Ӵуказе нунал вордӥське туннэ

Ангелина Снигирева
By Ангелина Снигирева 10 декабря, 2020 17:10

17-тӥ толсуре (декабре) Ижын радъяськоз вань удмуртъёслэн 14-тӥ ӧтчамзы. Отын эскериськозы удмурт калыкен герӟаськем тужгес шугъяськытӥсь ужпумъёс. Таӵе бадӟым ӧтчам 4 арлы 1 пол ортчылэ.

Туспуктӥз Максим Егоров

Пандемия вакытэ ортчоз-а, уз-а съезд, трос вераськонъёс вал. Озьы ке но, Удмуртилэн кунлык басьтэмез дырысен 100 ар тырмонлы сӥзьыса, таӵе ужрадэз ортчытытэк нокызьы уг луы вал. Съезд ортчоз Удмуртиысь тужгес бадӟым залын — Ижысь «Аксион» культура юртын. 500 пала адями, пандемилэсь куронъёссэ лыдэ басьтыса, интыямын луоз.

Нялтас вераса, нырысетӥ удмурт съездъёс ортчылӥзы туж секыт вакытъёсы, Граждан ож мыныку. 1918-тӥ арын ӧтчаме пыриськизы Вятка, Казань, Уфа, Пермь губерниосысь 78 удмурт делегатъёс. Соос нимаз автономия кылдытоно шуыса огкылэ вуизы, башкир-бигеръёсын огазеяськыны дэмласьёс вал ке но.

Нырысетӥ съездын удмуртъёс трос вераськизы калыкез югдытон, дышетон, азьлань валтон сярысь. Та съезд бӧрсьы удмуртъёс эшшо 2 ӧтчам радъязы на, озьы 100 ар талэсь азьвыл Вотской областьмы кылдӥз. Ас вакытаз удмурт калык ӧй ке огазеяськысал, туннэ Удмурт Элькунмы но ӧй луысал.

Нош 1990-тӥ аръёслэн кутсконазы удмурт движение выль кужымен ӧръяськиз, кылдӥз удмурт калыкез огазеясь «Удмурт Кенеш» ассоциация. Туннэ нуналлы со элькунысьтымы тужгес бадӟым общественной огазеяськон луэ.

«Удмурт Кенеш» огазеяськонлэн кивалтӥсезлэн Татьяна Ишматовалэн верамезъя, 14-тӥ ӧтчаме элькунысьтымы, солэн палэнысьтыз 374 делегатъёс, 100 пала ӧтем куноос пыриськозы. Съездэ лыктозы Татарстан, Башкортостан, Марий Эл, Коми республикаосын, Киров, Свердловск улосъёсын, Пермь крайын, Москваын, Санкт-Петербургын, Тюменьын но мукет улосъёсын улӥсь удмуртъёс но.

Ӧтчамын «Удмурт Кенеш» огазеяськонлэн берло 4 но ӝыны ар ӵоже ужамезлы йылпумъянъёс лэсьтэмын луозы. Та сярысь доклад лэсьтоз «Удмурт Кенеш» огазеяськонлэн кивалтӥсез Татьяна Ишматова.

Съездлэн ужаз пыриськозы шаерысьтымы вылӥ кивалтӥсьёс, министръёс но. Ужалоз 8 пӧртэм секция. Отын удмурт калыкен герӟаськем ужпумъёс эскериськозы: кыл политика но сое быдэстонлэн аспӧртэмлыкъёсыз, калык культуралы дышетонын вашкалаез но туалаез, городъёсын удмурт кылэз дышетон, этнотуризм, удмурт семьялэн асшӧдонэз но тазалыкез, удмурт кылын ивор вӧлмытон, удмурт егитъёслэн сюлмаськонъёссы.

Ӝутэм ужпумъёс съездлэн резолюцияз пырозы. Али ик валамон ини: уноез соос ӝог воштӥськись улонын анай кылэз, культураез, удмурт калыклэсь лулпуш узырлыксэ утёнэн но туала вакытэ азинтонэн герӟаськемын луозы.

Елена Миннигараева

Ангелина Снигирева
By Ангелина Снигирева 10 декабря, 2020 17:10