Улонэ пыӵазы-а удмуртъёслэн 13-тӥ ӧтчамазы кутэм ужпумъёс?

Ангелина Снигирева
By Ангелина Снигирева 16 декабря, 2020 10:46
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«Удмурт Кенешлэн» 2016-тӥ арын феврале ортчем съездаз 6 секция ужаз, котькудаз матысь 4 арлы быдэстоно ужпумъёс чакламын но резолюция ӵектэмын вал.

«Мынам Удмуртие» телевиденилэсь передачаоссэ 
табере спутник пыр учкыны луэ.
«Мынам Удмуртие» ТРК-лэн архивысьтыз

Ивор вӧлмытон

Резолюциысь: национальной СМИ-осты азинтонъя концепциез кылдытон; «Удмуртия» ТРК-лы вещанизэ туала амалъёсын радъяны юрттон; кун ёзъёслэсь, интыосысь аскивалтонъя ёзъёслэсь сайтъёссэс удмурт кылын нуон.

З. Рябинина

«Удмурт дунне» газетлэн валтӥсь редакторез Зинаида Рябинина:

— Концепция дасян уж мытэмын вал, но пумозяз со вуттымтэ. Мукет ласянь, ӵапак али мынэ удмурт кылын потӥсь газет-журналъёсты огазеян ужрад (реорганизация), со юрттыны кулэ вань изданиослы огкадь саклык висъяны но соослэсь ӟечлыксэс будэтыны.

«Удмуртия» телерадиокомпанилэн валтӥсь редакторезлэн национальной вещаниея воштӥсез Сергей Касаткин:

С. Касаткин

— Цифра амалэ выжон вакытэ «Удмуртия» телеканал трос шуг-секытъёсын пумиськиз. Мукет улосъёсысь телеканалъёс сямен ик, ми но учкисьёсмес ыштыны кутским. Сюлэм висиз гуртоос понна. Та пумысен кӧня ке ар ӵоже ӟырдыт вераськонъёс пуромылӥзы. Та ужпумез уно пол ӝутылӥмы «Удмурт Кенеш» огазеяськонлэн Пичи кенешаз. Шумпотымон, милемыз кылӥзы. Элькун кивалтӥсьёслэн юрттэменызы, спутнике выжыны быгатӥмы. Табере вань программаосмес, удмуртъёссэ но, мукет улосъёсын но адӟыны быгато. Со сяна, шаерамы улӥсьёс программаосмес учко кабель операторъёслэн 21-тӥ кнопкаязы но. Телекомпанимес шедьтыны луэ Интернетысь пӧртэм сервисъёсысь, платформаосысь но.

Жаляса верано, кун ёзъёслэн, интыосысь аскивалтонъя ёзъёслэн сайтъёссы ӧз удмуртоме на…

Культура удыс

Резолюциысь: этнотуризмез азинтон; гуртъёсысь культурая юртъёсты выльдон; школаосын удмурт культуралы, шаертодонлы сӥ­зем дышетон программаез пыӵатон; Ижысь удмурт юг­ды­тӥсь­ёс­лы сӥзем синпелетъёсты чаклан-возён.

П. Данилов

Калык кырӟанъя но эктонъя «Айкай» театрлэн ки­вал­тӥсез Пётр Данилов:

— Туристъёс кыс­тӥсь­кы­ны ӧдъязы гуртъёсы. Кылдытэмын этнотуризмен гер­ӟаськем уно маршрутъёс. Туризмъя но киужъёсъя центр Экономикая министерстволэн бурд улаз выжтэмын, со котыраз огазеяз ёросъёсысь кибашлыослэсь юртъёссэс — палэнысь лык­тӥсь­ёс­лы ӵек­ты­ны быгатӥськом Удмурт шаерлэсь вань узырлыксэ возь­ма­тӥсь сувениръёсты.

