Ӝӧк вылын — тӧдьы но вож сюсьтылъёс

Ангелина Снигирева
By Ангелина Снигирева 28 декабря, 2020 09:27

Ортчись ар огмылы но капчиен ӧз сётӥськы. Оло, соин но валаса ик ӧм вуттэ на кадь: Выль арозь толэзь но кылемын ӧвӧл ни. Но ӟечезлы осконмы медаз кысы!

Тэле потомы, кыз чеберъяломы, котыртӥз бергаломы.
Туспуктӥз Максим Егоров

Гань-гань, нод-нод, лач-лач

Тӧдьы Ош — вуоно арлэн кузёез. Нош кызьы тодӥськомы, Ош — дыртӥсьтэм, котькыӵе ва­мыш лэсьтон азяз умой-умой малпаськись, улонлэсь кудпала бергамзэ валась, оскымон, ужез яратӥсь пудо-живот. Со ачиз но, мукетъёсыз но азе чурыт куронъёс пуктыны быгатэ, куддыр дыг луылэ, кыл вылаз сылэ, шуг-секытъёслы уг сётӥськы. Комакен уд ӵошаты. Соин ик, туэ сярысь, вуоно ар шӧдскымон гань-ганьгес луыны кулэ. 2020-тӥ арын малпам ужъёсты 2021-тӥ арлы кылизы ке, соосты йылаз-пумаз вуттыны луоз.

Астрологъёс верало: 2021-тӥ арын уката удалтоз ужлэсь кышкасьтэм, тодон-валанзэс будэтон сярысь сюлмаськись, азинскыны бадӟым мылкыдын улӥсьёслы. Кин ке, оло, ужбергатон борды басьтӥськоз, кин ке корка пуктыны кутскоз яке дасьсэ басьтоз. Ар туж тупалоз семья кылдытыны — кузпалъёслэн кусыпъёссы туж шунытэсь, юнэсь луозы, соос огкадь малпанъёсын улозы, азязы одӥг кадесь ужпумъёс пуктылозы.

Гуртын, бакчаын умойгес

Мар кароно Тӧдьы Ошлэсь мылкыдзэ капчи карон понна? Малы со шумпотоз но быдэс ар ӵоже асьмелы юрттӥськоз? Выль арез пумитаку, лыдэ басьтоно та пудо-животлэсь сямзэ, мае яратэмзэ. Ош туж гажа, дорын чылкыт, шуныт, югыт ке. Соин ик Выль арез, дорады пумитаса, умойгес луоз. Городын улӥсьёс сад-бакчаязы, дачаязы мынӥзы ке, вуоно арлэн кузёез сое умоен лыдъялоз.

Выль ар — семьялэн праздникез. Соин ик сое одно песянай-песятайёс, анай-атайёс, пиналъёс дэмен ортчытыны кулэ. Умой, пӧлады луизы на ке ӵыжы-выжыосты. Уртче пӧртэм шудонъёсы пыриське, вожвылъяське, эктэ-кырӟалэ — ваньмыз та кусыпъёстэс уката но матын карыны юрттоз.

Тустыя мед тупалоз, горд медаз луы

Вань сыӵе веран: выль арез одно выль дӥсен пумитано. Пӧртэм тодметъёслы оскисьтэмъёс но ӵемысь тае лыдэ басьтыны туртто, мар дӥсян сярысь азьло ик малпасько. Шонер, дыр, угось выль дӥсен пӧрмиськод ке, мылкыд ик бурдъяське.

Нялтас вераса, Ош чик быр­йиськись, ассэ возьматыны яратӥсь ӧвӧл. Соин ик дӥсьты тустыя гинэ мед тупалоз, огшоры но капчи мед луоз — ӧвӧл дӥсяно синтетикалэсь вуремъёссэ. Мукетыз юан: кыӵе буёло дэрем дӥсяно? Тӧдьы, пурысь, курень, озьы ик азвесьпыръем, зарнипыръем — вань та буёлъёс туж кельшозы вуоно арлэн кузёезлы. Озьы ик яралозы чагыр, бусӥр, вож, лыз, сьӧд. Но возиськоно гордлэсь! Угось асьтэос тодӥськоды: Ош та буёлэз кӧтвеськантэм каре.

