Чыртывесь уте син усёнлэсь

Ангелина Снигирева
By Ангелина Снигирева 9 декабря, 2020 12:33

Ижысь Алевтина Семёнова кыӵе гинэ киужен уг выры, котькуд арберизэ удмурт шӧмо-пужыё карыны тырше. Удмурт выжыосме дунъян анай йӧлын пыӵамын, киуже пыр но удмурт луэмме возьматэме потэ, шуэ кибашлы.

А. Семёнова

Удмуртилэн кунлыкезлы 100 ар тырмонэз но Алевтина Семёнова ас сяменыз пусйиз: удмурт дэрем вылаз песянаезлэсь кылем уксётӥрлыксэ дӥсяса, пиезлэн дышетсконнияз — Ижысь 19 номеро школае — вамыштӥз. Усьтэм урокын мадиз удмурт выжыосыз, шаермылэн историез сярысь.

— Малпай, уксётӥрлыке мар юнме дорын кыллёз — мед адӟозы пиналъёс. Отын тужгес вашкала манетэз чыл-чылк азвесьлэсь, 1728-тӥ ар шуыса пусъемын, — вера кибашлы нылкышно. — Ма, школае гинэ ӧвӧл, удмурт ужрадъёсы но удмурт сямен пӧрмытскыса ветлӥсько. Зэм, вашкала уксётӥрлыке пичи ӧвӧл, секыт, соин ик сое ужрадлы быдэ уд нуллы. Ма, мазэ ке ышто шуыса но кышкасько. Выжымылэн синпелетэз ведь со. Соин ик кутӥ но чыртывесь аслам киосыным пӧрмытӥ. Тазэ куятэк сямен нуллӥсько. Инъетсэ-мӧлязэ горд басмалэсь вури — удмуртъёслэн горд буёл син усёнлэсь утись лыдъяське. Со борды бырттылӥ инӟыосты, манетъёсты. Котькудзэ пасяса сётӥз дедомы (песятай). Со кадь нокин но усто уг пӧрмыты! Угось огпол та ужез тодмоелы оски вал — ӧз кельшы: пасьёсызлэн дуръёсыз ӵогыр-ӵогыр пӧрмиллям, манетэз вурӟиськод но, дуръёсыз сӥньысэз вандо — манет кирга. Чыртывесь лэсьтонын нырысь ик тазэ чаклано.

Чыртывесезлы манетъёсты но Алевтина Семёнова рос-прос быръе: уксё пуйызэ кутыса, банке вамыштэ, вуж манетъёссэ выльёсыныз воштэ. Соос чылкыт мед луозы, мӧля вылысь кыдёкысен мед адскозы, чилялозы, шуэ нылкышно.

Ас киынызы мунё лэсьтэ

А. Семёнова вордскемын Дэри ёросысь Каравай-Норья гуртын, школазэ йылпумъямын Юськи черкогуртын. Выжыязы ваньзы киужлы устоесь вал бере, Алевтина но пыриз Дэбес педучилищеысь декоративно-прикладной искусствоосъя факультетэ. Улонзэ нылпиосты дышетонэн герӟаны малпаз вал. Но школаын соку уждун пичи вал. Озьы вуз карон удысэ шедиз. Табере тани, вис шедьтыкум, киужен вырисько, шуэ кибашлы.

Чыртывесьёс сяна, А. Семёнова вуре удмурт пужыё айшетъёс, йыркерттэтъёс, сумкаос. Котькуд пужызэ Алевтина ачиз пӧрмытэ — пӧртэм лентаослэсь, гозыослэсь, чильтэръёслэсь. Озьы огъя удмурт пужы кылдытэ. Алигес нылкышно басьтӥськиз выль киуж борды — мунё вурыны кутскиз. Соос пу боды вылын сыло, пушсы синтепонлэсь шарикъёсын тырмытэмын. Та мунёосыз пӧртэм калык дӥсь вуре — пӧрмытӥз ни удмуртсэ но ӟучсэ. Таӵе кузьымелы эшъёсы туж шумпото, шуэ нылкышно.

Елена Никитина

Туспуктэмъёс басьтэмын А. Семёновалэн архивысьтыз

Ангелина Снигирева
By Ангелина Снигирева 9 декабря, 2020 12:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<