Гуртъёсысь клубъёсты выльдон сярысь ке верано, та уж вырӟиз «Культура» нацпроектлы, «Огъя Россия» партилэн «Пичи Дорлэн лулчеберетэз», «Гуртысь культурая юрт» проектъёслы луыса. Адӟиськомы: унояз гуртъёсын клубъёссы выльдӥсько.

Жаляса верано, школаосын удмурт культураен гер­ӟась­кем дышетон программа пыӵаны ӧз кутскы. Валамон, нимаз-нимаз ужрадъёс но, урокъёс но радъясько — тужгес но туэ, кунлыклы 100 ар тырмонэз пусъён аре. Но та ласянь рос-прос система кылдытэмын ӧй вал. Удмурт юг­ды­тӥсьёслы сӥзем синпелетъёс сярысь ке верано, зэм но, ог 4 но ӝыны ар талэсь азьло соос начармемын вал ни. Но кунлыклы 100 ар тырмон улсын соосты возёнлы бад­ӟым саклык висъяськыны кутскиз.

Азьвыл ӧтчамын чаклам ужпумъёс огпалдурогес вал, шуыны луоз. Культура со клубъёс гинэ ӧвӧл, со суредасьёс но, кырӟасьёс но, композиторъёс но. Азьланяз соосын герӟаськем ужпумъёслы но саклык висъяно.

Кылэз азинтон но дышетон

Резолюциысь: удмурт кылэз дышетонъя нимысьтыз мониторинг ортчытон; удмурт кылъя но литературая учебникъёсты федерал перечене пыртон.

Н. Кондратьева

УдГУ-ысь удмурт кылтодонъя, финно-угроведениея но журналистикая институтысь дышетӥсь Наталья Кондратьева:

— 2018-тӥ арын «Дышетон сярысь» федерал законэ йӧскалык кылъёсты дышетон ласянь воштонъёс пыртэмын. Пиналзэс удмурт кыллы дышетэмзы потэ-а, уг-а — анай-атайёслы куриськон гожтоно. Анай кылъя урокъёсты нуон ласянь но нимысьтыз куронъёс пуктэмын. «Удмурт Кенеш» та ужпумез син шораз возе ке но, мерлыко огазеяськонлы югдурез ӟеч пала воштыны секыт: одӥг ласянь — федерал куронъёс, мукет ласянь — анай-атайёс…

Кылемаз ӧтчамын кутэм решениос уноез быдэстэмын. Удмурт учебникъёс федерал перечене пыртэмын, Глазовысь, Можгаысь школаосын удмурт кыллы дышетон радъямын, Йӧскалык политикая министерствоын удмурт кылэз азинтонъя нимысьтыз комиссия кылдытэмын, удмурт кылъя дышетӥсьёс понна туала технологиосын тодматӥсь курсъёс радъясько.

Но куд-ог ужъёс ӧз быдэсме. Кылсярысь, Дышетонъя но наукая министерстволы дэмламын вал йӧскалык кылъёсты дышетонэн герӟаськем ёз кылдытыны. Жаляса верано, туннэ нуналлы министерствоын нимысьтыз та удысэн вырись специалистъёс ӧвӧл.

Семьяен ужан но тазалыкез утён

Резолюциысь: удмурт кылэз, калык культураез утись семьяослэсь данзэс ӝутон; гуртъёсы потаса, семьяослы анай кылэз дышетонлэсь кулэлыксэ валэктон.

Н. Степанова

«Удмурт нылкышно кенеш» огазеяськонлэн азьвыл кивалтӥсез Надежда Степанова:

— Семьялы сӥзем ужрадъёс берло 5 ар ӵоже трос гинэ радъямын. Кылсярысь, 2017-тӥ арын радъяськиз «Анайлэн веттан гурез» проект.

