45 аресъем студент

Ангелина Снигирева
By Ангелина Снигирева 1 декабря, 2020 10:29

Таяз аре Удмурт кун университетысь «Чипчирган» ансамбльлы 45 ар тырме. Ӝыны даур пала «Чипчирган» калык эктонъёсты уте но учкисьёслэсь мылкыдзэс ӝутэ.

«Чипчирган» уно сю егитъёслы удмурт культурае сюрес возьматӥз.
Туспуктӥз Алёна Глухова

Удмурт фольклорез эскерись ансамбльёс пӧлысь «Чипчирган» нырысетӥосыз радын вал. Со огазеяз Удмурт кун университетысь студентъёсты. Татысь дышетӥсьёс, тодосчиос Владимир Владыкин, Валей Кельмаков кема аръёс ӵоже малпаськиллям, таӵе коллектив одно ик луыны кулэ шуыса.

Ансамбльлэн нырысетӥ кивалтӥсез Розита Анкудинова вал, со этнографиез но сценаез огазеяны быгатӥз, удмурт лулчеберетэз выль сямен усьтӥз. 2004-тӥ арысен коллективен кивалтэ Ирина Пчеловодова.

— «Чипчирганэ» лыктыкум, аслэсьтым ӧрме утчай, — тодаз вае Ирина Вячеславовна. — Кыӵе шӧмын кырӟалом: вашкала яке туала? Выль аранжировка дасялом яке вашкала сямъёсты утём? Трос юанъёс вал. Мон соку гинэ консерваториез быдтӥ, шугъяськылӥ. Репертуарез выльдыны туж зол юрттӥз Розита Андриановна ик. Со дырысен тросэз воштӥськиз ини: уйпал удмуртъёслэсь кырӟан-эктон амалъёссэс, крезьёсты (кырӟанъёсты) дышетӥмы. Студентъёслы туж тунсыко мае ке но выльзэ тодыны.

«Чипчирганын» пӧртэм кырӟанъёсты быдэсто, троссэ Ирина Вячеславовна архивъёсысь шедьтылӥз, асьсэос студентъёс но экспедициосысь соосты вайыло. Кырӟанъёсты узьыгумы, сялапеллян, кубыз, крезь но арган шудэм улсын быдэсто. Студентъёсын ужа хореограф но.

— 2004-тӥ арын ми борды итӥськиз Валентина Студитских, — шуиз Ирина Вячеславовна, — со удмурт эктонъёсты пуктылӥз. Нош али эктыны дышетэ Лилия Леонтьева. Лиля студент дыръяз «Чипчирганэ» ветлӥз, татын будӥз, кыдаз.

Дышетӥсьёслэн малпамзыя, ансамбльын студентъёс кулэ валаны удмурт фольклорлэсь чеберзэ, аспӧртэмлыксэ. Уноез студентъёс лыкто татчы калык эктонъёсты быдэстыны, кырӟаны дышетскыны.

— «Чипчирган» ансамбле 2 толэзь гинэ ветлӥсько ай, — вераз университетысь Удмурт кылосбуръя, финно-угроведениея но журналистикая институтысь студентка Кристина Дмитриева. — Эшъёсы веразы, та ансамбльын туж тунсыко шуыса. «Чипчирган», пе, пӧртэм ужрадъёсы пыриськылэ. Та дырозь мон ноку но ӧй дышетылы удмурт эктонъёсты, кырӟанъёсты, нош ансамбль монэ бурдъяз удмурт сям-йылолъёсын матысьгес тодматскыны.

— Нош мон малпасько вал, «Чипчирганэ» басьто соосты, кин чебер кырӟа но эктэ, удмурт кылын чебер но вольыт вераське, — итӥське бордаз Естественной наукаосъя институтысь студентка Полина Михайлова. — Соин ик 2-тӥ курсысен гинэ дӥсьтӥ татчы лыктыны. Туж кельшиз! Табере нуналъёсты лыдъяса пукисько, ку ини репетиция луоз, ку ини выль эктон яке кырӟан дышетомы.

Али «Чипчирганэ» мукет вузъёсысь студентъёс но ветло.

— Татчы ветлэ вал мынам эше Виолетта Анисимова, — вераз Ижысь гурт удысъя академиысь агроинженерной факультетысь студент Сергей Волков. — Мон но лыктыны малпай. Дышетӥсьёсмы ваньзэ туж умой валэкто, янгышъёсмес тупатыны юртто. Нуналысь нуналэ золгес синмаськисько удмурт эктонъёслы но кырӟанъёслы.

— Али гинэ лыктэм студентъёсын ужаны секыт, — вераз Ирина Пчеловодова, — угось соослэн та дырозь эктэмзы, кырӟамзы ӧй вал, но тыршемзэс адӟиськод но — мылкыд ӝутӥське. Соосын тунсыко: ачид но мае ке выльзэ басьтӥськод, кырӟанэз мукет сямен шӧдыны кутскиськод.

— Азьло мон шуысал: «Чипчирган» мынам семьяе, улонэ. Нош али мыным туж секыт валаны, мар мон понна та ансамбль, малы ке шуоно акыльтыса мон трос пол куштӥськыны турттӥсько вал ини. Но «Чипчирган» монэ нокызьы ӧз лэзьы. Студентъёс воштӥсько, выль адямиос лыкто, соос туж пӧртэмесь, «Чипчирганлэн» тусыз но воштӥське. Соя улонлэсь воштӥськемзэ чакласькод. Соин ик, дыр, кошкеме уг луы.

«Чипчирган» — Удмурт кун университетысь 45 аресъем студент: дышетске но, дышетэ но.

Елена Тыбанова

Ангелина Снигирева
By Ангелина Снигирева 1 декабря, 2020 10:29
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<