«Вирнунал» крезьгур кисьтэ

Ангелина Снигирева
By Ангелина Снигирева 26 декабря, 2020 09:47

Кылем арняе bobolenin рок-группа 2-тӥ крезьгуро альбомзэ поттӥз. «Вирнуналэ» 11 кырӟан пыриз. Милемлы, «Дарт» газетэз лэсьтӥсьёслы, фанатъёссы ӵем вазиськыло, соос сярысь гожтыны курыса. Малпамы: Выль ар азьын таӵе кузьым лэсьтоно! bobolenin группаез кылзӥсьёслы асьсэлы юанъёссэс сётыны дэмламы.

bobolenin группа
Туспуктӥз Алёна Глухова

— Кызьы тӥ ог-огдэс пумитады?

Николай Пронев. Алнаш ёросысь Туймыйыл гурт

Кирилл: — Мынам кемалась потэ вал группа кылдытэме. Та пиосын улон ачиз огазеяз кадь. Софронэн (Лёшаен — авт.) пумиськи «Шундыкарын», со вожатой вал, мон — школаын дышетскись. Соин матэгес тодматскимы, берло эшъяськимы но. «Дэрилэсь корка» альбомме гожтыкум, солэсь бас-гитаразэ курылӥсько вал, нош со ӧз но тодылы малы. «Шундыкарын» ик Вова но мынам ӧнерчие вал. Смена йылпумъяськыку, со милемлы, отрядысьтыз пиосызлы, вераз: юрттэт кулэ луиз ке — вазиськылэ. Озьы ик кари.

Лёша: — Кириллэсь дась альбомзэ Воваен кылзӥськимы, кельшиз. Ойдо, шуисько, юрттомы солы презентация радъяны. Вова соглаш луиз.

Кирилл: — Репетировать карыны кутскимы электронной барабанъёсын. Вовалы озьы ӧз кельшы, со ӵектӥз «Малы ми» группаысь барабанщикез — Женя Уткинэз — ӧтьыны.

Женя: — Соку улонам секыт, пурысь вакыт вал. Жингыртӥз Володя но ӧтиз одӥг удмурт пияшлы юрттыны, альбомезлэн презентацияз, пе, шудоно вал. Мон малпаськыны дыр кури. Вуоно репетициын ваньмы ӵош шудӥмы ни. Со дырозь, кин со сыӵе Кирилл Кириллов, уг тодӥськы вал, нырысьсэ пумиськимы. Репетиция бере шуи солы: «Малпасько, ми тонэныд эшъяськомы». Озьы ик луиз.

Кирилл: — Презентацимы туж ӟеч ортчиз. Пиос мыным сое ортчытонын гинэ юрттыны малпало вал, но ӵошен выль альбом но лэсьтыса вуим ни. Соос кемалась крезьгурен выро, трос тодо, мон пӧлазы — оболтус.

Концерт дыръя

— Кин ма понна кыл кутэ тӥляд группаяды?

Елена Хохрякова. Дэбес ёросысь Уйвай гурт

Кирилл: — Женя — радъян ужъёсъя, концертъёсъя, монэ ӵыжанъя администратор. Вова — крезьгуръя администратор. Со крезьгурлэсь ӟечлыксэ чакла концертъёс дыръя но, репетициосын но, кырӟан гожтыкумы но. Софрон — ӟеч мылкыдъя, шуныт омыръя администратор. Нош мон — кырӟан гожъясь. Мыным тужгес но трос сюре, пиос весь визь тыро.

— Творчествояды ӵем пумиське чонари вотэслэн тусыз. Кыӵе пуштросэз та образлэн?

Алёна Мазитова. Кияса ёросысь Уддяди гурт

Кирилл: — Чонари вотэс «Гопе» кырӟанын гинэ пумиське. Киноосын ӵемысь адӟиськомы: сылэ вуж буш шкаф, пушказ чонари вотэс сяна номыр ӧвӧл. Кырӟанам верай: «Мынам но сюлмам вуж шкафын кадь чонари вотэс каллен будэ». Алёна малпа, дыр, творчествомы та 
образэн пыӵамын шуыса, угось чонариен кардиганэ вань на. Сое мыным керттыса апае кузьмаз.