Дӥсь бордады чилясь брошь дэмӟытэмды туж потӥз ке, номыр кышкытэз уз луы. Но умойгес луоз азвесьлэсь, зарнилэсь чеберъяськон арбериосты бырйыны, тупалозы дуно изъёслэсь лэсьтэм чыртывесьёс, суйпоскесъёс но.

Спортзалэ, бассейнэ, массаже…

Нош кин Выль арез кузьымъёстэк пумита? Аслыд маке кузьмало ке, шумпотоно. Но уката мылкыд лӧптэ, мукетъёссэ шумпоттыны быгатыку. Соин ик тросэз али ик лавкаостӥ кузьымъёс утчаса котыръяське ни. Лыдэ басьтэ Ошлэсь мылкыдзэ: со яратэ пайдаё, юртъер котырын кулэ луись арбериосты. Кылсярысь, умой луоз, мультиварка, кофеварка, утюг но мукет та выллем арбериосты бырйыса. Озьы ик тупалозы тусьты-пуньы, миндэр, шобрет, ӵушкон но та выллем трос мукетыз.

Вунонтэм кылёзы, шумпоттозы таӵе но кузьымъёс: кыӵе ке мастер-классъёсы, курсъёсы ветлыны луонлык, спортзалэ яке бассейнэ абонемент, массаже, фотосессие сертификат.

Ӝӧк вылын но, кисыын но — уксё

Выль арез дыртӥд-вуттӥд пумитано ӧвӧл. Со сярысь али ик малпаськыны кутсконо, та уже кысконо быдэс семьяез.

Корка пушкын одно утялтӥськоно — куштоно юнме кыстаськись вуж дӥськутэз. Эн кельтэ тэшканы шедем тусьты-чашаосты, сӧриськем арбериосты.

Корка пушез Выль ар праздниклы шулдыртыкуды, кутэ пулэсь, кортлэсь, бумагалэсь лэсьтэм арбериосты-шудонъёсты. Укыр чильпырась, яркыт буёло гирляндаослэн, мишураослэн кулэлыксы ӧвӧл. Гирлянда ошемды потэ ке, быръе тӧдьызэ.

Нош кызэз пӧртэм буёло — чагыр, вож, зарнипыръем, ӵуж — мишураосын чебертыны луоно. Соос синмез укыр кыскись гинэ медаз луэ. Ошыны луоз ошлэн, скаллэн тусынызы шудонъёс.

Вуоно арлэн кузёезлы уката кельшозы кыз вылысь тӧдьы, азвесьпыръем шудонъёс. Но тӧдьы буёлэн шудонъёс басьтыны луонлыкты ӧвӧл яке кытысь басьтыны уд шедьтӥське ке, туж умой амал вань — вужъёссэ выльдыны. Соосты, пинь сузян паста кутыса, кисточкаен буяно.

Ӝӧк вылын одно мед сылоз шудон — ош. Нош со улэ пононо уксё — макем бадӟымгес, сокем умойгес. Ош вӧзы пуктоно на тӧдьы сюсьтыл. Со пумозяз ӝуаса мед быроз! Озьы бордады удалтонэз, шудэз кыскоды. Вуоно арын тросгес уксёды мед луоз кадь потэ ке, тӧдьы сюсьтыл интые ӝуатыны быгатоды вожзэ.

Пунэмаськемъёсты вань ке, соосты пытсаны турттэ. Мукетъёсызлы но пунэмен эн сётэ. Выль арез пумитакуды, кияды но уксё понӥды ке, мултэс уз луы. Часъёс 12 пол шуккыку, одно куре сое, мае тӥ туж возьмаськоды. Нылпиосты, кузпалъёсты понна курыны уг яра. Эшшо син азяды пуктэ, лушкем малпанды быдэсмиз ини шуыса. Соку со улонын но одно зэмалоз. Пумиталэ Ошлэсь арзэ капчи мылкыдын, ӟеч малпанъёсын!

Элина Кумачёва

Ангелина Снигирева
By Ангелина Снигирева 28 декабря, 2020 09:27
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<