Выль ӧрзэс шедьтӥзы «Выжы-выжы-выжыкыл», «Пичи чеберайёс но батыръёс» нылпи фестивальёс. 2018-тӥ арын радъяськиз «Анайлы сӥзьыса» форум. Кусып тупатэмын ёросъёсысь нылпи садъёсын — ортчизы «Анай кыл анай йӧлын ӵош!» семинаръёс. Но семьяын пиналъёсмес удмурт кыллы дышетон ужпум озьы ик лэчыт сылэ. Егит анай-атайёс кыкназы ик удмуртъёс ке но, доразы нылпиосынызы ӟуч кылын верасько. Удмурт кылэз анай кыл чотын дышетонэз но анай-атайёс пӧлысь шерез быръе…

Этнополитика но право

Резолюциысь: Правительстволэн Тӧроез бордын ужась Удмурт кылэз утёнъя кенешен кусыпъёсты юнматон; огазеяськонлэсь тужгес мыло-кыдо ёзчиоссэ кун но муниципал ёзъёсын ортчись быръёнъёсы ӵектон; анай кылэз дышетонэн герӟаськем воштонъёсты федерал законъёсы пыртон — та пумысен Кун Кенешлы вазиськон.

В. Байметов

«Удмурт Кенеш» огазеяськонлэн вице-президентэз Владимир Байметов:

— «Удмурт Кенеш» огазеяськон политической партия ӧвӧл, соин уг быгаты, кылсярысь, нациосын ужан политика сярысь законъёсты кылдытъяны. Но та удысэн гер­ӟась­кем ужпумъёсты шараян но сэрттон ласянь «Удмурт Кенеш» котьку но азьпал радын.

Элькунамы дано нуналъёс но праздникъёс шуыса юнматэмын К. Гердлэн, А. Окилэн, Т. Борисовлэн вордскем нуналъёссы, Гербер, Удмурт кыллэн нуналыз. Вань та уж данъяськымон.

2017-тӥ арын ортчиз «Удмурт Кенеш» огазеяськонлэсь кадръёсъя резервзэ кылдытонъя конкурс. Отчы шедизы ёросъёсысь удмуртлык понна сюлмаськись, мыло-кыдо кандидатъёс. Жаляса верано, та дырлы соос уже кыскемын ӧвӧл на. Но административной реформалэсь радъяськемзэ огазеяськон син шораз возе.

«Удмурт Кенешлэн» ёзчиосыз пырисько элькунысьтымы пӧртэм ужпумъёсын вырись группаосы: кылсярысь, Удмурт культурая центрез усьтонэн, Кызьпу арамаез радъянэн вырисьёсаз.

Егитъёслэн «Куара» огинзы пӧртэм проектъёсты азинтэ
Туспуктэм кутэмын «Куара» огинлэн архивысьтыз

Егитъёсын ужан

Резолюциысь: удмурт егитъёсты проектъёс бордын ужаны дышетон; элькунлэсь юрттэтсэ курыса «Шундыкар» лагерез паськытатон; «Шунды» огазеяськонлэсь ёзъёссэ вань ёросъёсын кылдытон.

О. Степанова

«Аныкай» медиашколаез кылдытӥсь, удмурт егитъёслэн азьветлӥсьсы Ольга Степанова:

— Егитъёслэн тыршеменызы но сюлмаськеменызы, удмурт кыл Интернетын берло аръёсы паськыт вӧлмиз. Социальной сетьёсын уно удмурт огинъёс кылдэмын, отчы мыло-кыдо егитъёс интыяло удмурт кылын аудио, видеоужъёссэс. Кылдӥзы удмурт блогеръёслэн школазы, «Аныкай» медиашкола, «Куара» огазеяськон. Отын егитъёс дышетско, туала технологиосты кутыса, Интернетын удмурт кылын видеоконтент кылдытыны. Малпасько, удмурт кылэз азинтонын та бад­ӟым вамыш.

Жаляса верано, удмурт егитъёслэн движенизы берло дыре бездытгес луиз. «Шундыкар» но азьвыл сямен ик шер радъяське — арлы огпол гинэ. «Шундылэн» ёзъёсыз но вань ёросъёсын кылдытэмын ӧвӧл на.

Елена Никитина

Ангелина Снигирева
By Ангелина Снигирева 16 декабря, 2020 10:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<