— Владимир Жуйков пӧртэм вакытъёсы шудӥз пӧртэм удмурт группаосын: Silent Woo Goore, Малы ми, bobolenin. Кыӵе группаын Вовалы тужгес но кельше вал шудыны? Малы?

Богдан Анфиногенов. Ижкар

Вова: — Мон та юанлы меӵак валэктон сётыны уг быгатӥськы, котькуд группалэн аслаз шӧмыз но историез. Мынам улонам но котькудӥзлэн аслаз интыез.

— Малы «Инстаграмын» Кирилл ассэ king_of_the_viceroys нима?

Богдан Анфиногенов. Ижкар

Кирилл: — Австралиын вань Violent Soho группа. Мыным со туж кельше, творчествоез бурдъяз «Дэрилэсь корка» альбомме поттыны. Соослэн вань Viceroy кырӟанзы. Viceroy — эксэйлэн наместникез. Припеваз соос кырӟало «King of the Viceroys», пӧрме, эксэйлэн наместникъёсызлэн эксэйзы. Мыным со веран туж кельше.

Азьло «Инстаграмын» аслам нике bobolenin вал, но группа кылдӥз ни бере, солы бам усьтоно вал, валамон, нимамы bobolenin шуыса. Соин аслым выль ним утчай. King_of_the_viceroys-лэсь тунсыкозэ номыр ӧй малпа ни.

— Кулэ-а группаын шудон понна крезьгурлы дышетскыны?

Марина Степанова. Алнаш ёросысь Туймыйыл гурт

Кирилл: — Мон крезьгуръя школаын дышетски, вылӥ образованиея — дирижёр. Дышетскем куддыръя туж кулэ: тон валаськод, кызьы крезьгур улэ, кызьы умойгес гур кылдытыны луэ. Но ӵемысь люкетэ но, малы ке шуоно аслэсьтым творчествоме пачкатыны ӧдъясько, классической крезьгурлэн чурыт куронъёсызъя кариськыса.

Женя: — Мон 7 ар ветлӥ крезьгуръя школае, хорын кырӟаны дышетски. Адӟиськоды, барабанэн шудон — со туж ик кулэ ӧвӧл мыным. Барабанэн ас поннам шудыны дышетски ни.

Кирилл Кириллов
Туспуктӥз Генриетта Соболева

Лёша: — Крезьгуръя образование ӧвӧл. 4-тӥ классын арганэн шудыны ачим дышетски. Собере Пуроысьтымы клубе Николай Еговкин доры ветлыны кутски. Со монэ дышетӥз арганэз яратыны. 9-тӥ классын гитара киям кутӥ. Университетын ини бас-гитараен тодматски. Соку ик валай, со мынам инструментэ шуыса. 
8 ар соин шудӥсько ни. Кулэ-а музыкальной образование, мон вераны уг быгатӥськы, угось мынам ӧвӧл но, мон уг тодӥськы, кызьы дунъяны кулэлыксэ. Шудэмед потэ ке — шуд.

Вова: Мон крезьгурчилы ӧй дышетскылы. Группаын шудыны мыным со кулэ ӧвӧл.

— Софрон bobolenin-лэн концертаз куке но балалайкаен соло шудоз-а?

Богдан Анфиногенов. Ижкар

Лёша: — Туж тунсыко малпан! Куке но, оло, шудо, ваньзы паймыса усьылозы.

— Вань-а Кириллэн нылашез? Со сыӵе йӧно пияш ук!

Алина Чернова. Пичи Пурга ёросысь Вуж Постол гурт

Кирилл: — Вань.

— Малы Женя футболын ЦСКА понна висе, кызьы озьы луиз?

Богдан Анфиногенов. Ижкар

Женя: — Та понна тау шуыны кулэ эшелы Денис (Прокс) Барановлы. Со «Спартак» понна висе. Нош футболын «Спартак» но ЦСКА — тушмонъёс. Серекъяса юри солы шуисько вал, ЦСКА вормоз! Нош собере, зэм ик, ЦСКА понна висьыны кутски.

Ангелина Снигирева
By Ангелина Снигирева 26 декабря, 2020 09:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<