжойыл гуртысь Геннадий Рябчиков понна. Ёрос депутатъёс солы бадӟым выль телевизор кузьмазы.

— Шумпотӥсько, милемыз уг вунэто шуыса. Выль телевизорме нылпиос пуктӥзы, арнялы быдэ сямен бертыло, со котыре ӵошен пуксиськом, — мылкыдзэ вераз Геннадий Давыдович.

Г. Рябчиков война кутскем бере Ижысь аэродром лэсьтонын, чугун сюрес вылын, леспромхозын ужамын. 16 арес тырмытэмез бере сое армие басьтӥзы. Со Кировысь, Казаньысь авиационной базаосты утиз. Нош война бере колхозын тыршиз.

Якшур-Бӧдья ёросысь Г. Рябчиков

Дэбесысь Мария Фроловалэн укно улаз шутэтскон сэрег пуктӥзы. Солэн малпанэныз шудонэз кыз вылысь басьтӥз Кун Думаысь депутат Валерий Бузилов. Мария Егоровна — ожысь ветеран, туэ феврале 99 арессэ тырмытоз.

— Гужем вуэ ке, ульчае потам, эшъёсын ӵош пукем потэ, нош ӟусъёс ӧвӧл. Соин ик таӵе пукон, шутэтскон инты сярысь малпаськылӥ, — вераз кышномурт.

Мария Егоровналэн нылпиосыз ӧвӧл, сое чакласа возе соцработник. 1942-тӥ арын 20 аресказ педучилищеез быдтэмез бере М. Фролова фронтэ куриськиз. Со связист вал, секретной иворъёсты келялляз. Вордӥськем палъёсаз берытскемез бере, пенсие потытозяз, роноын ужаз.

Ангелина Снигирёва

Ангелина Снигирева
By Ангелина Снигирева 22 января, 2021 09:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<