Эктон — быдэс история

Ангелина Снигирева
By Ангелина Снигирева 30 ноября, 2020 16:28

Аня Кудрявцева 6-тӥ арзэ ини ветлэ Ижысь П. Чайковский нимо Операя но балетъя театр бордын ужась хореографической школае. Али Анялы 17 арес, ӝоген сое вите ЕГЭ. Ӵош дышетскись эшъёсыз малпасько на ке, кыӵе удысэз быръёзы, кыӵе вузэ дышетскыны пырозы, Аня со сярысь уг сюлмаськы. Нылаш 5 аресаз ик валаз: улонзэ балетэн герӟалоз.

Ижысь А. Кудрявцева 12 ар балетэн выре ни
Туспуктэм басьтэмын А. Кудрявцевалэн архивысьтыз

— Балетэн вырыны шуак уд кутскы. Со понна кулэ веськрес, куасалляськись му­­гор. Соин ик балетын азинско соос, кинъёс пичи дыръязы ик эктыны кутско. Тон ачид балетлы синмаськемын вал яке анай-атаед тонэ отчы келязы?

— Балетэ ветлыны кутски 5 аресам, валамон ини, отчы монэ анае гожтӥз, но мон чик ӧй пумитъяськы, яратылӥ эктыны. Милям Воткинскын трос ик кружокъёсмы ӧй вал, соин ик огдыре ваньмаз — эстрадной эктонэ, балетэ но суредаськонэ — ветлыны ӧдъяй. Но ӝоген балет ваньзэ вормиз.

Огшоры эктонъёсын мыным мӧзмыт вал: пиналъ­ёсын бызьылӥмы, тэтчаллямы, шулдыръяськон сьӧрын нокыӵе пуштрос ӧз ватӥськы. Мынам потылӥз рос-прос эктэме, котькуд вырослэн аслаз историез мед луоз. Тунсыко, 5 аресам ик озьы малпаськисько вылэм шуыса.

Озьы пумен кылиз балет гинэ. Зэмзэ ке, али мон эктонлэн мукет жанръёсыныз но вырысал, со тунсыко ук, басьтэм тодон-валанъёс, быгатонлыкъёс ноку мултэс уз луэ, балетын азинскыны юрттозы.

— Кӧня фильмъёс, веросъёс балеринаослэн секыт улонзы сярысь. Соос тонэ ӧз-а кышкатъялэ?

— Балет капчи ик ӧвӧл, зэм. Азьло, пичигес дыръям, эктыны шулдыр вал, трос кужымме быдтылӥ ке но, весь бурдъяськыса улӥ. Нылъёсын эшъяськылӥмы, калыккуспо конкурсъёсы ӵем поталлямы. Балет яратоно шудон кадь потылӥз.

13 аресам семьяеным Ижкаре улыны выжимы. Туж сюлмаськи, мар табере луоз шуыса, балетэз куштэме уг поты вал. Тодӥмы, Операя но балетъя театр бордын хореографической школа ужа шуыса, отын пиналъёс эктыны дышетско, спектакльёсын но шудыло, пе. Шумпотӥ, но кышкай: выль интыын мукет нылъёсын огкыл шедьто-а, эктыны быгатэмме дунъялозы-а? Театрын кыл кутон тросгес.

Ижын секытгес потӥз: дышетӥсьёс азямы чурыт куронъёс пуктылӥзы. Та кружок гинэ ӧвӧл — татын профессионалъёсты будэто. Огвакытэ балетысь кошкыны малпалляй, но али сотэк улонме уг адӟиськы ни. 12 ар соин вырисько уга!

— Туж ӧжытэз егитъёс классикаен, балетэн тунсыкъясько, аслыд йӧс­пӧртэм уд-а потӥськы?

— Выль адямиосын тодматскисько но, соос туж паймо, мон балерина шуыса. Кызьы, пе, озьы тон, туала вакытысь егит мурт, сыӵе валантэм удысэз бырйид, со модной ӧвӧл, туж мӧзмыт.

Бен, балетэз учкыны, дунъяны секыт, калыклы капчигес шонтыны киное яке дискотекае — отын шулдыргес. Но классикаез яратӥсьёс асьмелэн, Ижкарын, трос. Балетэ билетъёс ӝоггес быро, операосын, опереттаосын но мюзиклъёсын ӵошатыса.

Балет — мукет эктонъёслы инъет. Вань танцоръёслы кулэ тодыны, мар со позиция, кызьы киосты но пыдъёсты возёно, сотэк профессионал уд луы. Балет — огшоры эктон гинэ ӧвӧл, со искусство, милям мугоръёсмы пӧртэм историосты, учыръёсты верало.

