8 выжы калыклэн шумпотонэз

Ангелина Снигирева
By Ангелина Снигирева 3 декабря, 2020 16:06
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Удмурт кылъя учебникъёс но программаос пыризы федерал реестре

Ижкарын 2 нунал ӵоже мынӥз «Вордскем кыллэн дышетон сӧзнэтын интыез: туала вакытэз но азинскемез» калыккуспо конференция.

Дышетӥсьёс дэмен эскеризы удмурт кылэз дышетон но азинтон амалъёсты.
Туспуктӥз Максим Егоров

Коронавирусэн валче ужрад очно-заочной амалэн ортчиз. Оглом 200 мурт пыриськиз конференцилэн ужаз. Удмуртиысь но Россиысь учёнойёс сяна, анай кылэз дышетон ужпумъя вераськыны мылкыд каризы Венгриысь, Финляндиысь, Эстониысь, Италиысь но Украинаысь дышетӥсьёс но тодосчиос.

Конференцилэн ужаз пыриськизы дышетонъя но наукая министр Светлана Болотникова, нациосын ужан политикая министр Лариса Буранова, Кун Кенешысь ялан ужась комиссилэн тӧроез Татьяна Ишматова, Россиысь Анай кылъёсты азинтонъя институтлэн директорез Лариса Маршева, Йӧскалык библиотекалэн кивалтӥсез Татьяна Тенсина но мукетъёсыз.

— Ёросъёсысь дышетонъя управлениосын кивалтӥсьёс пусъё, берло дыре анай кылэз дышетон удысын ӟеч пала воштӥськонъёс адскизы шуыса. Но урокъёсын дышетэм сяна, луыны кулэ ужрадъёс но, нылпиос анай кылзэс отын волятыны мед быгатозы. Малы ке шуоно валаськом: арняяз 3 урок ортчытыса гинэ, асьмеос азинлык ум басьтэ. Анай кылэз огшоры улонын тросгес но тросгес кутыны тыршоно. Нылпилы пыӵатыны быгатоно, удмурт кыл сое вормонозь вуттоз шуыса. Тани али туж трос куриськисьёс луизы покчиос пӧлын радъяськись «Пичи чеберайёс но батыръёс» конкурсэ. Сыӵе ик югдур мед луоз научно-практической конференциосы куриськон ласянь. Та ужез огъя радъяно, — шуэ «Удмурт Кенеш» ассоциацилэн президентэз, Кун Кенешысь ялан ужась комиссилэн тӧроез Татьяна Ишматова.  

Россиысь Анай кылъёсты азинтонъя институтлэн директорез Лариса Маршева пусъе: Россиын 66 выжыысь калыкъёс анай кылзэс дышето. Со вакытэ ик кылдэмын шугъяськон: 38 кылэз дышетонъя учебникъёс но программаос ӧз пыре федерал перечене. Таӵе ик четлыкын вал удмурт кыл но. 3 ар ӵоже, Дышетон удысысь йӧскалык ужпумъёсты эскеронъя институт тыршемен, анай кылъя вань учебникъёс пыризы федерал реестре. Нялтас вераса, таӵе шумпотонэз вань 8 выжы калыклэн гинэ: адыгей, бигер, башкир, чуваш но куд-ог мукетъёсызлэн.

Конференцилэн 2-тӥ нуналаз анай кылэз гажасьёс но дышетӥсьёс 5 площадкаосын ужазы. Удмурт кылъя электрон учебникъёсты уже кутон сярысь кенешизы Дышетон удысысь йӧскалык ужпумъёсты эскеронъя институтысь ужасьёс но школаосысь удмурт кылъя дышетӥсьёс. Кылсярысь, Алнаш ёросысь Кузёбай школаысь удмурт кылъя дышетӥсь Марина Никонова пусйиз: электрон учебникъёсты, урокъёсын сяна, пайдаё кутыны луэ классной часъёс но мукет ужрадъёс дыръя. Дэри ёросысь Шор Постол школаысь дышетӥсь Надежда Кабанова электрон учебникъёсын ужаны аслэсьтыз дэмланъёссэ вераз.

Тросэзлы педагогъёслы тунсыко потӥз мукетызлэн секцилэн ужез. Ар ӵоже быдэсмиз «Удмурт кылдунне» портал. Кыӵе солэн пуштросэз но кыӵе пайда сётоз — ивортӥзы Дышетон удысысь йӧскалык ужпумъёсты эскеронъя институтысь ужасьёс Виталий Пронин но Надежда Ямаева.

Удмурт литератураез дышетонын IT-технологиосты кутон сярысь вераськизы Удмурт кун университетын. Вузын ужан опытсэ мадиз педагогика наукаосъя доктор Любовь Фёдорова. Школаын выль технологиосты урокын кутэмзэ ивортӥз Дэри ёросысь Лудорвай школалэн директорез Надежда Мерзлякова.

Проектъёсын ужамзы сярысь веразы но возьматӥзы К. Герд нимо гимназиысь дышетӥсьёс. Россиысь Просвещениея министерствоысь утэм грант чотын татын кылдытэмын Этнокультурной дышетонъя медиалаборатория. Табере пиналъёс асьсэос кылдыто шудонъёс но мультфильмъёс, дасяло видео но мукетсэ.

Конференцилэн ужаз пыриськемъёс быгатӥзы асьсэлэсь ӵектонъёссэс вераны. Бӧрысь висьытӥсь ужпумъёссэс резолюцие огазеялозы.

Елена Скворцова

Ангелина Снигирева
By Ангелина Снигирева 3 декабря, 2020 16:06
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<