Аслым калыклэсь пӧртэм уг потӥськы. Кин ке яратэ компьютер шудонъёсын шудыны, кин ке — TikTok-е видео снимать карыны, нош мон яратӥсько балетэз. Компьютеръёс, Интернет туж вӧлмемын, нош балет — ӧвӧл, соин гинэ мынам хоббие мукетъёсызлэсь висъяське.

— Мар тыныд балет сётэ?

— Туж яра, балетын астэ спортын кадь кыдатӥськод шуыса. Кинлы ке потэ, дыр: балерина мынӥз, тэтчиз, берытскиз, солы чабизы. Таин ваньмыз.

Мон залысен сцена вылын эктӥсь балерина шоры учкисько ке, весь малпаськисько: кӧня кужымзэ со быдтӥз та элементэз дышетыны, янгышъёстэк лэсьтыны, макем чебер пыдчиньызэ золтӥз… Ми чакласа улӥськомы секталамес, мултэссэ ум сииське, нош куддыр макем потэ ческыт сиён веръям яке кӧё-вӧё бургер куртчем!

Адями выль уж борды кутскемез бере ӵемысь шуэ: нырысь секыт вал, нош собере дыши, ваньмыз капчиен пӧрмыны ӧдъяз. Милям озьы уг луы. Мыным али но секыт на: котькуд нунал выль элементъёсты дышетӥськомы. Мыным кельше асме вормыны, кужмысь ужатыны. Пӧрме ке, туж лӧптӥсько.

П. Чайковскийлэн «Спящая красавица» балетаз А. Кудрявцева шудэ Резвасти феяез.
Туспуктиз Марина Иванова

— Бадӟым сцена вылэ но потаськод ни-а? Кыӵе ролез шудэмед потэ?

— Ижкарын луонлыке кылдӥз бадӟым спектакль­ёсы пыриськылыны. Нырысь монэ нокытчы ӧз пуктылэ, котыр ласянь эскеризы: мае быгатӥсько, тыршисько-а репетициын, ӝуало-а синъёсы…

Бӧрысь кутски массовкаын шудыны. Монэ пуктылӥзы балетъёсы, кытын нылпиос кулэ, кылсярысь, П. Чайковскийлэн «Щелкунчик» балетаз Выль ар кыз котырын шулдыръяськи, солэн ик «Спящая красавица» балетаз эктӥ. Макем сюлмаськи вал нырысьсэ театрмылэн сценаез вылэ потон азям! Мон — тэшкыли, нош бордам сыӵе тодмо, кужмо актёръёс экто. Выжыкыл, мукет сямен уд но шуы.

Будэмея тросгес рольёсы кылдӥзы. Крезьгур сюлэмъя ке, номыр кулэ ӧвӧл ни, эктонэ зымиськод, вунэтӥськод, макем зол курадӟид репетициосын. Сцена мыным туж яра, уг валаськы, кызьы сое кылъёсын валэктыны.

Трос балетъёсын эктӥсько но, соосты учкисько но. Мон синмаськемын Л. Минкуслэн «Баядеркаезлы». Со Никия эктӥсь сярысь. Нылаш улэ Индиын, туж синмаськемын Солор воинлы, соос ог-огзэс ярато, но ӵош луыны нокызьы уг быгато, пӧртэм 
шуг-секытъёсын пумисько. Пу­мыз туж ӝож… Мынэсьтым со лулме пызьыртэ: сюжетэз но, ачиз постановкаез но.

Нош льӧль малпанэ — П. Чай­ковскийлэн «Лебеди­ное озе­ро» балетаз сьӧд юсез — Одиллиез — шудыны.

— Мар кароно, элькунамы тросгес адями балетэн мед тунсыкъяськоз, тросгес нылъёс-пиос солы дышетскыны мед мынозы шуыса?

— Бадӟымгес городъ­ёсын — Москваын, Санкт-Петербургын, Пермьын — вань нимаз балетной училищеос. Мон ачим но турттӥсько вал Перме кошкыны, но ӧз удалты. Отчы нылпиосты 5-тӥ классысен куто: соос одӥг интыын школьной программаез но дышето, экто но. Асьмелэн сыӵе училищемы ӧвӧл, соин ик, малпасько, анай-атайёс пиналъёссэс та удысэ сётыны уг дӥсьто, школаез но балетэз огазеяны секыт луоз шуыса.

Умой, асьмелэн театрмы дышетскыны луонлык сётэ шуыса. Мон отчы ветло школа бере но. Оскисько, культурая колледжамы пырыны быгато шуыса, отын мукет эктонъёсын но тодматско, туж витисько ни со вакытэз.

Нош калыклы кызьы пыӵатоно балетэз яратон, мон уг тодӥськы, угось со туж аспӧртэм жанр, сое гажан, валан сюлмысь потыны кулэ.

Мария Емельянова

Ангелина Снигирева
By Ангелина Снигирева 30 ноября, 2020 16:28
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<